Esra 7 - O Debleskro Lab 2024 (Sinte-Manouche)

O Esra vell pale an o foro Yerusalem

¹ Pal kava koova, an ko tsiro, kay o Artaxerxes o baro ray pral o them Persia his, djivas an o them Babilonia i biboldo, koleskro lab Esra his. Leskro dad his o Seraya, koleskro dad o Asarya, koleskro dad o Hilkiya,

² koleskro dad o Shalloum, koleskro dad o Zadok, koleskro dad o Ahitoub,

³ koleskro dad o Amarya, koleskro dad o Asarya, koleskro dad o Merayot,

⁴ koleskro dad o Zeraya, koleskro dad o Usi, koleskro dad o Boukki,

⁵ koleskro dad o Abishoua, koleskro dad o Pinhas, koleskro dad o Elazar, koleskro dad o Aron, ko baro rashay.

⁶ Kava morsh Esra djas vin dran o them Babilonia, te djal lo an o foro Yerusalem. Yob his i sikepaskro, oun djinas kol laba mishto, hoy an o Moseskre lila činlo hi. Kol laba das o baro Devel peskre menshende Israel. Oun har o Esra gomme an Babilonia his, rikras o baro Devel peskre vasta pral leste, oun kras, te das o baro ray o Esraes halauter, hoy yob lestar mangas.

⁷ Oun khetne leha djan vavar Israelitarya pral an Yerusalem, rashaya, Levitarya, gipangre, morsha kay denn yak ap i voudya, oun boudepangre, kay boudran an o Debleskro kheer. Kolla halauter van an Yerusalem an o eftato bersh, kay o Artaxerxes o ray pral o them Persia his.

⁸ An o pančto čon an kava bersh van le kote an.

⁹ Ap o ersto dives an o ersto čon kran le pen ap o drom, oun ap o ersto dives an o pančto čon van le an o foro Yerusalem. O Debleskro kamlo vast his pral leste.

¹⁰ O Esra čivas peskre djiyeskre yaka ap o Debleskro drom, te hayvell lo les boud oun boudeder, oun te djivell lo pal o Debleskro lab, oun te sikrell lo halauterenge an o them Israel, hoy o baro Devel lendar kamell, oun har nay djivenn le pal leskro čačepen.

O ray Artaxerxes dell o Esraeste i liil peha

¹¹ Oun o ray Artaxerxes moukas i liil te činell, te dell lo les o rashayeste, o Esra. Kova his i sikepaskro oun prindjras mishto o Debleskre laba oun djinas, hoy o baro Devel peskre menshendar, o Israel, kamell. An ko liil his kal laba tardo:

¹² Me, o Artaxerxes, o ray pral i tsele raya, penau ap o Esra, ko rashay oun sikepaskro i labendar ko Deblestar, kay an o bolepen hi. Boud barht touke!

¹³ Oun kanna vell mandar penlo, kay halauter kolla, kay dran o them Israel an miro them van, ninna lengre rashaya oun Levitarya, yon te kamenn touha te djal an o foro Yerusalem, palle nay djan le.

¹⁴ O baro ray oun leskre efta goseve morsha bičrenn tout, te djas an o them Youda oun an o foro Yerusalem, te dikess, har rikrenn pen i menshe kote ap tiro Debleskro lab, hoy an tiro vast hi.

¹⁵ Tou aneh lenge roup oun sonakay, hoy tout o baro ray oun peskre goseve morsha touha denna, te dess kova o Debleste pral o them Israel, koleskro kheer an Yerusalem hi.

¹⁶ Le ninna ko tselo roup oun sonakay, hoy nay leh khetne an o tselo them Babilonia, oun koy pashel hoy kol menshe oun i rashaya pendar kokres kamenn te dell o khereske lengro Deblestar an Yerusalem.

¹⁷ Halauter kova le oun gin gosvepah kol loventsa gourma, bakre, terne bakre; koy pashel djob oun mool o Debleske; te nay vell kova lauter rhačedo ap i rhačepaskri an o kheer t'maro Deblestar an Yerusalem.

¹⁸ Te ačenn love pral, krenn kolentsa, hoy touke oun tire phralentsa mishto hi, yaake har t'maro Devel kova kamella.

¹⁹ Oun kol pirya oun čare oun vavar koova, hoy touke dino van i boudjake an o kheer tiro Deblestar, an leske an o foro Yerusalem!

²⁰ Ninna hoy tout boudeder hounte vell tiro Debleskro khereske, oun hoy hounte playsress, kova vell tout halauter dino dran i khera, kay o rayeskro bravlepen čiddo hi.

²¹ Me, o ray Artaxerxes, penom ap halauterende, kay an o them vergel o panyestar Yordan ap i khera garda denn, kay miro bravlepen dren hi: Halauter, hoy mangell t'mendar o Esra, ko rashay oun sikepaskro kol labendar o bolepaskro Deblestar, kova denn les sik;

²² roup bis 3.500 (triin-te-paash zerya) kilogramme, oun 100 (sheel) gone biyalo gib, oun 100 (sheel) pirya mool, oun 100 (sheel) pirya djet, oun loon yaake boud har kamenn le.

²³ Halauter, hoy o bolepaskro Devel penas, te vell an leskro kheer, kova hounte vell leste yaake dino, har lo penas, te vell leskri rholi gar pral o rayeste, leskre čavende oun leskro them.

²⁴ Ninna penau t'menge: Kekeste t'mendar dau me o čačepen, te nay mangell lo themeskre love, foreskre love oun vavar koova kol rashayendar oun kol vavarendar, kay boudrenn an o kheer kava Deblestar, har Levitarya, gipangre, morsha, kay yak denn ap i voudya oun boudepangre.

²⁵ Oun tou Esra, čip o gosvepah, hoy tiro Devel tout dell, čačepangren oun rakepangren an i boudi dren, te rakrenn le o čačepen vin i tsele menshenge, kay vergel o panyestar Eufrat djivenna, halauterenge, kay i laba tiro Deblestar prindjrenn. Oun koon kal laba gar prindjrell, koleske sikrenn, hoy t'maro Devel lestar kamell!

²⁶ Hakeno, kay dell gar yak ap o lab tiro Deblestar oun rikrell pes gar ap o lab o rayestar, kova lell peskri phagi: nay vell, te vell lo maredo, pale-čiddo, hounte playsrell love, oder vell an o stilepen.

O Esra sharell o Debles

²⁷ Sharedo vell o baro Devel, ko Devel mare phourendar! Yob hi kova, kay čivas sau koova an o rayeskro dji, te nay vell o baro Debleskro kheer an o foro Yerusalem yaake raylo oun shoukar!

²⁸ O Devel kras, te dikas o ray oun leskre goseve oun pralstoune morsha lačes ap mande. Oun o baro Debleskro vast his pral mande oun kras man zoreles, oun nay anom boud morshen khetne, kay his pralstoune pral pengre familye, te djan le lauter mantsa pre an maro them.