Ezekiel 12 - O Debleskro Lab 2024 (Sinte-Manouche)

O Ezekiel vell i sikepen kolenge, kay hounte djan an o pandepen

¹ Oun o baro Devel penas ap mande:

² Tou, mensho, djiveh mank save menshende, kay moukenn pen či te penell. Kolen hi yaka, te dikenn le, oun kamenn či te dikell. Oun len hi kanda, te shounenn le, oun kamenn gar te shounell. Yon moukenn pen či te penell.

³ Tou mensho, le tire koola khetne, har te vals yek, kay hounte djal an o pandepen. Oun kre tout pral o dives ap o drom, te nay dikenn kova halauter. Glan lengre yaka djas tou kote vin, kay khere hals, oun djas ap i vavar platsa. Yaake te nay vals, te djal lenge i yaka pre – kolenge, kay moukenn pen či te penell.

⁴ Ap o dives hidje ko koova hoy touha leh vin dran o kheer, te hounte dikenn le les. Oun rati dja vin glan lengre yaka, yaake har yek vin djal, kay djal an o pandepen.

⁵ Glan lengre yaka phage barra dran i massouri vin, oun hidje tiro koova koy vin.

⁶ Glan lengre yaka le halauter ap tiri phik! Oun har tamlo vas, dja vin! Oun čip i diklo troul tire yaka, yaake te dikess gar o them, hoy moukeh. Kamau, te vess i sikepen i Israelenge, hoy sikrell lende, har dau len trad.

⁷ Oun me krom yaake, har mange penlo vas. Miro koova hidjrom pral o dives yaake vin, har yek, hoy hounte moukell peskro them. Oun har rati vas, phagom barra vin dran i massouri mire vastentsa. Oun har tamlo vas hidjrom halauter koy vin, lom les ap miri phik, oun djom mange glan lengre yaka.

⁸ Oun sik o vavar dives penas o baro Devel ap mande:

⁹ Tou, mensho, shounal, hoy penan i Israelitarya. Kal menshe, kay moukenn pen či te penell, poučan toutar: “Hoy kreh tou koy?”

¹⁰ Pen lenge: O baro Devel, miro ray, rakras mantsa. Kova hoy lo mange penas, te penap t'menge doureder, hi i pralstunenge an o foro Yerusalem oun i tsele Israelenge, kay kote djivenn.

¹¹ Ap kova, hoy krom, nay dikenn le, har lenge djal. Me hom lenge i sikepen: Yon hounte djan penge oun venn pandles krik anlo.

¹² Oun o ray pral lende lell peskro koova ap i phik oun djal vin an o tamlepen. Oun yon phagenn barra vin dran i massouri, te hidjrell lo peskro koova kote vin. Troul peskre yaka pandell lo i diklo, te dikell lo gar o them.

¹³ Me, o baro Devel, vitsrau miri netsa pral leste vin, te vell lo tapedo an mire dorya. Oun pandles vell lo an o them anlo, kay i Babilonarya djivenn. Ko them nay dikell lo gar. Oun kote merell lo.

¹⁴ Oun i tsele menshe, kay troul leste trouyel hi, kolla, kay pash leste rikrenn, oun leskre lourde, kolen tradau me ap hake rigya. Oun o rharo lell len palla.

¹⁵ Palle, te tradom len an vavar themma oun mank vavar menshende, dikenn oun hayvenn le, te hom me o baro Devel.

¹⁶ O rharo, i bok oun i pharo nasslepen marenn boud lendar. Gar boud lendar moukau djido. Kolla nay penenn kol menshenge, pash lende yon djivenn, havo djoungelo koova i Israelitarya kran. Yaake dikenn oun hayvenn kolla ninna, te hom me o baro Devel.

¹⁷ Oun o baro Devel penas ap mande:

¹⁸ Tou, mensho, rha tiro maro trisslepah! Oun an daar oun trisslepen piyess tiro pani.

¹⁹ Oun pen ap i Israelitarya, kay hi pash toute an kava them: Kava penell o baro Devel, maro ray, pral kolende, kay djivenn an o foro Yerusalem an o them Israel: Boud čilačo koova krenn le: Yek rikrell o vavares tele. Doleske vell ko dives, kay rhan le pengro maro daryah, oun piyenn pengro pani trisslepah i trashatar. Lengro them vell i mouklo them, kay či ačell.

²⁰ An kol forya djivell bouder kek. Oun o harhetikro them vell i moulo them. Palle dikenn oun hayvenn t'mer, te hom me o baro Devel.

Kova, hoy o Devel glan-vi penas, vell čačo

²¹ Oun o baro Devel penas ap mande:

²² Tou mensho, pen mange, havo rakepen hi kova, hoy t'mer rakrenn an o them Israel? T'mer penenn: O tsiro djal trouyel oun či vell kolestar, hoy o Debleskre rakepangre penan.

²³ Doleske pen ap lende: Kava penell o baro Devel, maro ray: Me sikrau lende, te hi kova gar čačo. Oun krau, te vell ko rakepen gar bouder rakedo an o them Israel. Pen lenge: O tsiro vell sik, kay vell lauter čačo hoy glan-vi penlo vas.

²⁴ Palle dikell kek mank i Israelitarya čomone glan-vi, hoy či-moldo hi. Vitar kek penell laba glan-vi, hoy i menshe kamenn te shounell, oun hoy venn gar o Deblestar.

²⁵ Me, o baro Devel, penau ap t'mende! Kova, hoy me rakrau, vell ninna, oun vell an i tikno tsiro. T'menge, kay moukenn t'men či te penell, penau me: Yaake rah har t'mer djivenn, krau, te vell čačo, hoy penom. Kava penau me, o baro Devel, t'maro ray.

²⁶ Oun pale penas o baro Devel ap mande:

²⁷ Tou, mensho, shoun, hoy penell o kheer Israel pral toute: “Ko dikepen, hoy kova dikell, kova vell gar sik. Oun kova, hoy lo glan-vi penell, hi i tsireske, hoy gomme dour krik hi.”

²⁸ Doleske pen lenge: Kava penell o baro Devel, miro ray: Kova, hoy penom, vell sik. Ko lab hoy me rakrom, vell čačo. Kova penau me, o baro Devel, t'maro ray.