Ester 2 - O Debleskro Lab 2024 (Sinte-Manouche)

I Ester vell i rani

¹ Oun pal ko koova, har djas i rholi o baro rayestar Ahasveros pale, djas leske an o shero trouyel, hoy i Vasti kras, oun hoy lah kerdo vas.

² Kote penan leskre boudepangre ap leste: “Maro ray, pen, te venn shoukar terne čen rodede, kolen kek morshestar an-tapedo van.

³ Oun biče morshen an i tsele themma, kay baro ray hal, te anenn le i tsele shoukar terne čen kate an tiro zorelo kheer an o foro Susa, oun kote an o djouvyengro kheer. Oun de len an o vast ko pralstunestar, o Hegay, kay dell yak ap i djouvyende. Oun yob moukell lauter ap lende te krell, hoy i djouvyat shoukar krell.

⁴ Palle le koy terni čay, hoy an tire yaka i shoukeder hi, te vell li rani, har i Vasti glan late rani his.” Oun kol laba his mishto an i yaka o baro rayestar. Oun yob kras kova yaake.

⁵ Oun an o zorelo kheer an Susa djivas i biboldo. Kova kharas Mordekay. Leskro dad his o Yayr, oun leskro papo his o Shimi. Koleskro dad his o Kish. Kova his i Benyaminari.

⁶ Leskri familya his mank kol menshende, kay pandlo van, har lengro baro ray, ko baro ray pral o them Youda, o Yekonya, pandlo vas. Oun o baro ray pral o them Babilonia, o Neboukadnezar, moukas len an peskro them te anell.

⁷ Oun pash o Mordekay djivas i terni čay, i Hadassa, kay ninna Ester kharedo vas. Yoy his leskro kakeskri čay, oun lat his bouder kek dad oun kek day. Oun yoy his i shoukar oun rayli čay. Oun har lakro dad oun lakri day meras, las o Mordekay lat pash peste oun vas lake har lakro dad.

⁸ Har kanna kol laba o baro rayestar trouyel djan, van boud ča anlo an o zorelo kheer an o foro Susa. Oun ninna i Ester his mank lende oun vas an o djouvyengro kheer anlo, oun an o vast ko morshestar Hegay dino, kay dell yak ap o djouvyengro kheer.

⁹ Oun yoy his shoukar an koleskre yaka, oun las yaake leskro lačepen. Oun yob dikas koy pre, te lell li sik kouč makepaskro djet oun sasto rhapen, hoy i djouvyat shoukar krell. Oun yob das lat efta vi-rodede djouvyen, te venn le lake koy. Oun anas lat oun lakre boudepaskretse an i feteder iseme an o djouvyengro kheer.

¹⁰ Glan kova penas o Mordekay ap i Ester, te penell li gar, dran havo them oun have menshendar yoy hi. Yaake penas i Ester či kolestar.

¹¹ Oun o Mordekay djas hako dives glan ko djouvyengro kheer pre te tele, te nay hatsell lo vin, har i Esterake djal, oun hoy yon lah krenn.

¹² Yek bersh rah vas haki čay shoukar kerdo ko diveske, kay djal li pash o baro rayeste dren: shob čonna vas li dren maklo o djeteha, kay myrrhe dren hi, oun pale shob čonna o djeteha, kay Balsam dren hi oun vavar kouč soungepaskro koveha.

¹³ Oun palle djas yek čay pal i vavar pash o baro rayeste dren. Oun lauter, hoy kamas li peha te lell, hounte vas lat dino. Oun yoy vas dran o djouvyengro kheer an o baro rayeskro kheer anlo.

¹⁴ Ap i rat djas li dren oun taysarlake djas li palle an i vavar djouvyengro kheer, tel i vasta ko pralstunestar, kay kharas Shaashgas. Kova das ap kol djouvyende yak, kay o baro rayeskre vavar djouvya his. Oun kek kol djouvyendar vas i douyto kopo pash o baro rayeste, kokres kolla, kay his shoukar an leskre yaka, oun kolen yob moukas pash pengro lab te kharell.

¹⁵ Ko tsiro vas, te djal i Ester pash o baro rayeste. Lakro dad his o Abihayil oun lakro kako o Mordekay, kay lat pash peste las, har vell li leskri čay. Oun yoy kamas či boudeder peha te lell, har o Hegay, ko pralstouno pral i djouvyende, lake penas. Oun an i yaka lauterendar, kay dikan lat, his li shoukar.

¹⁶ Oun yaake vas i Ester pash o baro rayeste Ahasveros an leskro rayeskro kheer anlo. Oun kova his an o deshto čon, har yob an o eftato bersh o baro ray his. Kava čon kharas Tebet.

¹⁷ Oun o baro ray kamas lat boudeder har i tsele vavar djouvyen. An leskre yaka his li shoukeder oun feteder har haki vavar terni čay. Oun yob čivas ko shereskro sonakay ap lakro shero, hoy i rani hidjrell. Oun kras latar i nevi rani, yaake har i Vasti glan late his.

¹⁸ Oun o baro ray kras i baro rhapen i tsele rayenge oun pralstunenge, te vell i Ester hadedo. Oun i tsele themenge moukas lo love palla, hoy yon leste hounte dans. Oun moukas djob čičeske vin te dell, yaake har bare raya krenna.

O Mordekay hatsell i phoukepen vin

¹⁹ His an ko tsiro, har i douyto kopo terne ča khetne anlo van o baro rayeske. Koy his o Mordekay beshdo an o baro voudar glan o baro rayeskro kheer.

²⁰ I Ester shounas ap o Mordekay yaake har an ko tsiro, har yoy gomme pash leste his. Oun yaake har lo lake penas, penas li gar dran havo them oun have menshendar yoy hi.

²¹ An kol divessa har o Mordekay an ko baro voudar glan o baro rayeskro kheer beshdo his, van douy boudepangre an i bari rholi. Kolla dan yak ap i voudya oun kharan Bigtan oun Teresh. Oun yon lan penge glan, te denn le o baro rayes Ahasveros moulo.

²² Oun ko koova shounas o Mordekay oun penas les ap i rani Ester, oun penas lake ninna, te penell li les o baro rayeske doureder. Oun i Ester kras kova.

²³ Oun har dikan le palla, vas vin, te his kova čačo. Oun kol douy van ap o kasht bladedo. Oun o baro ray moukas kava koova dren te činell an o bershengro liil o themestar.