Ezekiel 10 - O Debleskro Lab 2024 (Sinte-Manouche)

O Debleskro raylepen djal vin dran o Debleskro kheer

¹ Oun me dikom ap ko bolepen, hoy his pral i sherya foun i bolepangre, oun dikom čomone yaake blaueto har ko kouč blaueto bar, hoy kharell Safiro. Kova dikas vin har i rayeskri beshepaskri.

² Oun o baro Devel penas ap ko morsheste, kay his rido an layntikro than: Dja mashkral kol rade tel i bolepangre, oun le tire vasta pherdo yagengro kasht, hoy rhačell, oun mashkral kol bolepangre hi. Oun vitse les pral o foro vin. Oun ko morsh djas glan mire yaka mank kol rade.

³ Oun har lo kote dren djas, his kol bolepangre tardo ap i čači rig o Debleskro kherestar. Oun i folka kras koy tikni platsa glan o Debleskro kheer pherdo.

⁴ Oun o baro Debleskro raylepen, hoy his pral kol bolepangren, hadas pes foun kotar, oun djas pash o kheer, kote kay o voudar hi. Oun o tselo kheer vas pherdo foun koy folka, oun i glanstouni platsa his pherdo o baro Debleskro raylepen.

⁵ Oun kol čirklengre moussya foun kol bolepangre kran yaake bari gole, har te rakrell o zorelo Devel. Oun me shounom lat ninna an koy bari glanstouni platsa.

⁶ Oun har penas o baro Devel ko morsheske, kay his rido an layntikro than, te djal lo mank i rade oun mank i bolepangre, te lell lo yag, djas ko morsh mank lende oun ačas tardo pash yek rada.

⁷ Kote čivas yek kol bolepangrendar peskro vast vin, oun las koy yagatar, hoy mashkral kol bolepangre his, oun das lat an i vasta ko morshestar, kay his rido an layntikro than. Oun kova las koy yag oun djas vin.

⁸ Oun tel lengre čirklengre moussya his i bolepangren čomone har vin dikas har i mensheskre vasta.

⁹ Oun me dikom star rade tardo pash i bolepangre, pash hako bolepaskro his yek rada. Oun kol rade dikan zenelo vin har i kouč zenelo bar.

¹⁰ Yek rada dikas vin har i vavar. Oun yon his yaake kerdo, har te vell yek rada an i vavar dren.

¹¹ Te djan le, nay djan le ap hake star rigya. Oun yon rissran pen gar trouyel. Kote, kay i glanstouni djas, ap koy rig djan i vavar ninna. Oun yon rissran pen gar trouyel.

¹² Oun halauter lendar, o doumo, i vasta, i čirklengre moussya oun lengre rade his pherde yaka ap haki rig. Oun hakenes his peskri rada.

¹³ Oun me shounom, har van i rade kharedo tradede rade.

¹⁴ Oun hakenes kol bolepangrendar his i shero, kay his ap hake star rigya yaka oun i mouy. Ap i glanstouni rig dikas lo vin har i bolepaskro, ap i douyti rig har i mensho, ap i triinti rig har i levo, ap i starti rig har i adlari.

¹⁵ Oun kol bolepangre hadan pen. Kolla his kol emlige bolepangre har dikom, har homs pash o lengsto pani Kebar.

¹⁶ Te djan kol bolepangre, palle djan ninna kol rade pentsa. Oun te kran le pengre čirklengre moussya pre oun bourhlo, te hadenn le pen pre i phoubyatar, palle ačan ninna i rade ap lengri rig.

¹⁷ Te ačan yon tardo, palle ačan yon ninna tardo. Oun te hadan le pen pre i phoubyatar, hadan yon pen ninna. I rade kran, hoy i bolepangre kaman.

¹⁸ Oun o baro Debleskro raylepen, hoy his pash o voudar o kherestar, djas pale krik oun hadas pes pral kol bolepangre.

¹⁹ Oun kol bolepangre kran pengre čirklengre moussya bourhlo, oun hadan pen pre i phoubyatar glan mire yaka. Oun har djan le vin, his kol rade ap lengre rigya. Oun i bolepangre čivan pen pash ko voudar o baro Debleskro kherestar, hoy ap koy rig hi, kay o kham pre djal. Oun o raylepen o Israeleskro Deblestar his pral lende.

²⁰ Kolla his kol bolepangre, hoy dikom me tel o Israeleskro Debleste, har homs pash ko lengsto pani Kebar. Oun me hayvom, te his kolla Keroubim.

²¹ Hakenes lendar his yaka oun i mouy ap hake star rigya leskro sherestar. Oun hakenes his star čirklengre moussya, oun tel kol čirklengre moussya har vals len menshengre vasta.

²² Oun lengre sherya his yaake har dikom me len, har homs pash ko pani Kebar. Oun yon djan khetne ap hake rigya, har kaman le. Hakeno dikas glan peste.