Ezekiel 28 - O Debleskro Lab 2024 (Sinte-Manouche)

I phagi vell pral o baro rayeste o forestar Tirus

¹ Oun o baro Devel penas ap mande:

² Tou mensho, pen ap o rayeste pral o foro Tirus: Kava penell o baro Devel, maro ray: Tiro dji hadas pes oun penas: “Me hom i devel! Oun hom beshdo ap i debleskri beshepaskri mashkral dren an baro pani!” Ninna te kreh, har te vals i devel, hal či har i mensho!

³ Hi čačo, tou hal gosveder har o Daniel, oun hayveh halauter.

⁴ Tiro gosvepah oun ko koveha, hoy tou halauter djineh, anal touke ko tselo bravlepen khetne. Tiro bravleskro kheer hi pherdo sonakay oun roup.

⁵ Bari gosvepah paral tiro koova oun val bravelo oun bravleder. Tiro tselo bravlepen kras tout pre-phourdo.

⁶ Doleske penell o baro Devel, maro ray: Tou hadal tout oun kreh, har te vals i devel,

⁷ doleske bičrau vi-themarya, kay djan ap toute pre, – zorele lourden dran boud themma, kay zilah ap vavarende djan. Lengre rharentsa krenn le ko raylo oun shoukar koova paash, hoy tiro gosvepah touke khetne anal.

⁸ Yon marenn tout. Oun tou mereh har yek, kay o rhareha maredo vell – mashkral ap o baro pani.

⁹ Te dikeh tou palle kolenge an o mouy, kay tout moulo denn, peneh bouder gar: “Me hom o Devel!” Te hal an i vasta kolendar, kay marenn tout, hayveh, te hal i mensho oun kek devel.

¹⁰ Tou meress har yek, kay hi gar činlo ap peskro mass. Vi-themarya denn tout moulo. Kava penau me, o baro Devel.

I ropaskri gili pral o baro rayeste o forestar Tirus

¹¹ Oun o baro Devel penas ap mande:

¹² Tou, mensho, gib i ropaskri gili pral o baro rayeste o forestar Tirus, oun pen leske: Kava penell o baro Devel, maro ray: Ap toute vas diklo, har yek hi, koleske lauter mishto djas. Baro gosvepen his tout oun hals yaake shoukar, te djals gar shoukeder.

¹³ Tout his i shoukar djipen, har te djivals an o Debleskri bar Eden. Ap toute his hake kouč barra: Rubin, Topas, Diamant, Krisolit, Onyx, Yaspis, Safiro, Karfunkel oun Smaragdo. Kol barra his an shoukar kerdo sonakay dren pandlo, oun touke koy, te less len ap ko dives, kay boldo val.

¹⁴ Tou hals har i zorelo bolepaskro, kay dell yak. Oun ap miri Debleskri berga čivom tout. Mank kouč barra, hoy dikan vin har yag, djal tou trouyel.

¹⁵ Ap ko dives har tout krom, his kek doosh ap toute. Oun yaake ačal bis ko dives vas, kay čilačepen kral.

¹⁶ Har tiro parepah bravelo val, rikral vavaren zoryah tele. Oun yaake lal doosh ap toute. Koy krom me tout pale-čiddo, oun tradom tout tele miri bergatar. Tou bolepaskro, kay yak dal, tout tradom vin dran koy platsa, kay i kouč barra hi, hoy dikenn vin har yag.

¹⁷ Tiro shoukapen kras tout pre-phourdo. Oun har bravelo oun raylo val, kral savo koova, hoy gar gosevo hi. Doleske vitsrom tout ap i phoub, oun moukom i vavar bare rayen ap toute tele te dikell, te vess lenge sapaske.

¹⁸ Har paral tiro koova rhorhepah, anal boud doosh ap toute. Yaake kral tou tire deblengre khera pale-čiddo. Doleske moukom mashkral an tiro foro i yag vin te phagell, hoy rhačras o foro pre, te ačas či har čik pral. Hakeno nay dikas har touke djas.

¹⁹ I menshenge an i vavar themma, kay prindjran tout, ačenn i balla tardo, kay tou yaake sik tele djal oun bouder gar pre veh.

I phagi o foreske Sidon

²⁰ Oun o baro Devel penas ap mande:

²¹ Tou, mensho, dik kote, kay o foro Sidon hi, oun pen glan-vi, hoy pral o foro vella!

²² Oun pen: Kava penell o baro Devel, maro ray: Kanna sikrau les touke, tou foro Sidon! Ap toute sikrau, har baro oun zorelo me hom, te dikenn oun hayvenn i menshe an toute, te hom me o baro Devel. Te vell miri phagi pral toute, sikrau i menshende, te hom o čačo Devel.

²³ An toute phagell i pharo djoungelo nasslepen vin. Oun an tire dromma nashell o rat kolendar, kay maredo van o rhareha. Haki rigyatar venn kol lourde, kay marenn tire menshen. Palle dikell oun hayvell hakeno, te hom me o baro Devel.

O Israel nay djivell an o lačepen

²⁴ I themma troul o them Israel dikenn kanna gomme tele ap o Israel oun doukrenn les. Yon hi i Israelenge har i soubya i soubyengre bourrendar. I tsiro vell, kay hi kova bouder gar yaake. Palle dikenn i menshe, te hom me, o baro Devel, lengro ray.

²⁵ Me, o baro Devel, t'maro ray, penau: An ko tsiro, kay anau me i Israelitaryen pale khetne dran i tsele vavar themma, kay van le tradedo, sikrau koleha i menshen an i tsele themma te hom me o čačo Devel. Oun i Israelitarya djivenn pale an pengro them, hoy dom me miro boudepaskres, o Yakobeste.

²⁶ Oun yon djivenn an ko them, oun len hounte vell kek daar i vavar themendar. Yon krenn penge khera oun čivenn drakengre rouka an i phoub. Oun kek nay krell lenge čilačepen. An ko tsiro kay dau kol themma troul lende pengri phagi, kay tele dikan ap i Israelitarya, dikenn oun hayvenn i Israelitarya, te hom me o baro Devel lengro Devel.