Ezekiel 19 - O Debleskro Lab 2024 (Sinte-Manouche)I ropaskri gili pral i rayende dran o kheer Israel 1 O baro Devel penas mange: Tou, gib i ropaskri gili pral i rayende dran o kheer Israel. 2 Oun pen: Havi rayli levetsa his tiri day! Mashkral terne leve his li čiddo, oun tserdas peskre čaven baro. 3 Oun yek lendar, hoy tserdas li pre, vas i terno zorelo levo, Leske sikras li, har te dandrell lo firhen moulo, oun ninna menshen rhas lo pre. 4 Har i menshe an vavar themma lestar shounan, tapran le les an pengri grouba, oun tserdan les shellentsa an o them Egiptia. 5 Oun i day louras, te vell lo pale. Har dikas li, te louras li čičeske, oun yob bouder gar pale vas, kote las li i vavares peskre čavendar oun tserdas les baro. 6 Kova djivas mank i vavar leve, vas i zorelo terno levo, oun djinas, har te dandrell lo firhen moulo, oun ninna menshen rhas lo. 7 An forya oun zorele khera phagas lo dren, oun kras len paash; mouklo ačenn le čiddo. Oun i menshe an ko them daran oun trissan, har das lo gole. 8 Kote čivan pen i menshe dran i themma koy trouyel, khetne, te djan le ap leste. Oun vitsran pengri netsa pral leste, oun tapran les an lengri grouba. 9 Oun yon čivan leske i goustri an o nak oun i kasht troul leskri meen, oun anan les pash o rayeste an o them Babilonia. Oun kote čivan le les an o stilepen, te vas leskri gole bouder gar shounlo ap i berge an Israel. 10 Tiri day his har i drakengro rouk, hoy vas pash o pani an i phoub čiddo. Oun har les yaake boud pani his, hidjras lo boud drake, oun boud zenele kashta his ap leste. 11 Oun kolla van yaake zorelo, te nay krans le rayengre kashta dran lende. Ko bour vas baro, bareder har kol vavar rouka troul leste. Hakeno nay dikas, har zorelo yob his, oun har boud zenele kashta les his. 12 Koy vas i rhoyedo vast, oun tserdas les vin dran i phoub, oun vitsras les tele. Oun i tato dourho, hoy vas foun kotar, kay o kham pre djal, moukas leskre drake trouk te vell. Leskre zorele kashta van tele phagedo, te meran le tele oun van an i yag rhačedo. 13 Kanna hi ko drakengro rouk an i moulo tato them tardo, kay kek pani hi. 14 Oun i yag djas vin dran leskro pesseder kasht, oun rhačras leskre drake. Kek zorelo kasht ačas bouder pral, kolestar nay vals i rayeskro kasht kerdo. Kava hi i ropaskri gili. Koya vas givedo kolendar, kolengro dji rovas. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.