Ester 9 - O Debleskro Lab 2024 (Sinte-Manouche)

I bibolde marenn kolen, kay lenge čilačepen kamenn

¹ Oun palle vas o 13. (deesh-te-triinto) dives an o 12. (deesh-te-douyto) čon. Kova hi o čon Adar. Ap ko dives hounte vals kerdo pal o baro rayeskro činlo lab. Oun i menshe, kay i bibolden gar kaman, patsan, te nay marans le i bibolden ap ko dives. Kanna vas kova vavarčandes: I bibolde van zorleder har i vavar menshe,

² oun van khetne an pengre forya an i tsele themma, kay o Ahasveros baro ray hi, te djan le ap kolende pre, kay lengri bibarht kaman. Oun kek nay ačas tardo glan lende. Oun i bari daar glan lende peras ap i menshende an i tsele themma.

³ I daryatar glan o Mordekay čivan pen i pralstoune an kol themma ap i rig i biboldendar, ninna i raya, i themeskre raya oun i rakepangre o baro rayestar.

⁴ Yon shounan, kay vas o Mordekay i baro morsh an o kheer o baro rayestar. An i tsele themma vas prindjedo, har lo baro oun bareder vas.

⁵ Yaake maran i bibolde lauteren o rhareha, kay ap lende djan, oun moukan kekes djido, oun kran yaake lentsa, har yon kaman.

⁶ Oun an o zorelo kheer o baro rayestar an o foro Susa dan le panč-sheel (500) morshen moulo.

^7-10 Oun ninna maran le o Hamaneskre deesh čaven: o Parshandata, o Dalfon, o Aspata, o Porata, o Adalya, o Aridata, o Parmashta, o Arisay, o Ariday oun o Vayesata. O Haman his kova, kay kamas i bibolden te marell. Leskro dad his o Hammedata. Ko koova, hoy lenge his, čoran le penge gar.

¹¹ Ap ko dives vas o baro rayeske penlo, kitse moule das an o rayeskro zorelo kheer an o foro Susa.

¹² Oun o baro ray penas ap i rani Ester: “Kokres an miro zorelo kheer an Susa dan i bibolde panč-sheel morshen moulo. Ninna i deesh čaven o Hamanestar maran le. Poučau man, hoy kran le an mire vavar themma? Hoy mangeh tou boudeder, te vell tout dino? Oun hoy kameh tou? Kova vell kerdo.”

¹³ I Ester penas: “Te hi miro rayeske mishto, palle mouk i bibolden taysar an o foro Susa gomme yek kopo pal ko lab te krell, hoy kava diveske činlo his. Oun kol deesh čave o Hamanestar venn ap deesh bare kashta pre bladedo.”

¹⁴ Oun o baro ray penas, te vell kova yaake kerdo. Oun ko lab vas činlo oun prindjedo kerdo an o foro Susa. Oun kol deesh moule čave o Hamanestar van ap kashta pre pandlo.

¹⁵ Oun i bibolde an o foro Susa van ap o 14. (deesh-te-starto) dives an o čon Adar gomme yek kopo khetne, oun dan an Susa 300 (triin-sheel) morshen moulo. Lengro koova čoran le penge gar.

¹⁶ Oun ninna i tsele vavar bibolde, kay an i themma o baro rayestar djivenn, van penge khetne, oun kouran pen pengro djipaske, te perenn le bouder gar an i čilače vasta. Oun yon dan 75.000 (efta-deesh-te-panč-zerya) morshen moulo. Lengro koova čoran le gar penge.

¹⁷ Oun kova his ap o 13. (deesh-te-triinto) dives an o čon Adar. Oun ap o 14. (deesh-te-starto) dives kran yon či. Oun kran lestar i dives, kay venn le khetne, rhan oun piyenn oun hi barhtelo.

¹⁸ Kol bibolde, kay an o foro Susa djivan, kolla djan an o marepen ap o 13. (deesh-te-triinto) oun ap o 14. (deesh-te-starto) dives an ko čon. Oun ap o 15. (deesh-te-pančto) dives kran le či. Oun kran lestar i dives, kay krenn le či oun venn khetne, rhan oun piyenn oun hi barhtelo.

¹⁹ Doleske hi o 14. (deesh-te-starto) dives an o čon Adar i baro dives kol biboldenge, kay djivenn vin ap o them oun an i gaba. Oun yon rhan oun piyenn oun denn yek o vavareste lačo rhapen.

Kol douy divessa, kay kharenn Pourim , venn bares rikedo

²⁰ Oun o Mordekay činas kava lauter an i liil, oun bičras lila ap i tsele biboldende, kay dour hi oun kay gar dour hi, an hako them o baro rayestar Ahasveros.

²¹ An kol lila his činlo, te vell o 14. oun o 15. dives an o čon Adar i baro dives. Koles hounte rikrenn le hako bersh,

²² te bistrenn le gar, kay an kol divessa i bibolde vin lino van dran i čilače vasta, oun kay kava o čon hi, kay vas barht dran lengre douka, oun sapen dran lengro ropen. Doleske hounte rikrenn le kol divessa bares, oun venn khetne, rhan oun piyenn oun hi barhtelo. Oun yek te dell o vavareste lačo rhapen. Oun ninna i čorvele hounte venn gar bistedo oun hounte lenn čomone.

²³ Oun i bibolde kran yaake har o Mordekay lenge an o liil činas. An hako bersh rikran le kal bare divessa yaake har kran le o ersto kopo.

²⁴ An ko liil, hoy o Mordekay lenge bičras, činas lo lenge, hoy o Haman kras, koleskro dad o Hammedata his i menshendar Agag: Yob kamas i bibolden te marell, oun moukas kol tikne barra te vitsrell, hoy kharenna Pourim, te hatsell lo vin, havo dives o feteder ko marepaske hi.

²⁵ An ko liil his ninna tardo, har i Ester pash o baro rayeste djas oun har kova an i liil penas, te vell o Hamaneha ko čilačo koova kerdo, hoy yob kamas i biboldentsa te krell. Oun yaake vas o Haman oun peskre čave ap i bare kashta pre bladedo.

²⁶ Doleske van kol bare divessa Pourim kharedo, yaake har kol tikne barra kharenna, hoy vitsedo van. Oun yaake har o Mordekay lenge an o liil činas, oun doleske, hoy yon kokres dikan oun kran,

²⁷ lan pen i bibolde glan, te rikrenn le kol douy divessa bares, oun moukenn gar tele, te rikrenn le len hako bersh yaake har glan činlo vas. Oun yaake vas kova pash lende kerdo. Oun kova his ninna moldo lengre čavenge, kay pal lende venna, oun kolenge, kay kek bibolde hi oun pash lende rikrenna.

²⁸ Ap hako tsiro hounte rikrenn i bibolde kal divessa Pourim an hako them oun hako foro, te bistrenn lengre čavengre čave gar, hoy an kol divessa djas.

²⁹ Oun i rani Ester, kolakro dad o Abihayil his, činas i douyto liil, khetne lakro kakeha, o biboldeha Mordekay. An kava liil činas li, te hounte vell lauter yaake kerdo har an ko liil, hoy o Mordekay činas pral kol divessa Pourim.

³⁰ Oun lakro liil djas ap i tsele biboldende an kol 127 (yek-sheel-te-biish-te-efta) themma, kay o Ahasveros o baro ray his. An ko liil his tardo: “Barht oun čačepen t'menge!

³¹ Mer, o biboldo Mordekay oun i rani Ester, mangah t'mendar, te rikrenn kol divessa Pourim ap o čačo tsiro yaake dren, har mer kova glan činam. Kal laba hi t'menge oun t'mare čavenge, kay pal t'mende venna.” An kava liil penan le lenge ninna, har te rikrenn le ko ropaskro tsiro dren, kay rovenn le oun rhan či.

³² Oun yaake har i Ester an kava liil činas, van kol o bare divessa Pourim dren čiddo. Oun lakre laba van an i baro liil činlo.