Ezekiel 24 - O Debleskro Lab 2024 (Sinte-Manouche)

O Yerusalem hi har i piri ap i yag

¹ Oun o baro Devel rakras mantsa an o enyato bersh, an o deshto čon, ap o deshto dives an ko čon, oun penas:

² Tou mensho, čin touke kava dives an i liil, te vell gar bistedo, havo dives kova hi! Kava dives čivell o baro ray dran o them Babilonia peskre lourden troul o foro Yerusalem trouyel, te lenn le les dren.

³ Pen mire menshenge, kay moukenn pen či mandar te penell, save laba, hoy sikrenn lenge, har kova lenge vella! Pen lenge: Kava penell o baro Devel, maro ray: Čip i piri pral i yag, oun čip ninna pani dren!

^4-5 Le o mass o feteder bakrestar! Oun čip i lače kotya an kay piri, i phika oun i herya, oun lače kokale, te vell i piri pherdo! Le kasht oun čip les tel i piri! Kre, te kerell o mass mishto! Mouk ninna i kokale lačes vin te kerell!

⁶ Kava penell o baro Devel, maro ray: Havi bibarht vell ap o foro, hoy yaake boud rateskri doosh ap peste las! Ko foro hi har i piri, hoy gar djoudjo kerdo vas, oun kolakro čik gar tele djal. Le yek kotar mass pal o vavar vin dran late! Mouk či an i piri dren!

⁷ Ko rat kolendar, kolen i menshe an o foro maran, hi gomme mashkral lende. Ap i baro bar nashas ko rat, oun gar ap i phoub, te nay čakrals yek les čikeha tele.

⁸ Me moukom ko rat ap ko baro bar, kay vell lo diklo, te moukap miri rholi zoreles te vell pral lende, te dap len pale, hoy le kran.

⁹ Kava hi, hoy o baro Devel, maro ray, penell: Djungeles djal touke, tou foro, kay lal rateskri doosh ap toute! Ninna me čivau boud kasht khetne i yagake.

¹⁰ An boud kasht khetne! Kre i yag, oun kere o mass mishto! Mouk i soummi yaake rah te kerell, bis te bouder či pral hi, oun i kokale tele rhačenn!

¹¹ Oun i piri, te hi bouder či an late dren, palle čip lat ap ko tele rhačedo kasht, hoy gomme lolo hi, te vell li tato, oun lakro saster lolo o tatepastar, te djal ko tselo čik tele, hoy les čiklo kras!

¹² Čičeske his koy tseli boudi! Ninna te vas koy piri an i yag yaake tato, djas lakri čik gar tele!

¹³ Yerusalem, kova, hoy kras tout pale-čiddo, hi tiro vi-ladjedo koova. Har kamom me ko pale-čiddo koova toutar krik te lell, kamal te ačell har hals. Doleske ačeh pale-čiddo, yaake rah me miri rholi ap toute vin moukom!

¹⁴ Me, o baro Devel penom kova, oun me krau les ninna yaake. Kava tsiro vas, te krap kova. Me rikrau man gar pale, te dap t'men i phagi, t'mer khaytenn man gar. Me krau miro dji gar pre t'menge. T'mer lenn t'mari phagi pal kova har djivan oun hoy kran. Kova penell o baro Devel, maro ray.

I romni o morshestar Ezekiel merell

¹⁵ Oun o baro Devel penas ap mande:

¹⁶ Tou, mensho, djiness, ap yek kopo lau touke ko menshes, kay touke o kamleder hi. Tou kress kek gole oun rovess gar! Kek sva venn dran tire yaka.

¹⁷ Čorrhanes nay leh phares dourho. Ma rob i bari golyah har yek pral yekeste rovell, kay meras! Rike tiro diklo troul tiro shero, oun ma rib tire kirrha vin! Ma čake tiri čor tele! Oun ma rha ko maro, hoy kolenge anlo vell, kay rovenn pral i mensheste, kay meras.

¹⁸ An i tsalla rakrom ap i menshende, oun ap i rat meras miri romni. Oun o vavar dives krom yaake, har o Devel mange penas.

¹⁹ Kote poučan i menshe mandar: “Hoske kreh tou kova? Hoy kamell kova menge penell?”

²⁰ Me penom ap lende: O baro Devel rakras mantsa oun penas: Pen ap o kheer Israel:

²¹ Kava penell o baro Devel, maro ray: Djinau, t'menge hi miro kheer o kamleder koova. Oun t'maro dji nashell pal leste. T'mer han pre-phourdo oun patsenn, kolenge, kay kote hi, nay djal kek čilačepen. Čačepah, me dau miro kheer kolenge an o vast, kay krenn les pale-čiddo. Oun t'mare morsh čave oun ča, kolen t'mer kote an Yerusalem pale moukan, kolla venn o rhareha moulo dino.

²² Palle krenn t'mer har me, o Ezekiel, krom: T'mare čora čakrenn gar tele, oun t'mer rhan kek maro, har kolla rhan, kay pral i mouleste rovenn.

²³ T'mare dikle moukenn troul t'mare sherya oun kirrha ap t'mare pire. T'mer denn gar gole oun rovenn gar. T'mer perenn an t'mende khetne, yaake baro hi i doosh ap t'mende. Oun mank t'mende lenn t'mer phares dourho.

²⁴ O Ezekiel hi i sikepen t'menge. Yaake har yob kras, krenn t'mer palle ninna. Ap ko dives, kay vell kova, djinenn oun hayvenn t'mer, te hom me o baro Devel, t'maro ray.

²⁵ Oun tou mensho, djiness, me krau ko zorelo kheer paash, kolestar yon patsenn, te vell i menshenge kote kek čilačepen, ko raylo kheer, pral koleste yon yaake barhtelo hi. Oun hoy yon boudeder kamenna har halauter, pal koleste lengre djia nashenn, lengre morsh čaven oun lengre čen, lau lendar krik.

²⁶ Ap ko dives, kay krau kova, vell yek pash toute, kay nay nashas peske, te penell lo kova touke.

²⁷ Ap ko dives vell tiro mouy pre kerdo, oun tou nay rakreh pale. Oun yaake vess tou lenge i sikepen. Palle dikenn oun hayvenn le, te hom me o baro Devel.