Ezekiel 18 - O Debleskro Lab 2024 (Sinte-Manouche)

O Devel dell kekes i phagi koleske, hoy leskre phoure kran

¹ Oun o baro Devel penas ap mande:

² Hoske penenn t'mer an o them Israel kava lab: I phoure rhan shoutle drake, oun i ternenge doukenn i danda.

³ Me, o baro Devel, dau man sovel: Yaake har čačo hi, kay djivau, yaake vell savo lab t'mendar an o them Israel bouder gar rakedo!

⁴ Djinenn, man hi o djipen hakenestar an miro vast – o dadeskro djipen yaake har o čaveskro djipen. Kokres kova, kay anell doosh ap peste, hounte merell.

⁵ I morsh, kay djivell an o čačepen oun krell, hoy mishto oun čačo hi,

⁶ kova rhal či ko massestar, hoy i rhorhene deblenge dino vas. Yob mangell gar i rhorhene deblen an, kolen i Israelitarya an-mangenn, oun djal gar i vavareskri romyah, oun sovell gar i djouvyah an ko tsiro, kay lat peskro koova hi.

⁷ Yob rikrell kekes zoryah tele. Te patsas lo love vin, dell lo kova pale, hoy das les ko čorvelo ko tsireske, kay les siyaan pash leste hi. Yob lell kekestar čomone zoryah peske. Peskro maro dell lo koles, kones bok hi, ninna koola koles, kay kek an-ripaske hi.

⁸ Te patsas lo love vin, lell lo peske gar boudeder love pale. Yob rikrell peskro vast pale, te krell lo kek čilačepen. Oun an i čingepen dell lo yak, te lell hakeno peskro čačepen.

⁹ Yob krell, hoy lestar kamau, oun djivell pal miro čačepen. Savo menshes hi kek doosh ap peste. Yob ačell djido. Kova penau me, o baro Devel, t'maro ray.

¹⁰ Hoy djal, te vell leske i morsh čavo boldo? Oun kova hi i či-moldo, kay dell i vavares moulo, oun krell ko tselo koova,

¹¹ hoy leskro dad gar kras. Oun rhal ko massestar, hoy i rhorhene deblen dino vas, oun djal i vavareskri romyah,

¹² oun rikrell i čorvelen zoryah tele, ninna kolen, kolen gar doha djipaske hi, oun lell zoryah peske, hoy gar leskro hi. Te patsas lo love vin, dell lo kova gar pale, hoy das les ko čorvelo ko tsireske, kay les siyaan pash leste hi. Oun yob mangell i rhorhene deblen an, oun krell, hoy glan o Debleske yaka djoungeles hi.

¹³ Te patsell lo love vin, lell lo peske boudeder love pale. Nay ačell savo mensho djido? Na-a! Koon savo djoungelo koova kras, hounte merell. Yob hounte lell peskri phagi!

¹⁴ Hoy djal, te vell koleske i morsh čavo boldo, oun kova dikell ko tselo čilačo koova, hoy leskro dad kras? Oun ninna te dikell lo kova, krell yob kova gar.

¹⁵ Yob mangell gar kol rhorhene deblen an, hoy i Israelitarya an-mangenn, oun rhal gar o massestar, hoy lenge dino vas. I vavareskri romyah djal lo gar.

¹⁶ Kekes rikrell lo zoryah tele. Te hi yekes siyaan pash leste, mangell lo lestar či ko tsireske, kay koles siyaan pash leste hi. Yob lell gar zoryah peske, hoy o vavares hi. Oun dell kolen maro, kolen bok hi, oun koola kolen, kolen či an-ripaske hi.

¹⁷ Yob rikrell peskro vast pale, te krell lo kek čilačepen. Te patsas lo love vin, lell lo gar boudeder love pale. Yaake djivell lo pal miro čačepen oun krell, hoy lestar kamau. Savo mensho hounte merell gar. Yob ačell djido, ninna te las leskro dad boud doosh ap peste.

¹⁸ Leskro dad, kova, kay rhorhras i vavaren, oun las peske zoryah, hoy i vavares hi, oun kras vavar čilačo koova mank peskre menshende, kova hounte merell ko tselo čilačepaske, hoy lo kras.

¹⁹ T'mer poučenn: “Hoske hidjrell ko čavo gar i doosh peskro dadestar?” Me penau t'menge: O čavo kras, hoy mishto oun čačo his, oun rikras halauter, hoy lestar kamom. Doleske ačell yob djido.

²⁰ Kokres kova, kay doosh ap peste anell, hounte merell. I čavo hounte hidjrell gar i doosh peskro dadestar. Vitar gar hounte hidjrell o dad koy doosh, hoy o čavo ap peste anas. Kova, kay o čačepen kras, ap leste vell leskro čačepen pale. Oun kova, kay doosh ap peste anas, ap leste vell leskri doosh pale.

²¹ I čilačo, kay moukell peskro čilačo drom, oun ko tselo čilačo koova, hoy lo kras, oun krell kanna, hoy lestar kamau, oun hoy mishto oun čačo hi, savo hounte merell gar.

²² Ko tselo čilačo koova, hoy lo kras, vell bistedo! Dran ko lačo oun čačo koova, hoy lo kanna krell, ačell lo djido.

²³ Patsenn t'mer, an mire yaka vals mishto, te merell kova, kay čilačo koova kras? poučell o baro Devel, maro ray. Na-a, an mire yaka hi shoukar, te moukell lo peskro čilačo drom oun ačell djido.

²⁴ I lačo morsh, te moukell yob peskro lačo drom, oun krell kanna o čilačepen, oun ko tselo djoungelo koova, hoy ko čilačo kras, ačell lo djido? Na-a! Ko tselo lačo oun čačo koova, hoy lo kras, vell bistedo. Yob moukas o Debleskro drom oun anas doosh ap peste. Doleske hounte merell lo.

²⁵ T'mer penenn: O Devel djal gar pal o čačepen. Shounenn, t'mer dran o kheer Israel! Djau me gar pal o čačepen? Hi gar yaake, te han t'mer kolla, kay djan gar pal o čačepen?

²⁶ Te djal i lačo mensho peskro čačo dromestar tele, oun krell o čilačepen, hounte merell lo. Dran peskro čilačepen, hoy lo kras, hounte merell lo.

²⁷ I čilačo, kay djas tele peskro čilačo dromestar, oun djivell bouder gar an o čilačepen, oun krell kanna hoy mishto oun čačo hi, kova ačell djido.

²⁸ Yob dikas peskri tseli doosh dren, hoy lo ap peste anas, oun moukas peskro čilačo drom, doleske ačell lo djido oun hounte merell gar.

²⁹ Oun kote penenn t'mer Israelitarya: “O Devel djal gar pal o čačepen.” Hom me kova, kay djal gar pal o čačepen? Hi gar yaake, te han t'mer kolla, kay djan gar pal o čačepen?

³⁰ Doleske penau me, o baro Devel, t'maro ray: Me krau o čačepen vin pral t'mende dran o kheer Israel – pral hakeneste, yaake har djivas lo. Moukenn t'maro čilačo drom! Krenn bouder gar ko tselo čilačo koova, hoy kran, te anenn kek doosh ap t'mende.

³¹ Moukenn t'mare čilače dromma! Oun lenn t'menge i nevo dji oun i nevo dourho! Hoske kamenn t'mer te merell, t'mer dran o kheer Israel?

³² Mange hi gar shoukar, te hounte merell yek, penell o baro Devel, maro ray. Doleske moukenn t'mare čilače dromma, oun djivenn!