Ezekiel 1 - O Debleskro Lab 2024 (Sinte-Manouche)

O Ezekiel dikell o Debleskro raylepen

¹ An o 30. (triin-deshto) bersh djivom khetne vavar menshentsa, kay pandles krik anlo van, pash ko lengsto pani, hoy kharell Kebar. An o starto čon ap o pančto dives an ko bersh djas o bolepen pre, oun o baro Devel sikras pes mande.

² Kova his o pančto bersh, har vas o baro ray Yoyakin pandles krik anlo an o them Babilonia.

³ Kote an o them Babilonia pash o lengsto pani Kebar rakras o baro Devel ap mande, oun leskri zoor vas pral mande. Me hom o Ezekiel. Miro dad hi o rashay, o Bouzi.

⁴ Oun me dikom i baro zorelo phourdepen, hoy vas foun kotar kay norden hi, oun tradas i bari folka glan peste. Oun yag vas vin, hoy pre oun tele djas. Oun o bolepen koy trouyel his shoukar har o kham. Oun mashkral dren his čomone, hoy dikas vin har sonakay, hoy an i yag thodo vell.

⁵ Oun kote dren dikom star bolepangre, hoy vin dikan har menshe.

⁶ Hakenes lendar his star čirklengre moussya oun i shero, kay ap hake star rigya i mouy oun yaka his.

⁷ Yon his tardo har menshe. Oun lengre pire his har groumyengre pire. Kolla his har lolo saster, hoy an i yag thodo vell.

⁸ Ap lengre star rigya his len menshengre vasta tel lengre čirklengre moussya, tel haki čirklengri moussi yek vast. Hakenes kol starendar his yaka oun i mouy ap hake star rigya leskro sherestar. Oun hakenes his star čirklengre moussya.

⁹ Kolentsa tapras yek ap o vavareste. Yon djan khetne ap hake rigya, oun hounte rissran pen gar. Hakeno dikas glan peste.

¹⁰ Pash hakeneste kol starendar dikas o shero ap i glanstouni rig vin har i mensheskro shero, ap i čači rig har i leveskro shero, ap i servi rig har i gouroumeskro shero, oun ap i palstouni rig har o shero foun i adlari.

¹¹ Douy lengre čirklengre moussya his bourhles rikedo oun pre hadedo. Oun i moussi yekestar tapras koy moussi ko vavarestar. Kol douy vavar čirklengre moussyentsa čakran le pen.

¹² Hakenes his yaka ap hake star rigya. Yaake djan le hako kopo khetne kote, kay kaman le. Yon rissran pen gar trouyel.

¹³ Mashkral kol star bolepangre his čomone, hoy dikas vin har kasht, hoy loles rhačell, oun har lengste kashta, hoy loles rhačenna oun yek rigyatar ap i vavar mank kol bolepangre nashenn. Oun koy yag his lolo, oun dran late das yag karye vin.

¹⁴ Kol bolepangre nashan sik yek rigyatar ap i vavar, te dikas kova vin, har te dell yag karye ap o bolepen.

¹⁵ Oun har dikom ap kol bolepangre, dikom star rade ap i phoub, yek rada glan hakeneste lendar.

¹⁶ Kol rade dikan zenelo vin har i kouč zenelo bar. Yek rada dikas vin har koy vavar. Oun yon his yaake kerdo, te djas yek rada an i vavar dren.

¹⁷ Te djan le, nay djan le ap hake star rigya, oun yon rissran pen gar trouyel.

¹⁸ Oun kol rade his baro oun kran daar. Ap lende his yaka troul lende trouyel, oun kova pash hake starende.

¹⁹ Te djan kol star bolepangre, palle djan ninna kol rade ap lengri rig pentsa. Oun te hadan pen kol bolepangre pre i phoubyatar, hadan pen kol rade ninna.

²⁰ Kote kay kaman le te djal, kote djan le. Oun kol rade hadan pen lentsa. I rade kran, hoy i bolepangre kaman.

²¹ Te djan le, djan kol rade ninna. Te ačan le tardo, ačan kol rade ninna tardo. Oun te hadan le pen pre i phoubyatar, hadan pen i rade ninna pre. I rade kran, hoy i bolepangre kaman.

²² Pral i sherya foun kol bolepangre his čomone har i bolepen dran kristallo. Kek nay dikas koy dren, te kamals lo gar korelo te vell.

²³ Tel kova his i bolepangre. Hakeno lendar rikras peskre douy čirklengre moussya yaake vin, te tapras lo o vavares ap peskri rig. Kol douy vavar čirklengre moussyentsa čakran le pen.

^24-25 Har djan le, dan lengre čirklengre moussya yaake bari gole, har i zorele panya gole denn. Koy gole his har i gole o zorelo Deblestar, oun har koy gole kote, kay boud menshe khetne hi, oun har koy gole, hoy boud lourde denn, kay djan an o kourepen. Oun te ačan i bolepangre tardo, palle moukan le pengre čirklengre moussya tele te djal. Oun me shounom i bari gole, hoy vas dran o bolepen pral lende.

²⁶ Pral o bolepen, hoy pral lengre sherya his, his čomone, hoy vin dikas har i rayeskri beshepaskri dran kouč blaueto bar. Oun ap koleste his yek beshdo, kova dikas vin dikas har i mensho.

²⁷ Oun leskro shero oun leskro beč dikan vin har o sonakay, kay o kham pre perell. Oun troul kova trouyel his yagakre čipya. Oun o telstouno kotar, kova hoy vin dikas har leskre herya, his har yag. Oun troul leste his shoukar,

²⁸ har i brishineskro bogo, hoy vell diklo ap o bolepen pal i brishin. Yaake sikras pes o baro Devel an peskro raylepen mange. Oun har les dikom, moukom man glan leste ap i phoub te perell. Oun me shounom yekes, kay rakras.