Ezekiel 26 - O Debleskro Lab 2024 (Sinte-Manouche)

O foro Tirus djal tele

¹ An o 11. (deesh-te-yekto) bersh har hams an o pandepen, ap o ersto dives an o čon penas o baro Devel ap mande:

² Tou, mensho, kol menshe dran o foro Tirus san oun penenn pral o foro Yerusalem: Tele phagedo hi ko foro, kolestar boud parepangre vin djan an vavar themma parepaske. Kanna ham mer kolla, kay venn bravelo. O forestar Yerusalem ačas či har barra pral!

³ Doleske penell o baro Devel, maro ray: Kanna sikrau les touke, tou foro Tirus! Dran boud themma anau me lourden kourepaske touha. Yek them pal o vavar djal ap toute pre, yaake har dell o baro pani ap o themeskri rig.

⁴ Oun yon phagenn i massurya oun i turme o forestar Tirus dren. Ninna i tseli čik khossau lestar krik, te ačell kokres i nango baro bar, hoy djal vin dran o pani.

⁵ Kote čivenn i mačengre pengre gone vin ap i phoub. Kova penom me, o baro Devel, t'maro ray. I menshe dran vavar themma randenn o foro Tirus vin.

⁶ Oun ninna leskre gaba vergel ap o them venn o rhareha dino. Oun i menshe dikenn oun hayvenn palle, te hom me o baro Devel.

⁷ Kava penell o baro Devel, maro ray: Me moukau o Neboukadnezar, ko baro ray dran o them Babilonia, ko zorleder i tsele rayendar, pral toute, Tirus, te vell foun kotar, kay norden hi. Oun khetne leha venn graya, vourdya o kourepaske, klissepangre oun boud boud lourde.

⁸ Tire gaba, hoy vergel toutar ap o them hi, dell lo o rhareha. Troul tire massurya moukell lo phoub pre te čivell, te nay djan le pral vergel. Ninna moukell lo turme te krell, kolendar denn le karye an o foro. Oun yob moukell shilte pre te čivell, pal lende i lourde tardo hi.

⁹ Oun bare pesse kotya kasht lenn le, te denn le tire massurya trouyel. Oun pengre toverentsa phagenn le tire turme tele.

¹⁰ Lengre graya hi yaake boud, te čakrell tout koy čik, hoy le pengre pirentsa pre vitsrenn. Te djan le an tire pre-phagede voudya dren, trissenn tire massurya koy bari golyatar, hoy i graya oun i vourdya oun i klissepangre krenna.

¹¹ I graya stakrenn tire tsele dromma paash. Tire menshe venn o rhareha moulo dino. Oun tire zorele barrengre turme perenn ap i phoub.

¹² Oun yon randenn tiro bravlepen oun čorenn, hoy touke parepah khetne anal. Tire massurya venn tele phagedo, oun tire shoukar khera paash kerdo. Kol barra oun ko kasht oun čik, hoy pral ačell, venn an o baro pani vitsedo.

¹³ Me krau, te vell bouder kek gipen an toute shounlo, vitar kek doryengro bashepen.

¹⁴ Me krau, te vess i nango baro bar, ap koleste i mačengre pengre gone vin čivenn. Oun tou vess bouder gar neves kerdo. Kava penom me, o baro Devel, t'maro ray.

¹⁵ Kava penell o baro Devel, maro ray, ap o foro Tirus: Te pereh tou khetne bari golyah, palle trissenn i tikne themma, hoy an o baro pani čiddo hi. Kolla, kay kote djivenn, trissenn i daryatar, te shounenn le kol boudendar, kay maredo van, oun shounenn i gole kolendar, kay čourye dino van i rharentsa.

¹⁶ Oun i raya an kol themma pash o baro pani stenn pengre rayle beshepangre pre, oun djan lendar tele, oun rivenn pengre kouč baya oun shoukar gada vin, oun rivenn paash koola an. Oun beshenn ap i phoub oun moukenn gar tele te trissell.

¹⁷ Oun yon givenn kay ropaskri gili pral toute: Ah, har val tou an kotya dino, tou sharedo zorelo foro! Pash o baro pani hals čiddo. Tou oun kolla, kay an toute djivan, hans i raya ap o baro pani. T'mendar daras o tselo them.

¹⁸ Kolla, kay djivenn ap i tikne themma hoy an o baro pani čiddo hi, trissenn kanna ap kava dives, kay tou khetne peral. Har bango hi le i trashatar, kay tou tele djal!

¹⁹ Kava penell o baro Devel, maro ray: Me krau, te vess tou i moulo foro har kol forya, kay bouder kek djivell. Me moukau boud pani pral toute te vell, te djas tele.

²⁰ Oun vitsrau tout tele pash kolende an o moulengro them, pash kol menshende, kay meran glan i rah tsiro. Dour tella an i phoub, pash kova, hoy kol phoure foryendar pral ačas, hoy tele djan, dau tout i platsa pash i moulende. Yaake nay djivell bouder kek an toute. Tou veh bouder kek foro ap i phoub, kay i djide djivenn.

²¹ Kova hoy touha djal, krell, te trissell hakeno, kay toutar shounell. Oun tout dell bouder gar. Te veh rodedo, veh bouder gar hatslo. Kava penell o baro Devel, maro ray.