Ezekiel 25 - O Debleskro Lab 2024 (Sinte-Manouche)

I phagi vell pral i Ammonarya

¹ Oun o baro Devel penas ap mande:

² Tou, mensho, dik kote, kay o them Ammon hi, oun pen glan-vi, hoy pral i Ammonaryen vella!

³ Pen lenge: Shounenn, hoy o baro Devel, maro ray, t'menge penell! Kava penell o baro Devel, maro ray: T'mer san pral miro kheer, oun penenn: Haha, har pale-čiddo hi lo! Oun pral o them Israel san t'mer, oun penenn: I moulo them vas kova! Ninna pral o kheer Youda san t'mer, oun penenn: An o pandepen anlo van le.

⁴ Doleske dau t'maro them an i vasta kolendar, kay kotar venn, kay o kham pre djal, te čivenn le pengre plarhtene khera pash t'mende pre, oun djivenn an t'maro them. Yon rhan ko djob, hoy ap t'mari phoub bares vas, oun piyenn i thoud t'mare firhendar.

⁵ Oun me krau, te vell t'maro baro foro Rabba i platsa, kay i khamele rhan. Oun t'mare gaba oun forya venn i them, kay i bakre oun bouzya djivenn. Oun t'mer dikenn oun hayvenn, te hom me o baro Devel.

⁶ Kava penell o baro Devel, maro ray: T'mer hans čilačo ap o them Israel oun san, har dikan, har lenge djal, oun dan an i vasta oun stan i barhtyatar.

⁷ Doleske djau zoryah ap t'mende pre, oun dau t'men an o vast i menshendar dran vavar themma. T'mer venn lenge har ko kouč koova, hoy i kourepangre penge lenna, te van le i zorleder an o kourepen. Oun me krau, te ačess bouder kek natsyona. T'menge ačell kek them. O tselo kheer Ammon djal paash. Oun t'mer dikenn oun hayvenn, te hom me o baro Devel.

I phagi vell pral i Moabarya

⁸ Kava penell o baro Devel, maro ray: I menshe dran i themma Moab oun Edom penenn: O kheer Youda hi yaake har hake vavar natsyone.

⁹ Doleske dau i forya ap i berge an o them Moab an i vasta kolendar, kay krenn len paash, – kol rayle zorele forya, hoy kharenn Bet-Yeshimot, Baal-Meon oun Kiryatayim.

¹⁰ Oun me dau o them Moab kolenge, kay venn kotar, kay o kham pre djal, te lenn le les dren. Yon hi kolla, kay ninna o them Ammon penge dren lenn. Oun i Ammonarya venn bistedo mank i vavar themma.

¹¹ Ninna i Moabaryen dau lengri phagi. Yaake dikenn oun hayvenn le, te hom me o baro Devel.

I phagi vell pral i Edomarya

¹² Kava penell o baro Devel, maro ray: I Edomarya dan i menshenge dran o kheer Youda pale, hoy kolla ap lende kran. Kova dan le len yaake pale, te lan le bari doosh ap pende.

¹³ Doleske penau me, o baro Devel, t'maro ray: Me hadau miro vast, te dap o them Edom peskri phagi. Menshe oun firhe venn moulo dino. Kek ačell djido an o tselo them mank kol forya Teman oun Dedan. I tsele menshe merenn an o kourepen.

¹⁴ Mire menshe Israel hi kolla, kay denn i Edomaryen pengri phagi. I Israelitaryen moukau lentsa yaake trouyel te djal, te vell miri bari zoreli rholi ap lende. Oun i Edomarya dikenn oun hayvenn, kay me kova hom, kay anell lengro čilačepen pale ap lengre sherya. Kova penell o baro Devel, maro ray.

I phagi vell ap i Filistarya

¹⁵ Kava penell o baro Devel, maro ray: An i tsele tsirya his i Filistarya ap čingepen oun kourepen mire menshentsa vin. Baro čilačepah djan le ap lende pre, oun kaman len te marell.

¹⁶ Doleske penau me, o baro Devel, t'maro ray: Me hadau miro vast, te dap i Filistaryen i phagi. I tsele menshen, kay an lengro them djivenn, marau me, kol Kretaryen oun ninna i vavaren, kay djivenn pash o baro pani.

¹⁷ Me anau lengro tselo čilačepen pale ap lengre sherya. Oun an miri rholi dau len i phari phagi. An ko tsiro, kay anau lengro čilačepen pale ap lengre sherya, dikenn oun hayvenn le, te hom me o baro Devel.