Esra 8 - O Debleskro Lab 2024 (Sinte-Manouche)

O Esra oun kolla vavar, kay van pale pale an o them

¹ Kalla hi i pralstoune pengre familyendar kol morshentsa, kay van mantsa khetne dran o them Babilonia pre an o foro Yerusalem an ko tsiro har o Artaxerxes o baro ray his.

² dran i familya Pinhas: o Gershom; dran i familya Itamar: o Daniel; dran i familya David: o Hattoush, koleskro dad o Shekanya his;

³ dran i familya Parosh: o Zakarie, oun khetne leha his 150 morsha, kay an i liil činlo van;

⁴ dran i familya Pahat-Moab: o Elyoenay, koleskro dad o Zeraya his, oun khetne leha 200 morsha;

⁵ dran i familya Zattou: o Shekanya, koleskro dad o Yaziel his, oun leha 300 morsha;

⁶ dran i familya Adin: o Ebed, koleskro dad o Yonatan his, oun khetne leha 50 morsha;

⁷ dran i familya Elam: o Yeshaya, koleskro dad o Atalya his, oun khetne leha 70 morsha;

⁸ dran i familya Shefatya: o Sebadja, koleskro dad o Mikael his, oun khetne leha 80 morsha;

⁹ dran i familya Yoab: o Obadya, koleskro dad o Yehiel his, oun khetne leha 218 morsha;

¹⁰ dran i familya Bani: o Shelomit, koleskro dad o Yosifya his, oun khetne leha 160 morsha;

¹¹ dran i familya Bebay: o Zakarie, koleskro dad o Bebay his, oun khetne leha 28 morsha;

¹² dran i familya Asgad: o Yohanan, koleskro dad o Katan his, oun khetne leha 110 morsha;

¹³ dran i familya Adonikam ninna i palstoune, kay van pale. Oun yon kharan: Elifelet, Yehiel oun o Shemaya, oun khetne lentsa 60 morsha;

¹⁴ dran i familya Bigvay: o Outay, koleskro dad o Sabboud his, oun khetne leha 70 morsha.

O Esra rodell Levitaryen vin, te boudrenn le an o Debleskro kheer

¹⁵ Oun me anom len khetne pash ko lengsto pani, hoy an o foro Ahava nashella. Oun mer ačam kote triin divessa. Oun har lom kote i menshen an o yak, dikom rashayen mank lende. Me dikom kek Levitaryen.

¹⁶ Kote moukom i goseve pralstoune pengre familyendar pash mande te vell: o Eliyeser, o Ariel, o Shemaya, o Elnatan, o Yarib, o vavar Elnatan, o Natan, o Zakarie oun o Meshoullam, oun kol douy sikepangre, o Yoyarib oun o Elnatan,

¹⁷ oun bičrom len pash o Iddo, ko moskro an o foro Kasifya, kay i Levitarya djivenn, te bičrenn le menge boudepangre o khereske maro Deblestar. Oun me penom lenge, hoy te rakrenn le o Iddeha oun leskre phralentsa, kay pash leste his an o foro Kasifya.

¹⁸ Oun maro Debleskro kamlo vast his pral mende. Oun yon anan menge i gosevo morsh dran i familya Mali, i Levitari. O Levi his i čavo o Yakobestar. Kava morsh kharas Sherebya. Oun pash leste his leskre čave oun phrala. Khetne his le 18 (deesh-te-orhta) morsha.

¹⁹ Koy pashel van o Hashabya oun o Yeshaya dran i familya Merari, oun leskre phrala oun lengre morsh čave, khetne 20 (biish) morsha.

²⁰ Palle van gomme 220 (douy-sheel-te-biish) boudepangre, te boudrenn le an o Debleskro kheer. Lengre laba hi lauter pre-činlo. Yon van kol menshendar, kay o David oun i pralstoune vin rodan, te boudrenn le i Levitarenge an o vast.

Yon mangenn o Debles te dell lo len barht ap lengro drom

²¹ Oun me moukom kote pash o pani Ahava i tsiro vin te kharell, kay rhas mer či, oun djas ap i čanga glan maro Debleste, te djal lauter mishto ap maro drom, te djah an maro them, oun te venn kek čilače menshe pral mende oun mare čavende oun halauter hoy men hi.

²² Kamom gar o rayestar klissepangre te mangell, kay denn yak ap mende oun kourenn pen menge, te venn čilače menshe pral mende. Ladjom man te mangap kova lestar. Glan i tikno tsiro penam leske: O vast maro Deblestar hi kamlepah pral kolende, kay les rodenn, oun leskri zoreli rholi vell pral kolende, kay kamenn lestar či te djinell.

²³ Doleske rham či oun mangam halauter maro Deblestar, oun yob shounas ap maro mangepen.

²⁴ Oun me rodom mange 12 (deesh-te-douy) dran i pralstoune rashayende vin, koy pashel o Sherebya oun o Hashabya oun deesh vavar Levitarya.

²⁵ Kolen dom ko tselo roup oun ko tselo sonakay oun kol tsele kouč kotya an o vast, hoy van dino o Debleskre khereske, kova lauter, hoy das o baro ray oun leskre čačepangre oun kol pralstoune oun i tsele Israelitarya, kitse kay le his, an o them Persia.

²⁶ Me dom ko tselo koova an lengre vasta: 20.000 (biish zerya) kilogramme roup, oun roupene koola, hoy khetne 3.000 (triin zerya) kilogramme pharo his, oun 3.000 (triin zerya) kilogramme sonakay,

²⁷ 20 (biish) sonakangre čare, kolla his enya kilogramme pharo oun yaake boud moldo har 1.000 (yek zero) sonakangre love, oun douy khore dran lolo saster, hoy vin dikan har sonakay oun yaake boud moldo his har sonakay.

²⁸ Oun me penom ap lende: “T'mer han o Debleske vi-rodedo, oun kol tsele kotya hi o Debleske ap i rig čiddo: Oun ko roup oun ko sonakay vas o Debleske dino dran o menshengro kamlepen. Yon dan kova pendar o baro Debleske, koles ninna pengre phoure an-mangan.

²⁹ Denn mishto yak koy pre, bis te van an Yerusalem an o baro Debleskro kheer. Kote čivenn t'mer kova lauter ap i vaga, oun denn les an i vasta i pralstoune rashayendar oun i Levitarendar oun i pralstunendar i familyendar an Israel.”

³⁰ Kote lan i rashaya oun i Levitarya ko tselo roup oun sonakay oun kol tsele kouč kotya o Debleskro khereske pentsa, te anenn le kova an o foro Yerusalem an o kheer maro Deblestar.

I Israelitarya dran Babilonia venn pale an Yerusalem

³¹ Ap o deesh-te-douyto dives an o ersto čon kram men ap o drom oun moukam ko pani Ahava pal mende, te djas an o foro Yerusalem. Oun maro Debleskro vast his pral mende oun das men gar an i vasta kolendar, kay kaman maro merepen oun kay men ap o drom palla lan.

³² Oun mer vam an Yerusalem, oun kram triin divessa či, te vell men nevi zoor.

³³ Ap o starto dives djam an o Debleskro kheer, oun dam ko tselo roup oun sonakay oun kol vavar kouč kotya o rashayeske Meremot an o vast, koleskro dad o Ouriya his. Oun pash leste his o Elazar, koleskro dad o Pinhas his. Oun khetne lentsa his kol Levitarya, o Yosabad, koleskro dad o Yeshoua his, oun o Noadya, koleskro dad o Binnouy his.

³⁴ Hako kotar, hoy lende dam, vas ap i vaga čiddo oun an i liil činlo, har pharo lo his, oun kitse kotya kolendar koy his.

³⁵ Oun kol menshe, kay van pale dran o pandepen, anan firhen o Israeleskro Debleske, oun maran len leske: 12 (deesh-te-douy) terne gourma i tsele menshenge an Israel, 96 (enya-deesh-te-shob) morsh bakre, 77 (efta-deesh-te-efta) terne bakre. Ninna anan le 12 (deesh-te-douy) morsh bouzya, kay van maredo, te vell i doosh i menshendar krik lino. Oun kol tsele firhe van pre rhačedo o baro Debleske.

³⁶ Oun yon anan ko liil, hoy o baro ray dran o them Babilonia len lentsa das, pash i pralstunende oun i themeskre rayende vergel o panyestar Eufrat. Oun kolla van i Israelenge ap i rig, oun dikan ninna, te vell o Debleskro kheer pale pre-čiddo.