Ezekiel 22 - O Debleskro Lab 2024 (Sinte-Manouche)

O foro Yerusalem hi pherdo rateskri doosh oun vi-ladjedo koova

¹ Oun o baro Devel penas ap mande:

² Tou mensho, rake o čačepen vin! Ava, rake o čačepen vin pral o foro, hoy hi pherde marepangre! Sike leste peskro tselo djoungelo koova, hoy lo kras!

³ Pen: Kava penell o baro Devel, maro ray: T'mer, kay djivenn an o foro, maran boud menshen t'mendar oun kran t'menge rhorhene deblen, te van pale-čiddo o baro Debleske. T'maro tsiro hi koy!

⁴ Ko rateha kolendar, kay maran, anan t'mer doosh ap t'mende. Oun kol rhorhene deblen, hoy t'menge kran, kolentsa kran t'men pale-čiddo. Doleske vell ko dives sik, kay lenn t'mari phagi. T'maro tsiro hi trouyel. Doleske krau, te praasenn t'men i menshe dran vavar themma. Ap i tseli phoub san le pral t'mende.

⁵ Kolla, kay dour hi, oun kolla kay gar dour t'mendar djivenn, san pral t'mende. T'maro foro vell kharedo pale-čiddo foro. Kek rikrell pes ap čačepaskre laba.

⁶ I pralstoune pral Israel, kay djivenn an t'maro foro, krenn har te vals len yaake boud penepaske, te nay marenn le menshen.

⁷ Kolla, kay an Yerusalem djivenn, dikenn tele ap pengro dadeste oun ap pengri date, oun rhorhenn i vi-themaryen, kay pash lende djivenn. Oun kol djouvyen, kolengro rom meras, oun kol čaven, kolengro dad meras, kolen rikrenn le zoryah tele.

⁸ Kova, hoy mange kouč hi, hi t'menge či moldo. Oun an kol divessa, hoy mange hi, boudrenn t'mer.

⁹ Mank t'mende hi save menshe, kay rakrenn rhorhepen, te anenn le doosh ap vavarende, yaake te venn kolla maredo. Vavar t'mendar rhan o mass save firhendar, hoy i rhorhene deblenge maredo van, oun krenn vi-ladjedo koova mank t'mende:

¹⁰ Ko yek sovell peskro dadeskri romyah, i vavar sovell i djouvyah, kolat i djouvyakro koova hi, ninna te kamell li kova gar.

¹¹ Ko yek sovell i vavareskri romyah, oun ko vavar sovell peskro čaveskri romyah oun krell lat yaake pale-čiddo. Pale i vavar taprell zoryah peskri phenyat an, ko čat peskro dadestar.

¹² Hi save mank t'mende, kay moukan pen te playsrell, te marenn le yekes. Kolen, kay siyaan pash t'mende hi, kolendar lenn t'mer boudeder love pale, har patsan lenge. T'mer krenn t'men braveles ap i vavarende, kolen t'mer rhorhenn oun ap lende zoryah djan. Oun man, o baro Debles, t'maro rayes, bistran t'mer.

¹³ Me dau mire vasta khetne kol lovenge, hoy t'mer rhorhepah khetne anan, oun ko rateske kolendar, kay pash t'mende maredo van.

¹⁴ Čačepah, an kol divessa, kay djau khatar t'mende, ačenn t'mare djia gar zoreles, oun t'mer nay hadenn bouder gar t'mare vasta! Me, o baro Devel, rakrom, oun hoy penom, krau me ninna.

¹⁵ Me tradau t'men an vavar themma, mank vavar menshende. Oun lau o tselo pale-čiddo koova dran t'maro foro vin.

¹⁶ Oun glan i yaka kol vavar menshendar hi o foro Yerusalem i praasedo foro doleske, hoy t'mer kran. Oun palle dikenn oun hayvenn t'mer, te hom me o baro Devel.

O foro Yerusalem hi har i bob

¹⁷ Oun o baro Devel penas ap mande:

¹⁸ Tou, mensho, o kheer Israel vas mange bouder či moldo. I Israelitarya hi mange har koy čik, hoy pral ačell an o bob, te vas o roup an i yag djoudjo kerdo. Yon hi har koy čik dran saster, lolo saster, cinno oun blayo, hoy pral ačell.

¹⁹ Doleske penell t'menge o baro Devel, t'maro ray: T'mer halauter van mange har koy čik, hoy pral ačell an o bob. Doleske anau t'men halauter an o foro Yerusalem khetne.

²⁰ Yaake har o roup khetne o sasteha oun o blayo an o bob čiddo vell, oun i yag koy tel kerdo vell, te nashell kova har pani, yaake anau me t'men ninna khetne an Yerusalem. Kava foro vell t'menge har i bob, kay vell miri tati rholi ap t'mende.

²¹ Ava, me anau t'men khetne, oun moukau miri rholi ap t'mende zoreles te vell. Oun an miri tati rholi djal t'menge yaake, har te vans roup an i bob.

²² Yaake har o roup an o bob gar ačell hoy lo his, yaake djal t'menge, te vell o foro Yerusalem har i bob t'menge. Oun t'mer dikenn oun hayvenn palle, te hom me o baro Devel, kay čoras peskri rholi pral t'mende vin.

²³ Oun o baro Devel penas ap mande:

²⁴ Tou, mensho, pen ap o them Israel: Tou hal yaake pale-čiddo, te bičrap bouder kek brishin an ko tsiro, kay vell miri rholi ap toute.

²⁵ Tire raya hi mank toute har leve, kay denn gole, har dandrenn le firhen khetne. Yon marenn menshen, čorenn penge bravlepen khetne, oun krenn, te nashrenn boud romya an o them pengre romen.

²⁶ Tire rashaya rissrenn mire laba trouyel. Oun krenn kova pale-čiddo, hoy mange hi. Kova, hoy mange dino vas, hi lenge gar boudeder moldo har hako vavar koova. I vavar menshenge sikrenn le gar, hoy pale-čiddo oun hoy gar pale-čiddo hi. Oun yon pandenn pengre yaka, te venn o Debleskre divessa gar dren rikedo. Yaake krenn le, te vap me bouder gar sharedo.

²⁷ Tire pralstoune hi har divye djoukle, kay marenn, oun hi boklo pal rat. Yon marenn menshen, te lenn le lengro koova penge.

²⁸ Oun o Debleskre rakepangre čakrenn kolengro tselo čilačepen lače labentsa. Yon rakrenn pral čomone, hoy sikroms lenge. Oun me sikrom len či. Oun yon penenn rhorhepen glan-vi, oun penenn: “Kava penell o baro Devel, maro ray”, kay me lenge či penom.

²⁹ I menshe an Israel rhorhenn oun randenn vavaren. Yon rikrenn kolen tele, kay čorvelo hi, oun kolen gar doha djipaske hi. Ninna i vi-themaryen, kay mank lende djivenn, rikrenn le zoryah tele, oun denn len gar pengro čačepen.

³⁰ Oun me rodom i morshes mank lende, kay krals i massouri troul o foro pale neves. Rodom yekes, kay čivas pes pre glan mande kote, kay i barra vin phagedo van, oun rakrals mishto kol menshenge, te hounte marap len gar. Oun me hatsom kekes.

³¹ Doleske čorau miri rholi vin pral lende. Miri tati rholi vell pral lende har i yag, oun yon merenn. Yaake anau lengro čilačepen pale ap lengro shero. Kova penell o baro Devel, maro ray.