Esra 5 - O Debleskro Lab 2024 (Sinte-Manouche)

I boudi ap o Debleskro kheer djal pale doureder

¹ Oun o Debleskre rakepangre, o Haggay oun o Zakarie, koleskro dad o Iddo his, kolla rakran i biboldentsa, kay djivan an o them Youda oun an o foro Yerusalem, oun penan lenge, hoy lengro Devel, ko Devel pral o Israel, lenge kal biboldenge penas.

² Kote kran pen ap i boudi o Zorobabel, koleskro dad o Shealtiel his, oun o Yeshoua, koleskro dad o Yozadak his. Oun yon boudran doureder ap o Debleskro kheer an Yerusalem. Oun lentsa khetne boudran o Debleskre rakepangre oun dan len zoor.

³ An ko tsiro van morsha pash lende: o Tattenay, ko his o pralstouno pral o them ap i vavar rig o panyestar Eufrat, oun o Shetar-Bosnay oun lengre mala oun penan: “Koon penas t'menge, te čivenn kava kheer pale pre oun te krenn kal massurya pale nevo?”

⁴ Oun palle poučan le lendar: “Har kharenn kol morsha, kay čivenn kava kheer pale pre?”

⁵ Oun o Debleskre yaka his pral i phoureder an o them Youda, oun yon nay boudran doureder, bis i liil pash o Darius bičedo vas oun i liil lestar pale pale vas.

⁶ Kava hi ko tele činlo liil, hoy vas bičedo ap o rayeste Darius. Kava liil moukas o Tattenay te činell khetne o morsheha Shetar-Bosnay oun lengre malentsa, kol čačepangre an o them, kay ap i vavar rig o panyestar Eufrat his.

⁷ Kalla hi i laba, hoy yon leske činan: O baro rayeske Darius boud barht!

⁸ Mer kamah touke te penell, kay mer nasham an o them Youda, pash o kheer o baro Deblestar. Ko kheer vell bare barrentsa kerdo. Oun kasht vell an i massurya dren čiddo. Oun i boudi vell mishto kerdo, oun djal an lengro vast sik doureder.

⁹ Kote poučam mer palle lengre pralstunendar: Koon penas t'menge, te krenn kava kheer oun te čivenn kal massurya pale pre?

¹⁰ Oun ninna poučam mer lendar pal lengre laba, yaake te nay činas mer len pre oun nay penas touke, koon i pralstoune pral kay boudi hi.

¹¹ Oun kova hi, hoy yon menge penan: “Mer ham i boudepangre o Deblestar, kay kras o bolepen oun i phoub, oun čivah kava kheer pale pre, kay glan boud bersha kate tardo his, oun koles i baro zorelo ray dran o them Israel moukas pre te čivell. Yaake his ko kheer shoukar koy tardo.

¹² Mare phoure rhoyran o bolepaskro Debles; oun palle das lo len an o vast o baro rayestar dran o them Babilonia. Kova his o Neboukadnezar, ko Kaldeari. Yob moukas kava kheer khetne te phagell, oun anas i menshen, kay kate djivan, an o them Babilonia.

¹³ An o ersto bersh, kay o Cyrus o baro ray pral o them Babilonia vas, moukas lo te penell, te vell kava Debleskro kheer pale pre-čiddo.

¹⁴ Ninna kol sonakangre oun roupene kotya, hoy čoras o Neboukadnezar dran o Debleskro kheer an Yerusalem, oun moukas len an peskro debleskro kheer te anell an o them Babilonia, kolen las o baro ray Cyrus pale vin, oun das halauter ko morsheste Sheshbazar. Koles čivas lo pral o them Youda,

¹⁵ oun penas ap leste: Le kal tsele kotya touha, oun dja an o foro Yerusalem, oun an len kote an o Debleskro kheer! Oun o Debleskro kheer hounte vell pre-čiddo kote, kay lo tardo his.

¹⁶ Kote vas o Sheshbazar oun čivas i telstoune barra pre o Debleskro khereske kate an Yerusalem. Yaake rah boudrah ap o Debleskro kheer, oun kova hi gomme gar tseles kerdo.”

¹⁷ Oun kanna, maro baro ray, te hi touke mishto, palle mouk an tiro kheer pal te dikell, kote kay tiro bravlepen oun i phoure familyakre lila hi, te hi čačo, kay moukas o baro ray Cyrus te penell, te vell o Debleskro kheer an o foro Yerusalem pale pre-čiddo. Oun ab yaake kamles oun mouk men te djinell, hoy tou pral kova peneh.