Ester 7 - O Debleskro Lab 2024 (Sinte-Manouche)O Haman vell ap i kasht pre-bladedo 1 Oun o baro ray oun o Haman van pash o rhapen, hoy i rani Ester kras. 2 Oun o baro ray poučas ninna ap kava douyto dives, har yon i mool piyan: “Hoy hi kova, hoy tou mandar mangeh, rani Ester? Me dau les toute. Hoy kameh tou? Oun te kameh o paash lauterestar hoy man hi, kova vell tout dino!” 3 Kote penas i rani Ester: “Miro baro ray, te hal mange lačes, oun te hi mishto an tire yaka, mange kova te dell, hoy me toutar mangau, palle, miro baro ray, mouk man te djivell, man oun mire menshen. Kova hi, hoy me kamau. 4 Mer vam bikedo, me oun mire menshe, te vas mer maredo, yaake te ačell kek mendar djido. Te vams mer kokres bikedo, morsha oun djouvya, te vas ginle boudepangre, kroms miro mouy gar pre. Kova vals gar phares doha, te vap koleha pash o baro rayeste.” 5 Kote poučas o baro ray Ahasveros i ranyatar Ester: “Koon hi kova? Oun kay hi lo, koles an o shero vas, te krell lo sau koova?” 6 Oun i Ester penas: “Kova, kay lell men palla oun kamell men te marell, kava hi ko čilačo morsh Haman!” Kote tapras o Haman i daar glan o baro rayeste oun i ranyate. 7 Oun o baro ray stas rhoyedo pre kotar, kay le mool khetne piyan. Oun djas vin an i baar pash peskro kheer. Oun o Haman ačas pash i ranyate Ester, te mangell lo latar peskro djipen. Yob dikas koy bibarht, hoy pral leste vell, hoy o baro ray peske glan las. 8 Har vas o baro ray dran i baar pale pale an koy isema, kay yon khetne mool piyan, dikas lo o Haman, kay glan i divana čiddo his, kay i rani hi. Koy das lo gole: “Kamell lo kanna pash mande an miro kheer i ranyake čomone te krell?” Kol laba his gomme gar dran o baro rayeskro mouy tseles vin, koy čakran i boudepangre o Hamaneskro shero. 9 Oun yek o pralstunendar, o Harbona, penas: “Ake, kote pash o Hamaneskro kheer hi o kasht tardo, hoy hi i paash-sheel moussya baro, koles o Haman moukas pre te čivell o Mordekayeske. Kava hi ko morsh, kay o baro rayeske penas, kay morshen glan his, te marenn le les.” Kote penas o baro ray: “Bladenn les koy pre!” 10 Yaake bladan le o Hamanes ap ko kasht pre, koles yob o Mordekayeske moukas pre te čivell. Oun i rholi o baro rayestar djas pale. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.