Esra 6 - O Debleskro Lab 2024 (Sinte-Manouche)

Yon hatsenna kol laba, hoy o Cyrus penas

¹ Kote moukas o ray Darius te penell, te venn i familyakre lila rodedo an i khera, kay o bravlepen oun i phoure lila čiddo hi an o them Babilonia.

² Koy vas i liil hatslo an o foro Ekbatana an o them Media. Ap ko liil his činlo: Laba, hoy hounte venn gar bistedo:

³ An o ersto bersh, kay o Cyrus baro ray vas, moukas lo te penell: O Debleskro kheer an o foro Yerusalem hounte vell pale pre-čiddo, yaake te vell lo i platsa, kay venn firhe anlo oun pre rhačedo o Debleske. Oun i massurya hounte venn neves kerdo. O kheer hounte vell triyanda metarya bares, oun triyanda metarya bourhles,

⁴ oun vell dran djoudje dine barra yaake kerdo, te venn triin barra yek ap o vavar čiddo, oun koy pral kasht, oun palle pale triin barra yek ap o vavar, oun koy pral kasht, oun yaake doureder. Oun i love koleske lautereske nay vell dran o baro rayeskro kheer lino.

⁵ Ninna hounte venn pale pale dino kol tsele sonakangre oun roupene kotya, hoy an o Debleskro kheer an Yerusalem tardo his, kolla kay moukas o Neboukadnezar krik te anell an o them Babilonia. Halauter hounte vell pale anlo an o Debleskro kheer an Yerusalem, oun kote pre-čiddo, kay lo tardo his an o Debleskro kheer.

O Darius bičrell i liil pale

⁶ Ap o Tattenay, ko pralstuneste pral o them ap i vavar rig o panyestar Eufrat, oun ap o Shetar-Bosnay, oun t'mare tsele malenge, kol čačepangre morsha, penau me: Rikrenn t'men pale kava kovestar!

⁷ Moukenn o pralstounes i biboldendar oun lengre phoureden pengri boudi te krell ap o Debleskro kheer, te nay čivenn le les kote pale pre, kay lo tardo his.

⁸ Me moukau t'menge ninna te penell, hoy t'mer lengre pralstunen hounte denn, te nay vell o Debleskro kheer pale pre-čiddo. Lenn dran o rayeskro bravlepen kol lovendar, hoy dren vell pash t'mende ap i vavar rig o panyestar Eufrat, oun denn len yaake boud, hoy len hounte vell, te hi len hako tsiro doha halauterestar.

⁹ Denn len ninna hako dives kol firhen, hoy len hounte vell, te anenn le len o bolepaskro Debleske: terne gourma, bakre oun terne bakre. Ninna djob, loon, mool oun djet denn len yaake boud har penenn t'menge lengre rashaya an o foro Yerusalem. Denn yak, te vell kova lende yaake sik dino, te hounte mangenn le gar.

¹⁰ Palle nay rhačrenn le kol firhen yaake o bolepaskro Debleske, te dikell lo lačes ap lende, oun yon nay mangenn lestar lačepen mange, miro djipen oun koleske mire čavendar.

¹¹ Oun pale moukau t'menge te penell: Te rikrell pes yek t'mendar gar ap mire laba, hounte vell i baro kasht dran leskro kheer vin tserdedo, oun yob hounte vell koy pre dino. Oun leskro tselo kheer hounte vell tele phagedo, doleske kay yob gar mire laba dren rikras.

¹² Oun ko Devel, kay o Yerusalem vin rodas, te vell lo kote an-mangedo, yob mou te phagell hako baro rayes oun hako them, kay rikrell pes gar ap kava lab, hoy penom, oun hadell peskro vast, te phagell lo ko Debleskro kheer tele an Yerusalem. Me, o Darius, penom kava lab oun moukom les pre te činell, te rikrell pes hakeno ap leste!

¹³ Kote kras o Tattenay, ko pralstouno pral o them ap i vavar rig o panyestar Eufrat, oun o Shetar-Bosnay oun kol morsha, kay pash lende his, pal hako lab, hoy lenge o ray Darius penas.

¹⁴ Oun o phoureder i biboldendar kran pengri boudi ap o Debleskro kheer doureder. Oun i boudi djas mishto, yaake har penan kova o Debleskre rakepangre, o Haggay oun o Zakarie, koleskro dad o Iddo his. Oun yon čivan o kheer pre, oun kran halauter yaake har les lenge o Israeleskro Devel penas oun pal i laba, kay penan i raya pral o them Persia, o Cyrus, o Darius oun o Artaxerxes.

¹⁵ Oun koy tseli boudi vas kerdo ap o triinto dives an o čon Adar. Kova his, har o Darius an o shobto bersh o baro ray his.

¹⁶ Oun i Israelitarya, i rashaya, i Levitarya oun kolla vavar, kay van dran o pandepen pale pale, rikran kol bare divessa i barhtele djiyentsa, kay dan le o Debleskro nevo kheer an leskre vasta.

¹⁷ Koleske anan le an o Debleskro kheer 100 (sheel) gourma, 200 (douy-sheel) bakre, oun star-sheel (400) terne bakre, te venn le maredo o Debleske, ninna deesh-te-douy morsh bouzya, yek haki bari familyake, hoy vell o deesh-te-douy Israeleskre čavendar. Kol bouzya van rhačedo o Debleske, te vell i doosh i Israelendar krik lino.

¹⁸ Oun yon čivan i rashayen oun i Levitaryen an pengri boudi dren an o Debleskro kheer an Yerusalem, oun kran vin, have rashaya hounte khetne boudrenn, oun have Levitarya hounte khetne boudrenn. Lauter kran le yaake har tele činlo vas an o Moseskre lila.

I bare divessa Passa venn rikedo

¹⁹ Oun kolla, kay van dran o pandepen pale an o them Israel, rikran o Passa ap o 14. (deesh-te-starto) dives an o ersto čon.

²⁰ Koleske thovan pen i Levitarya yaake har glan činlo his, te venn le djoudjo glan o Debleste. Oun hake morsha lendar his djoudjo oun maran i terne bakre, hoy venn Passa kharedo, lauterenge, kay van dran o pandepen pale, ninna lengre phralenge oun i rashayenge oun penge kokres.

²¹ Oun i Israelitarya, kay van dran o pandepen pale, rhan o Passa, oun lentsa khetne ninna i tsele vavar menshe an kava them, kay moukan pengre menshen, kay vavar deblen an-mangenn. Oun yon rikran pen kanna pash i Israelitaryen, te mangenn le kolengro Debles an. Kova hi o baro Devel.

²² Oun yon lauter rikran kol bare divessa, kay rhan le efta divessa maro, kay kek shoutlo yarro dren hi. Halauterenge his i gipaskro tsiro. O baro Devel das len barhtele djia oun kras, te dikas o ray pral o them Assour kamles ap lende. Yaake van lengre vasta zoreles, te nay kran le o kheer o Israeleskro Debleske.