Esra 9 - O Debleskro Lab 2024 (Sinte-Manouche)

O Esra mangell pes tele glan o Debleste i Israelengri doosh

¹ Har kova halauter kerdo his, van i pralstoune pash mande oun penan: “I menshe dran Israel, i rashaya oun i Levitarya rikran pen gar pale i vavar menshendar, kay djivenn an kava them: kol Kanaanitarya, Hetarya, Perisarya, Yebousarya, Ammonarya, Moabarya, Egiptarya oun Amorarya. i Israelitarya krenn yaake djoungelo koova har kolla.

² Yon lan kolengre djouvyen penge oun pengre morsh čavenge ninna. Oun yaake hi mank o Debleskre menshende save, kay gar lendar hi. I pralstoune oun i čačepangre morsha his i erste, kay kova kran, oun peran o Deblestar tele.”

³ Har kova shounom, krom miri baya oun miro gad paash, oun tserdom mange miro baal dran o shero oun dran o čor, oun beshom man koy, oun homs beshdo har moulo i doukatar.

⁴ Oun pash mande van halauter kolla khetne, kay an i traash his, hoy o Devel pral o them Israel penella, kay leskre laba van i pirentsa stakedo kolendar, kay van dran o them Babilonia pale pale. Oun me homs koy beshdo har moulo, bis te vas rati - ko tsiro, kay o Debleske i firho anlo oun maredo vell.

⁵ Har kava tsiro vas, lom man khetne, stom pre an miro paash gad oun miri paash baya, perom ap mire čanga oun rikrom mire vasta pral pash miro baro Debleste,

⁶ oun penom: “Miro Devel, me ladjau oun trashau man, te hadap mire yaka pral pash toute, miro Devel; mari doosh vas pral maro shero, oun maro čilačepen hi baro bis pral an o bolepen.

⁷ Ko tsirestar, kay mare phoure djivan, bis ap kava dives anam mer boud doosh ap mende, oun dran maro djounglepen dal men, mare rayen oun rashayen an i vavar rayengre vasta, kay an i themma troul mende djivenn. O rhareha maran le men, an o stilepen vitsran le men, oun yon čoran men vin, oun anan ladj ap mende, yaake har ninna kava dives hi.

⁸ Kanna vas men i tikno tsiro baro kamlepen dino toutar, maro baro Deblestar. Tou moukal menshen mendar djides oun anal men pale kote, kay tou khere hal, te djivas mer kote kek trashah. Doleske sanenn mare yaka, oun nevo djipen hi an mende, ninna te ham gomme boudepangre.

⁹ Mer hams pandle boudepangre, oun tou, maro Devel, moukal men gar kokres an maro pandepen. Tou kral, te dikan i raya pral o them Persia lačes ap mende, oun dal men nevi zoor, te nay čivas mer tiro kheer pale pre, yaake te vas dran kol paash dine oun rhačede barra i nevo kheer touke. Kova kral tou, te djivas mer pale an o them Youda oun an o foro Yerusalem kek trashah.

¹⁰ Oun kanna, maro Devel, hoy te penas pal kava tselo koova? Mer djivam gar pal tire laba,

¹¹ kay tou kolenge penal, kay tire boudepangre, tire rakepangre his, te penenn le kova menge doureder. Tou penal menge: Ko them, kay t'mer koy venna, te lenn les t'menge, hi i pale-čiddo them. I menshe, kay kote djivenn, kran les pale-čiddo ko tselo djoungelo koveha, hoy le kran, har mangan le vavar deblen an. Lengre moule debla hi an o tselo them yek rigyatar bis ap i vavar.

¹² Doleske ma denn t'mare čen lengre čavenge! Oun lengre čen ma lenn len t'mare čavenge! Ma avenn lengre mala! Oun denn yak, te venn le gar bravelo, an kek tsiro. Palle nay venn t'mer zoreles an o them, oun nay rhan ko lačepen, hoy an ko them koy hi. Kova nay denn palle t'mare čaven, te djivenn le an hako tsiro an ko them.

¹³ Oun har ko tselo čilačo koova kram oun yaake boud doosh ap mende anam, vas kay bari bibarht ap mende. Ah, maro Devel, tou rikral tout pale oun dal men gar koy phagi, hoy hounte lams. Oun moukal mendar save djides, kay van dran o pandepen pale vin, oun van pale kate an o them Israel.

¹⁴ Har nay vas kova yaake, te kras kova kanna pale, te shounas gar ap tire laba, oun te las menge romyen kol vavar menshendar, kay savo djoungelo koova krenn? Hounte vell tiri rholi gar yaake pral mende, bis te ačell kek mendar ap o djipen? Bis te kek menshe mendar bouder koy hi, kay pral ačan oun nay djivenn doureder?

¹⁵ Baro Devel, tou o Israeleskro Devel, hal an o čačepen tardo oun lal men, kay pral ačam, vin dran o merepen, yaake har kava dives hi. Dik, kate ham glan toute an mari doosh, oun djinah, mer nay ačah gar tardo glan toute!”