Ester 5 - O Debleskro Lab 2024 (Sinte-Manouche)

I Ester djal pash o baro rayeste

¹ Oun ap o triinto dives rivas i Ester rayengre ripya an oun djas ap koy platsa, hoy hi dren an o baro rayeskro kheer, vergel koy bari isema, kay o baro ray hi. Oun yob his beshdo ap peskri rayli beshepaskri vergel o voudar.

² Oun har dikas o baro ray i rani Ester tardo ap koy platsa, dikas lo lačes ap late, oun sikras o sonakaskro raneha, hoy an leskro vast hi, ap late. Kote vas i Ester pash leste oun tapras o glanstouno kotar ko ranestar peskre goushtentsa an.

³ Oun o baro ray poučas: “Hoy hi touke, rani Ester? Oun hoy kameh tou? Oun te kameh o paash lauterestar, hoy man hi, palle vell kova tout dino.”

⁴ Koy penas i Ester: “Miro ray, te hi mishto an tire yaka, palle ab tou oun o Haman kava dives pash ko rhapen, hoy me t'menge krau.”

⁵ Oun o baro ray penas: “Djan sik oun anenn o Hamanes, te kras kova, hoy i Ester penas!” Oun o baro ray oun o Haman van pash ko rhapen, hoy i Ester lenge kras.

⁶ Oun har le i mool piyan, poučas o baro ray: “Hoy hi kova, hoy tou mandar mangeh? Me dau les toute. Hoy kameh tou? Oun te kameh o paash lauterestar hoy man hi, kova vell tout dino!”

⁷ Koy penas i Ester: “Kova, hoy me kamau oun toutar mangau, hi kava:

⁸ Te hal mange lačes, oun te hi mishto an tire yaka, miro ray, mange kova te dell, hoy me toutar mangau, palle ab tou oun o Haman pash o rhapen, hoy me t'menge taysar krau. Oun taysar penau touke, hoy kamau toutar.”

O Haman kamell o Mordekayes te marell

⁹ Har o Haman ko dives dran o kheer djas, his lo barhtelo oun peskro dji sanas. Koy dikas lo o Mordekayes beshdo an o baro voudar glan o baro rayeskro kheer. Oun kova stas gar pre, oun vitsras pes gar glan leste tele. Koy tapras o Hamanes i bari rholi pral o Mordekay.

¹⁰ Yob rikras lat pale oun djas doureder an peskro kheer. Kote moukas lo peskre malen oun peskri romyat Seresh te vell.

¹¹ Glan lende phourdas pes o Haman pre oun penas lenge, har baro leskro bravlepen hi, oun kitse morsh čave les hi, oun har hadas les o baro ray oun čivas les pral i tsele pralstunende oun pral i tsele rayeskre boudepangre.

¹² Oun o Haman penas: “Oun pash kova lauter kamas i rani Ester, te vell kek vavar pash o rhapen pashel, hoy yoy o baro rayeske kras, har man kokres. Oun ninna taysar kamell li, te vap me o baro rayeha pash late te rhal.

¹³ Kova lauter hi mange či moldo, yaake rah me ko biboldes Mordekay dikau an o baro voudar glan o baro rayeskro kheer.”

¹⁴ Kote penas leskri romni Seresh oun leskre tsele mala ap leste: “Mouk i kasht pre te čivell, hoy hi i paash-sheel (50) moussya bares! Oun taysarlakro pen ap o baro rayeste, te moukell lo o Mordekayes ap ko kasht pre te bladell. Oun palle dja leha barhteles pash o rhapen.” Oun kol laba his o Hamaneske lačes, oun yob moukas savo kasht pre te čivell.