Ester 1 - O Debleskro Lab 2024 (Sinte-Manouche)

O Ahasveros hi i baro ray, koles boud bravlepen hi

¹ His an ko tsiro, har o Ahasveros o baro ray his pral 127 (yek-sheel-te-biish-te-efta) themma, hoy djan o themestar India bis pash o them Etiopia.

² Leskri rayeskri beshepaskri his tardo an peskro zorelo kheer an o foro Susa.

³ Har yob o triinto bersh o baro ray his, kras yob i baro festo i tsele pralstunenge oun barenge: kolenge, kay his pralstoune pral kol boud lourdende an i themma Persia oun Media, ninna kol bravelenge oun themeskre rayenge dran peskre tsele themma.

⁴ Kava baro festo djas 180 (yek-sheel-te-orhta-deesh) divessa. Oun an ko tsiro sikras lo len peskro baro bravlepen oun ko tselo kouč koova, pral kova yob halauter o ray hi.

⁵ Har kol divessa trouyel djan, kras o baro ray i baro rhapen kolenge lauterenge, kay an peskro zorelo kheer an o foro Susa his, i barenge oun i tiknenge. Ko baro rhapen djas efta divessa. Oun i menshe van khetne an i baar pash o baro rayeskro raylo kheer.

⁶ Kote his parne oun blauete plarhte pandlo ap roupene goustria mank turme dran marmor. Troul kol plarhte his layntikre oun lole dorya. Beshepangre i heryentsa dran sonakay oun roup his kote tardo ap i kouč barrengri phoub, hoy zenelo, parno, djelto oun kalo his.

⁷ O pipen vas vin čoredo an khore dran sonakay, kolendar his kek har o vavar. Oun das boud rayeskri mool, boudeder har boud. O baro ray rikras lat gar pale.

⁸ Yob penas i pralstunenge pral peskro kheer, te nay piyell hakeno yaake boud har yob kamella. Doleske penas kek o vavareske, har boud te piyell lo.

⁹ Oun ninna i rani Vasti kras i baro rhapen i djouvyenge an o raylo kheer o baro rayestar Ahasveros.

I rani Vasti ačell gar bouder i rani

^10-11 Oun ap o eftato dives his o baro rayeskro dji barhteles boud molyatar. Oun yob kamas i rayenge oun i tsele menshenge peskri romyat, i rani Vasti, te sikrell, kay yaake shoukar his. Oun yob rakras kol efta pralstunentsa, kay ninna pral o djouvyengro kheer penepaske hi: o Mehouman, o Biseta, o Harbona, o Bigta, o Abagta, o Setar oun o Karkas. Lenge penas lo, te anenn le i rani, oun te hidjrell li peskro shereskro sonakay.

¹² Har penan kol efta morsha i ranyake Vasti, hoy o baro ray latar kamell, kamas li gar pash leste te vell. Kote tapras i bari rholi i baro rayes.

¹³ Oun o baro ray rakras i goseve morshentsa, kay prindjran mishto o themeskro čačepen. Pash lende his yaake, kay o baro rayeskro koova hounte vell glan kolende, kay hayvan mishto o themeskro čačepen oun djinan, hoy te krenn.

¹⁴ Mank lende his o Karshena, o Shetar, o Admata, o Tarsis, o Meres, o Marsena, oun o Memukan. Kol efta his i raya pral i themma Persia oun Media. Oun pal o baro rayeste his yon i pralstoune an o tselo them. Ap lende rakras lo, te kamell lo čomone te djinell.

¹⁵ Oun yob penas ap lende: “Me, o baro ray, bičrom mire boudepangren pash i rani Vasti, te penenn le lake, hoy latar kamom. Oun yoy shounas gar ap miro lab. Hoy te kras mer kanna lah pal maro čačepen?”

¹⁶ Koy penas o Memukan glan o baro rayeste oun glan i pralstunende: “Koy doosh, hoy i rani Vasti ap peste anas, hi gar kokres i doosh ap o baro rayeste, na-a, kaya hi i doosh ap i tsele pralstunende oun ap i tsele morshende an i tsele themma, kay o Ahasveros o baro ray hi.

¹⁷ Kova, hoy i rani Vasti kras, shounenn i tsele djouvya, oun dikenn tele ap pengre romende oun penenn: O baro ray Ahasveros penas, te vell i rani Vasti glan leste. Oun yoy kamas gar.

¹⁸ Kava dives penenn i pralstunengre romya an o them Persia oun Media pengre romenge, hoy i rani kras. Oun yon dikenn bouder gar pre ap pengre romende. Oun kolla venn rhoyedo pral lende.

¹⁹ Te hi mishto an o baro rayeskre yaka, palle djal i lab vin lestar, te nay vell i Vasti bouder gar glan leste. Ko lab vell činlo an o čačepaskro liil ko themestar Persia oun Media, kay kek nay lell les bouder pale. Oun palle lell o baro ray i vavar čay, te vell li rani, – i čay, kay lačeder hi har i Vasti.

²⁰ Kanna te vell kava lab o baro rayestar penlo an o tselo them, palle dikenn i tsele djouvya pre ap pengre romende, – pash i bravelende, ninna pash i čorvelende.”

²¹ Oun kal laba his mishto an o baro rayeskre yaka oun i yaka leskre pralstunendar. Oun o baro ray kras yaake, har o Memukan penas.

²² Oun bičras lila an i tsele themma, kay lo baro ray his. Hako liil his yaake činlo, har an ko them činlo vell, oun an ko rakepen, har kote rakedo vell, kay ko liil bičedo vas. Oun an ko liil vas penlo, te vell hako romes an peskro kheer o penepaske, oun te vell an hako kheer ko rakepen rakedo, hoy o rom rakrella.