Ezekiel 29 - O Debleskro Lab 2024 (Sinte-Manouche)

O them Egiptia lell peskri phagi

¹ An o deshto bersh an o deshto čon ap o 12. (deesh-te-douyto) dives an ko čon penas o baro Devel ap mande:

² Tou, mensho, dik kote, kay o them Egiptia hi, oun pen glan-vi, hoy vell ap leskro baro rayeste, o Faraeste, oun ap o tselo them Egiptia.

³ Pen leske: Kava penell o baro Devel, maro ray: Tou Farao, baro ray pral Egiptia, kanna sikrau les touke! Tou hal har i baro čilačo firho čiddo an tire bare lengste panya, oun peneh: “Ko baro lengsto pani hi miro. Mange krom les.”

⁴ Me dau sasterne kanengre čourye an tiro mouy. Oun krau te ačenn i mače an tire shouppe pandlo. Palle tserdau tout vin dran o pani khetne kol mačentsa, kay ap toute pandlo hi.

⁵ Me vitsrau tout an o moulo them, tout oun i tsele mače dran tire bare lengste panya. Ap i phoub vitsrau tout. Kote ačeh čiddo. Oun kek vell, kay hadell tout pre oun paskrell tout. Me dau tout i divye firhenge oun i čirklenge rhapaske.

⁶ Yaake dikenn oun hayvenn halauter, kay an o them Egiptia djivenn, te hom me o baro Devel. Tou, Egiptia, hals i menshenge an o them Israel har i shilftikro khass.

⁷ Te tapran le pengre vastentsa ap toute, phagal oun dal lenge an i rig čourye. Oun te rikran le pen ap toute, phagal, oun yon doukran pengro doumo.

⁸ Doleske penell o baro Devel, maro ray: Dik, me anau o kourepen pral toute. Oun i menshe oun firhe an toute venn moulo dino.

⁹ Oun i tseli Egiptia vell i moulo them, kay či har barra pral ačenn. Oun yon dikenn oun hayvenn palle, te hom me o baro Devel. Tou, Farao, penal: “Kava baro lengsto pani hi miro. Me hom kova, kay kras les.”

¹⁰ Doleske shoun! Kanna sikrau les touke oun tire lengste panya. O tselo them Egiptia vell i moulo them, kay či har barra pral ačenn foun o foro Migdol bis pash o foro Syene oun bis ap koy rig, kay o them Etiopia čiddo hi.

¹¹ An o tselo them Egiptia djal bouder kek mensho trouyel, vitar kek firho. 40 (Star-deesh) bersha djivell bouder kek an o them.

¹² Me krau ko them Egiptia, te vell lo i moulo them, yaake har i vavar themma troul leste moule themma hi. Star-deesh bersha ačell leskre foryendar či har barra pral, yaake har pash kol vavar forya ninna hi, hoy an i themma koy trouyel čiddo hi. Oun i Egiptaryen tradau an vavar themma, te djivenn le mank vavar menshende.

¹³ Ninna penau me, o baro Devel, t'maro ray: Te hi kol star-deesh bersha trouyel, palle anau i Egiptaryen dran kol themma pale khetne, an kolende yon tradedo van.

¹⁴ Me krau, te vell lenge lauter pale mishto, oun anau len an o them Patros, an ko them, kolestar yon venna. Kote vell len palle i tikno rayeskro them,

¹⁵ tikneder har vavar rayengre themma, te hadenn le pen bouder gar pral vavar themma. Me krau, te vell len gar boud penepaske, te nay venn le bouder gar i raya pral vavar themma.

¹⁶ Yon venn gar bouder kolla, pash kolende i Israelitarya nashenn oun lendar poučenn, te venn le lenge ap i rig. Har le kova kran, anan le bari doosh ap pende. Kova hounte bistrenn le gar. Palle dikenn oun hayvenn le, te hom me o baro Devel, lengro ray.

O ray Neboukadnezar lell o them Egiptia dren

¹⁷ An o 27. (biish-te-eftato) bersh an o yekto čon ap o yekto dives an ko čon penas o baro Devel ap mande:

¹⁸ Tou, mensho, shoun! O Neboukadnezar, ko ray pral o them Babilonia, moukas peskre lourden i phari boudi te krell, har lan le o foro Tirus dren: Ap lengre sherya his bouder kek balla, oun lengre phika his pre oun yek doukepen. Fothe yon ninna boudran, an o foro Tirus his leske oun leskre lourdenge kek playsepen.

¹⁹ Doleske penell o baro Devel, maro ray: Kamau te dap o them Egiptia o rayeske Neboukadnezar an i vasta, te lell yob ko tselo bravlepen kote krik oun moukell o them vin te randell. Oun kova, hoy yon khetne randan, vell palle o playsepen leskre lourdenge.

²⁰ O Neboukadnezar oun leskre lourde boudran mange, har pandan le o foro Tirus dren oun kran les paash. Doleske vell lenge o them Egiptia lengri boudjake. Kova penau me, o baro Devel, t'maro ray.

²¹ An ko tsiro moukau me o kheer Israel pale zoreles te vell. Oun touke, Ezekiel, krau o mouy pre, te rakress mire laba mank lende. Palle dikenn oun hayvenn le, te hom me o baro Devel.