Ezekiel 13 - O Debleskro Lab 2024 (Sinte-Manouche)

O Debleskre rhorhene rakepangre lenn pengri phagi

¹ O baro Devel penas ap mande:

² Tou, mensho, de kolen an Israel trad, kay denn glan, te hi le mire rakepangre, oun rakrenn dran pende vin, oun penenn Kava lab vell o Deblestar. Pen lenge: Shounenn, hoy o baro Devel penell t'menge!

³ Kava penell o baro Devel, maro ray: Bibarht vell ap kol čilače rakepangre, kay penenn glan-vi, hoy dran lengro dji vella, oun kolen kek dikepen dikan, hoy mandar vas!

⁴ T'mer Israelitarya, kolla, kay penenn, te hi le t'maro Debleskre rakepangre, hi har divye djoukle, kay rodenn rhapen mank i barra o tele-phagedo forestar.

⁵ Yon čivan pen gar pre an koy rheb, kay i barra vin phagedo van, oun kran kek massouri troul o kheer Israel, te ačans le zoreles tardo an o kourepen ap ko dives, kay o baro Devel o čačepen vin krell pral lende.

⁶ Lengro dikepen hi či-moldo. Oun lengro dourkepen hi rhorhepen. Ninna te bičras len gar o baro Devel, penenn le Yaake penas o baro Devel, oun lourenn pre, te vell kova, hoy yon glan-vi penan.

⁷ Me penau lenge: T'maro dikepen hi či-moldo. Oun t'maro dourkepen hi rhorhepen. Har nay penenn t'mer: “Kava penell o baro Devel”, kay me či rakrom?

⁸ Doleske penell o baro Devel, maro ray: T'mer rakrenn, hoy gar čačo hi, oun penenn glan-vi, hoy rhorhepen hi, doleske vau me pral t'mende, penell o baro Devel, maro ray.

⁹ Miro vast vell pral kol rakepangre, kay penenn glan-vi, hoy gar čačo hi, oun kay dourkrenn rhorhepen, te dap len i phagi. An o tsillo, kay mire menshe khetne venn, nay venn yon gar dren. Oun an o liil, kay i laba i menshendar dran Israel dren činlo hi, venn lengre laba gar dren činlo. Oun an o them Israel venn le gar palpale. Palle dikenn oun hayvenn t'mer, te hom me o baro Devel, t'maro ray.

¹⁰ Yon anenn mire menshen o čačo dromestar tele, oun penenn: “Lauter hi mishto.” Oun čačepah, či hi mishto. Mire menshe kran pen i massouri dran barra, hoy rikrenn gar. Oun i rakepangre van, oun makan lat parnes.

¹¹ Pen kolenge, kay makenn parnepen koy pral: “Kay massouri perell khetne!” I zorelo brishin vell, oun brishineskre barra perenn, oun i zorelo dourho phourdell.

¹² Koy perell koy massouri khetne. Palle poučenn le t'mendar: Kay hi ko shoukar parnepen, hoy makan ap koy massouri?

¹³ Kava penell o baro Devel, maro ray: An miri tati rholi moukau me i zorelo dourho vin te phagell, oun i zorelo brishin te vell, oun brishineskre barra te perell, te vell i massouri paash dino.

¹⁴ Yaake phagau koy massouri tele, hoy t'mer parnes makan. Me moukau lat trouyel te vitsrell, te venn lakre telstoune barra diklo. Te perell li khetne, perenn i barra ap t'mende, oun t'mer merenn. Oun t'mer dikenn oun hayvenn, te hom me o baro Devel.

¹⁵ Te vas miri tseli rholi ap koy massouri oun ap kolende, kay kran lat parno, penau ap t'mende: Koy massouri hi bouder gar koy, vitar gar kolla, kay lat parnes makan.

¹⁶ Kolla hi i rakepangre an o them Israel, kay dan glan, te vals len i lab o Deblestar oun penan i menshenge an Yerusalem glan-vi “lauter hi mishto”, ninna te hi či mishto. Kova penau me, o baro Devel, t'maro ray.

¹⁷ Tou mensho, pen ap i djouvyende tire menshendar, kay denn glan, te hi le Debleskre rakepangre! De len trad,

¹⁸ oun pen lenge: Kava penell o baro Devel, maro ray: Bibarht vell ap t'mende! T'mer sivenn dourkepangre dikle, hoy venn pandlo troul i moussya oun troul i sherya hakenestar, i ternendar oun i phourendar, te vell t'men zoor pral lende. Kamenn t'mer vavar menshen an o merepen te anell, oun t'mer kokres djido ačenn?

¹⁹ T'maro dourkepah anenn t'mer ladj ap mande glan mire menshende, te lenn i vast pherdo djob oun i kotar maro. Mire menshenge penenn t'mer rhorhene laba. Oun yon kamenn te shounell ap rhorhepen. T'maro rhorhepah anenn t'mer save menshen an o merepen, kay hounte merans gar, oun krenn, te ačenn save djido, kay hounte merans.

²⁰ Doleske penell o baro Devel, maro ray: Me krau t'mare dourkepangre dikle paash, kolentsa taprenn t'mer menshen har te vans le čirkle. Kal dikle tserdau t'mare moussyendar tele. Oun lau kol menshen vin, kolen t'mer tapran, har te vans le čirkle.

²¹ Oun kol dikle, hoy čivan troul t'mare sherya, tserdau krik. Oun lau mire menshen dran t'maro vast vin, te nay taprenn len bouder gar. Palle dikenn oun hayvenn t'mer, te hom me o baro Devel.

²² T'mare rhorhene labentsa doukran i djia kolendar, kay an o čačepen djivenn, oun kolenge kamom kek daar te krell. Oun t'mer kran i vasta kolendar zorelo, kay čilačo koova krenn. Yaake kran t'mer, te djan le gar tele lengro čilačo dromestar, te ačenn le djido.

²³ Doleske krau, te penenn nay bouder gar rhorhepen glan-vi, vitar gar nay dourkrenna! Na-a, me kamau mire menshen dran t'mare vasta vin te lell. Oun t'mer dikenn oun hayvenn palle, te hom me o baro Devel!