Ester 6 - O Debleskro Lab 2024 (Sinte-Manouche)

O Haman hounte krell o Mordekayes bares

¹ An koya rat nay sovas o baro ray gar, oun moukas peske glan te draverell dran o bershengro liil o themestar.

² Oun koy hatsas pes dren činlo, har kaman kol douy morsha, o Bigtan oun o Teresh, o baro rayes moulo te dell. Kol douy his pralstoune, kay dan yak glan o voudar o baro rayeskro kherestar. Ninna his kote činlo, kay o Mordekay kova vin hatsas oun an-sikras.

³ Kote poučas o baro ray: “Hoy las o Mordekay koleske? Har vas lo bares kerdo?” Oun kol boudepangre, kay leske koy hi, penan: “Leske vas či kerdo.”

⁴ Kote poučas o baro ray: “Koon hi vin ap i glanstouni platsa?” Oun kote his o Haman ap ko tsiro ap i glanstouni platsa glan o baro rayeskro kheer, te penell lo o baro rayeske, te moukell yob o Mordekayes pre te bladell ap ko kasht, hoy lo koleske pre-čivas.

⁵ Oun kol boudepangre o baro rayestar penan ap leste: “O Haman hi ap i platsa tardo.” Oun o baro ray penas: “Yob vell dren!”

⁶ Oun o Haman vas dren. Oun o baro ray poučas les: “Hoy te krap ko morsheske, koles me, o baro ray, kamau o djiyestar te hadell?” Kote penas o Haman an peskro dji: “Kones kamell o baro ray boudeder te hadell har man?”

⁷ Oun o Haman penas ap o baro rayeste: “Ko morsheske, koles kamell o baro ray o djiyestar te hadell,

⁸ mou venn rayeskre koola anlo, ninna i rayeskro gray. Oun ap leskro shero vell i rayeskri stadi čiddo.

⁹ Oun yek o pralstunendar o baro rayestar rivell ko morshes an, oun anell les ap o gray pral i foreskri platsa, oun moukell glan leste vin te kharell: Yaake krell o baro ray ko morsheha, koles yob kamell o djiyestar te hadell.”

¹⁰ Kote penas o baro ray ap o Haman: “Le sik kol koola oun o gray, yaake har tou penal. Oun kre kova yaake ko biboldeha, o Mordekay. Kova hi beshdo an o voudar glan o baro rayeskro kheer. Oun mouk či kolestar lauterestar krik, hoy tou penal!”

¹¹ Kote las o Haman kol koola oun ko gray oun djas pash o Mordekay oun rivas leske kol koola an, oun anas les pral ko foreskri platsa, oun kharas glan leste vin: Yaake krell o baro ray ko morsheha, koles yob kamell o djiyestar te hadell.

¹² Palle djas o Mordekay pale an o voudar pale glan o baro rayeskro kheer. Oun o Haman ladjas pes oun khatras peskro shero, oun djas sik khere.

¹³ Oun yob penas peskri romyake, i Seresh, oun peskre tsele malenge, lauter hoy leske djas. Kote penan leskre mala oun leskri romni, i Seresh, ap leste: “Te peral tou kanna glan o Mordekay, koon i biboldendar hi, palle nay kreh tou bouder či khatar leste. Na-a, tou djah tele oun nashreh lauter.”

¹⁴ Oun har yon gomme leha rakran, van o baro rayeskre boudepangre oun anan les sik pash o rhapen, hoy i Ester lenge kras.