Ezekiel 21 - O Debleskro Lab 2024 (Sinte-Manouche)

I bari yag vell

¹ O baro Devel penas ap mande:

² Tou, mensho, dik kote, kay o kham pralstounes tardo hi. De o them trad, hoy kote hi! Oun pen ap o veesh an o them Negev, hoy ap leste vella.

³ Pen leske: Kava penell o baro Devel, maro ray: Shoun, hoy touke penau! Me krau i yag an toute, koya rhačrell hako rouk, hoy zenelo hi oun koles, hoy trouk hi. Kek nay krell koy yag vin. Koya djal doureder an o tselo them, yek rigyatar ap i vavar. Oun o tatepen rhačrell hakeneske peskro mouy.

⁴ Oun palle hayvell hakeno, te moukom me, o baro Devel, koy yag pre te rhačell, oun kek nay krell lat vin.

⁵ Oun me penom: Ah, baro Devel, miro ray! Yon penenn mandar: Kol laba, hoy kova rakrell, hi laba, hoy kek hayvell!

O Debleskro rharo činell mishto

⁶ Oun o baro Devel penas ap mande:

⁷ Tou, mensho, dik kote, kay o foro Yerusalem hi! Rake kolestar, hoy djal o khereske, kay vell o Devel an-mangedo! Oun pen i menshenge an o them Israel, hoy pral lende vella!

⁸ Pen lenge: Kava penell o baro Devel: Kanna sikrau les t'menge! Miro rharo lau dran peskri possita, oun marau t'men halauteren, i lačen har i čilačen.

⁹ Ava, miro rharo vell vin dran peskri possita, oun vell pral hakeneste an o them yek rigyatar ap i vavar, te venn i lačen har i čilačen maredo.

¹⁰ Palle dikell oun hayvell hakeno, te lom me, o baro Devel, miro rharo dran peskri possita, oun me čivau les gar pale pale koy.

¹¹ Oun tou mensho, dja banges oun le phares dourho! Ava, le phares dourho, har te phagals tiro dji! Kre kova glan i yaka i Israelendar!

¹² Oun te poučenn le toutar: Hoske le tou yaake phares dourho? Palle peness: Shounom djoungelo rakepen, hoy gomme vell. Koon kova shounell, koles taprell i bari daar. An leskre vasta hi bouder kek zoor. Leskro dji dell sik. I daryatar nay rikrell lo peskro pani gar. O tsiro hi kay, kova vell sik! Čačepah, kova vell, penell o baro Devel, maro ray.

¹³ Oun o baro Devel penas ap mande:

¹⁴ Tou, mensho, pen glan-vi, hoy vella! Pen lenge: Kava penell o baro Devel: Dik o rharo, o rharo, hoy lačes činell, oun djoudjo kerdo hi.

¹⁵ Mishto činell lo. te marell lo boud menshen. Oun djoudjo kerdo hi lo, yaake djoudjo har i blendari. Ma penenn: “Mer nay vah barhteles. Maro ray sal pral i tsele vavar rayende.”

¹⁶ Ko rharo vas djoudjo kerdo o kourepaske. Mishto činell lo, oun djoudjo hi lo har i blendari. Denn les o marepaskro an o vast!

¹⁷ De gole oun rob, tou mensho! Mire menshe hi, kolen o rharo marell. I pralstunen an Israel dell miro rharo moulo, oun lentsa khetne mire tsele menshen! Doleske de ap tiro beč o ropastar!

¹⁸ Me dikom, hoy an lengre djia hi. Har djal lenge, te vell o rharo ninna pral lengro rayeske, oun yob ačell gar djido? Kava penell o baro Devel, maro ray.

¹⁹ Oun tou mensho, de tire vasta pral toute khetne, oun pen lenge, hoy pral lende vella! O rharo dell tele ap lende: yek kopo, douy kope, triin kope! I marepaskro rharo hi lo, boud menshen marell lo, haki rigyatar vell lo ap lende,

²⁰ te taprell i menshen bari daar, oun boud merenn. Pash hake foreskre voudya venn menshe maredo o rhareha. Djoudjo har i blendari hi ko rharo. O marepaske hi lo kerdo.

²¹ Tou rharo, de dren ap i čači rig, oun ninna ap i servi rig, hako kopo glan toute, kote, kay hal!

²² Yaake kamau ninna me, o baro Devel, mire vasta khetne te dell i rholyatar. Oun pal kova hom bouder gar rhoyedo.

O rharo vell pral Yerusalem

²³ Oun o baro Devel penas ap mande:

²⁴ Tou mensho, čin i tikno kashteha douy dromma an i phoub. Oun sike yaake, ap havo drom nay vell o baro ray dran Babilonia peskro rhareha. Dran yek them djan kol douy dromma vin. Oun čip i sikepen kote, kay dran yek drom kol douy vin djan. Ko sikepen sikrell, an havo foro hako drom djal.

²⁵ Ko yek djal an o foro Rabba, kay i Ammonarya djivenn, ko vavar an o zorelo foro Yerusalem an o them Youda. Yaake sikreh tou kol dromma, ap kolende o baro ray nay vell peskre lourdentsa.

²⁶ Kote kay ko yek dromestar douy dromma vin djan, ačell lo o baro ray dran Babilonia tardo, te poučell lo i dourkepangren, hoy te krell. Yob vitsrell kashta ap i phoub, te dikell lo, har le perenn. Oun poučell peskre khereskre deblen. Oun yob dikell palla, har i bouko i maredo firhestar vin dikell.

²⁷ Ko sikepen sikrell ap i čači rig oun penell leske, te djal lo peskre lourdentsa an o foro Yerusalem. Kote denn le bari gole – i bari kourepaskri gole. Yon čivenn bare pesse roukengre kotya pash i voudya an o foreskri massouri, te denn le kolentsa i voudya dren. Ninna čivenn le čik pre vin troul i massouri, te nay djan le pral ap i massouri. Oun yon krenn turme, te denn le karye an o foro.

²⁸ I menshenge an o foro Yerusalem vell kova glan har i rhorheno dourkepen. O baro ray dran Babilonia krals lentsa vin, te krell lo lenge či, oun dals peskro vast koy pre. Kanna te vell yob pral lende, vell lenge an o shero, te rikran yon gar dren, hoy le leha vin kran. Oun yon venn tapedo.

²⁹ Doleske penell o baro Devel, maro ray: T'mari doosh vas diklo. T'mare čilače dromma van pre-čakedo. An halauter, hoy krenna, vell t'maro čilačepen diklo. T'mer kran, te vell t'mari doosh gar bistedo. Doleske venn tapedo i zorelo vasteha.

³⁰ Tou čilačo ray pral Israel, tou pale-čiddo! Tiro dives vas! Tiri doosh hi yaake baro, te vas ko tsiro, kay leh tiri phagi.

³¹ Me, o baro Devel, tiro ray, penau touke: Krik ko dikleha troul tiro shero! Le i rayeskri stadi tele! Či ačell har his. Kova, kay pral his, vell tele. Oun kova, kay tele his, vell pral!

³² An kotya dau o foro Yerusalem! Paash, paash krau me les. Kava vell gar, bis te vell ko morsh, koles vi-rodom, te dell lo o foro peskri phagi. An leskro vast dau o foro.

O rharo vell pral o them Ammon

³³ Tou, mensho, de kol menshen an o them Ammon trad, oun pen: Kava penell o baro Devel, maro ray, pral i Ammonarya kay pral o Israel san. Pen lenge: Dik o rharo! O rharo vas vin lino dran peskri possita, te marell lo boud menshen. Djoudjo kerdo hi lo o marepaske. Djoudjo har i blendari hi lo.

³⁴ O rharo činell i pale-čidde oun čilače menshenge lengre sherya tele. Lengro dives vas. Lengri doosh vas yaake baro, te vas ko tsiro, kay lenn le pengri phagi. Kova, hoy le pral o rharo an i dikepen dikan, hi rhorhepen. Kova, hoy lenge glan-vi penlo vas, hi ninna rhorhepen.

I Babilonarya lenn pengri phagi

³⁵ Čip tiro rharo pale an peskri possita! An o them, kay tou boldo val, an ko them kay khere hal, kote dau tout tiri phagi.

³⁶ Me čorau miri rholi vin ap toute, miri tati rholi vell zoreles pral toute. Oun me dau tout an i vasta divye menshendar, kay hayvenn har te marenn le.

³⁷ An i yag veh rhačedo. An tiro them nashell tiro rat. Oun tou veh bistedo. Kava penau me, o baro Devel.