Ester 3 - O Debleskro Lab 2024 (Sinte-Manouche)

O Haman kamell i bibolden te marell

¹ Pal i tsiro hadas o baro ray Ahasveros i morshes pral i tsele pralstunende, kay pash leste hi. Ko morsh kharas Haman. Leskro dad his o Hammedata i menshendar Agag.

² Oun o baro ray penas, te djan i tsele pralstoune, kay an o baro voudar glan leskro kheer hi, ap i phoub glan o Haman oun parkrenn les. Oun yaake kran le. Kokres o Mordekay kamas gar, oun djas gar glan leste tele ap i phoub.

³ Kote poučan lestar i vavar pralstoune, kay an o voudar glan o baro rayeskro kheer his: “Hoske kreh tou kova gar, hoy o baro ray penas?”

⁴ Oun yaake poučan le les hako dives. Oun yob penas lenge: “Me hom i biboldo oun nay vitsrau man gar tele glan o Haman.” Oun har yob gar ap lende shounas, djan le koy oun penan kova o Hamaneske. Yon kaman te dikell, hoy o Haman penell, te djinals lo, hoy o Mordekay kras.

⁵ Oun har o Haman dikas, te vitsrell o Mordekay pes gar glan leste tele, tapras les i bari rholi.

⁶ An leskre yaka his kova gar doha, te taprell lo peske o Mordekay kokres. Yob kamas ninna leskre menshen te marell. Har shounas lo, kay o Mordekay i biboldo hi, rodas lo, har nay marell lo i tsele bibolden, kay djivenn an kol themma, kay o Ahasveros o baro ray hi.

⁷ Oun an o ersto čon, kova hi o čon Nisan, an o deesh-te-douyto bersh ko baro rayestar Ahasveros, moukas o Haman peske tikne barra te vitsrell, hoy kharenna Pourim, te hatsell lo vin, havo dives an havo čon ko feteder hi, te krell lo, hoy lo peske glan las. Oun kol tikne barra Pourim peran ap o deesh-te-triinto dives oun ap o deesh-te-douyto čon. Kova hi o čon Adar.

⁸ Koy pal penas o Haman ap o baro rayeste Ahasveros: “Kate denna menshe, kay djivenn penge kokres mank i tsele vavar menshende kate te kote an tire tsele themma. Oun len hi i vavar čačepen har i tsele vavar menshen. Oun ap kova, hoy tou, baro ray, peneh, te vell kerdo, shounenn le gar. Kova hi gar mishto touke, te moukess len yaake doureder te krell.

⁹ Miro ray, te kameh, mouk i liil te činell, kay dren tardo hi, te venn le maredo. Oun me dau deesh-zerya kotar roup an i vasta i pralstunendar pral o rayeskro bravlepen.”

¹⁰ O baro ray las peskri goustri o goushto tele. Oun das koy goustri an o Hamaneskro vast, kay kamas i bibolden te marell. Koleskro dad his o Hammedata kol menshendar Agag.

¹¹ Oun o baro ray penas ap o Haman: “O roup nay rikreh, ninna venn touke kol menshe dino, te nay kress lentsa hoy tou kameh.”

¹² Ap o 13. (deesh-te-triinto) dives an o ersto čon van kol morsha kharedo, kay o baro rayeskre lila činenn. Oun kolla činan, hoy o Haman lenge penas, an lila ap i pralstunende ko themestar, ap i themeskre rayende oun i pralstunende pral hako them. Hako liil his yaake činlo, har an ko them činlo vas, oun an ko rakepen, har kote rakedo vas. An o lab o baro rayestar Ahasveros van kol lila činlo. Oun leskri goustyah vas leskro sikepen tel hako liil čiddo.

¹³ Koy dren his činlo: I tsele bibolde hounte venn maredo, terne oun phoure, ninna i čave oun djouvya, te ačell kek lendar bouder djido. Oun kova te vell ap yek dives, ap o deesh-te-triinto dives an o deesh-te-douyto čon. Kova hi o čon Adar. Oun i biboldengro koova nay lell hakeno peske. Oun naashepangre van kharedo, oun lenge vas penlo, te anenn le kol lila an i tsele themma, kay o Ahasveros baro ray hi.

¹⁴ Oun o baro ray penas ninna, te hounte venn kal činle laba prindjedo kerdo an hako them, yaake te rikrenn pen i menshe kote ap lende, oun djinenn, hoy te krenn le, te vell ko dives.

¹⁵ Oun kol naashepangre djan sik vin, yaake har o baro ray penas. Oun an o zorelo kheer an o foro Susa vas ko liil kote ap i kasht dino, kay nay dikell les hakeno. Oun o baro ray oun o Haman beshan pen tele, te rhan oun piyenn le. O tselo fores Susa tapras i daar.