Ezekiel 14 - O Debleskro Lab 2024 (Sinte-Manouche)

O Devel kamell, te moukenn i Israelitarya pengre rhorhene deblen

¹ Oun pash mande van morsha i phourendar dran Israel, oun yon beshan pen glan mande tele.

² Koy penas o baro Devel ap mande:

³ Tou, mensho, kal morsha rikran ap pengre rhorhene deblen, oun čivan len pre glan pende, kolen, kay anenn len ap o čilačo drom. Hoske moukap man savendar te poučell?

⁴ Pen lenge: Kava penell o baro Devel, maro ray: Hakeno dran o kheer Israel, kay kras peskro dji pre peskre rhorhene deblenge, oun čivas len pre glan peste, kolen, kay anenn les ap o čilačo drom, oun vell palle pash miro rakepaskro, te poučell lo mandar čomone, koleha rakrau me, o baro Devel, yaake, har hounte vell rakedo yekeha, kay boud rhorhene deblen an-mangell.

⁵ Yaake krau, te krenn i Israelitarya pengre djia pale mange pre, yon, kay moukan miro drom oun mangenn vavar deblen an.

⁶ Doleske pen ap o kheer Israel: Kava penell o baro Devel, maro ray: Djan tele t'maro čilačo dromestar, oun moukenn t'mare rhorhene deblen, hoy yaake djoungelo an mire yaka hi!

⁷ Hako Israelitari, oun hako vi-themari pash t'mende, kay mange o doumo sikrell, oun peskro dji i rhorhene deblenge pre krell, oun len glan peste čivell, kolen, kay anenn les ap o čilačo drom, oun vell palle pash miro rakepaskro, te poučell lo mandar čomone, koleha rakrau me, o baro Devel, kokres.

⁸ Me dikau čilačes ap leste. Oun ap leste dikenn i menshe, hoy saveha djal, kay savo koova krell, oun yon rakrenn lestar i rah tsiro. Me krau les pale-čiddo hako tsireske, te nay djivell lo bouder gar mank mire menshende. Yaake dikenn oun hayvenn t'mer, te hom me o baro Devel.

⁹ Te moukell pes i Debleskro rakepaskro yaake dour te anell, te dell lo les i lab mandar doureder, palle krau me, o baro Devel, te dell lo i rhorheno lab doureder. Oun me hadau miro vast pral leste, oun krau les pale-čiddo, te djivell lo bouder gar mank mire menshende Israel.

¹⁰ Yaake hounte hidjrenn kol douy pengri doosh: Kova, kay poučas, oun ko Debleskro rakepaskro.

¹¹ Kova krau, te perell o kheer Israel gar bouder mandar tele, oun krell pes bouder gar pale-čiddo dran ko tseli doosh, hoy le ap pende anenn. Oun yon venn mire menshe, oun me vau lengro Devel, penell o baro Devel, maro ray.

I phagi vell pral Yerusalem

¹² Oun o baro Devel penas ap mande:

¹³ Tou, mensho, djiness, te phagenn i menshe an yek them mantsa, oun rikrenn bouder gar ap mande, dau me len i phagi. Oun krau, te hi len bouder gar doha maro. Oun bičrau i bok an o them, te merenn i menshe oun i firhe i bokatar.

¹⁴ Ninna te vans kal triin morsha an ko them, o Noah, o Daniel oun o Hiob, palle lans yon kokres pengro djipen dran o merepen vin, kek vavar lentsa. Yon djivan an o čačepen. Doleske loms len kokres dran o merepen vin. Kava penau me o baro Devel, t'maro ray.

¹⁵ Te anoms divye firhen an o them, kay marenn kolen, kay kote djivenn, oun o tselo them vals i moulo them, kay kek bouder ap o drom hi i daryatar kol divye firhendar,

¹⁶ oun kal triin morsha vans ninna an ko them, nay lans le kokres pengro djipen dran o merepen vin, oun gar lengre čaven oun čen. Oun o them vals i moulo them. Yaake dau man sovel pash miro djipen, penell o baro Devel, maro ray.

¹⁷ Te moukoms me i kourepen vin te phagell an ko them, oun moukoms menshen oun firhen kote moulo te dell,

¹⁸ oun kal triin morsha vans an ko them, nay lans le kokres pengro djipen dran o merepen vin, oun gar lengre čaven oun čen. Yaake dau man sovel pash miro djipen, penell o baro Devel, maro ray.

¹⁹ Te bičroms i pharo nasslepen an ko them, oun moukoms an miri tati rholi menshen oun firhen te merell,

²⁰ oun o Noah, o Daniel oun o Hiob vans ninna an ko them, palle lans le gar pengre čaven oun čen dran o merepen vin. Kokres pengro djipen nay lans le dran o merepen vin doleske, kay djivan yon an o čačepen. Yaake dau man sovel pash miro djipen, penell o baro Devel, maro ray.

²¹ Oun kanna penell o baro Devel, maro ray: Ap ko tsiro, kay bičrau star phare dava pral ko foro Yerusalem – kourepen, bok, divye firhe oun pharo nasslepen, – te merenn i menshe oun firhe koy dren,

²² palle hi save koy, kay ačenn djido lendar. Kolla venn khetne pengre čaventsa oun čentsa vin anlo pash t'mende an o them Babilonia. Te dikenn t'mer palle, har yon djivenn, oun hoy le krenn, vell t'mari douk pral koy bari bibarht tikneder, hoy anom pral o foro Yerusalem.

²³ Te dikenn t'mer, har le djivenn, oun hoy le krenn, hayvenn t'mer, hoske me kova yaake o foreha Yerusalem hounte krom. Oun t'mari douk koy pral vell krik lino dran t'mare djia. Kova penau me, o baro Devel, t'maro ray.