Esra 4 - O Debleskro Lab 2024 (Sinte-Manouche)

I boudi ap o Debleskro kheer nay djal gar doureder

¹ I vavar menshe an o them, kolla, kay kaman gar i bibolden dran i khera Youda oun Benyamin, yon shounan, te krenn kolla, kay van pale pale dran o them Babilonia, i nevo kheer o baro Debleske, kay o Israeleskro Devel hi.

² Koy djan le pash o Zorobabel oun pash i familyengre pralstunende oun penan: “Mer kamah t'mentsa o Debleske i kheer te krell. Mer mangah ninna t'maro Debles an, oun maram leske firhen, yaake rah har o baro ray pral o them Assour, o Asarhaddon, men halauter kate an kava them moukas te anell.”

³ Kote penan lenge o Zorobabel oun o Yeshoua oun i familyengre pralstune: “Kova hi gar mishto, te krenn t'mer oun mer khetne o Debleskro kheer. Mer kokres kamah o kheer te krell o baro Debleske, kay o Israeleskro Devel hi. Kova penas menge yaake o baro ray pral o them Persia, o Cyrus.”

⁴ Kote kran kol vavar menshe, kay djivan ninna an o them, i biboldenge o djipen phares. Oun yon kaman len daar te krell, te boudrenn le bouder gar doureder ap o Debleskro kheer.

⁵ Oun yon dan kolende love, kay boudran o baro rayeske, te rikrenn yon kova pre, hoy i bibolde penge glan lan. Kova kran le yaake rah, har o Cyrus o baro ray pral o them Persia his, oun gomme an ko tsiro, kay o Darius o baro ray pral o them Persia his.

⁶ Oun har o Ahasveros baro ray vas, an leskro ersto bersh, činan le i foullo liil pral i menshende dran o them Youda oun Yerusalem.

⁷ Oun an ko tsiro, har o Artaxerxes o baro ray his, činan o Bishlam, o Mitredat, o Tabeel oun lengre mala i čilačo liil o rayeske pral o them Persia. Ko liil his činlo an o aramtikro činepen oun an o aramtikro rakepen.

⁸ Ninna o pralstouno Rehoum oun o Shimshay, kay hayvas lila te činell, kolla douy činan i foullo liil pral Yerusalem, oun bičran les pash o baro rayeste Artaxerxes. An ko liil his tardo:

⁹ Mer, o pralstouno Rehoum oun o činepaskro, o Shimshay, oun kolla vavar halauter, i čačepangre morsha, i bare lourde, i činepangre, oun i vavar pralstoune, oun i morsha dran Erek, dran Babilon, oun dran Susa, kolla hi i Elamarya,

¹⁰ mer činah kava liil khetne i menshentsa dran kol vavar themma, kolen o baro oun zorelo Asenappar an kava them moukas te anell, te djivenn le an o foro Samaria oun an i vavar forya ap i vavar rig o panyestar Eufrat.

¹¹ Oun kal laba his tardo an ko liil: Ap o baro rayeste Artaxerxes, i morshendar ap i vavar rig o panyestar Eufrat. Mer ham tire boudepangre,

¹² oun kamah touke te penell, kay i bibolde, kolla kay dran tiro them kay pral pash mende van, kolla hi kanna an o foro Yerusalem oun kamenn ko foro pale pre te čivell, ko foro, kolestar i menshe yaake divyo oun čilačo hi. Yon čivenn bar ap bar, te venn i massurya ko forestar kerdo. I telstoune barra hi pale neves čiddo.

¹³ Mer halauter hounte penas o baro rayeske: Kava foro te vell neves kerdo, oun i massurya hi pale tardo, denn i menshe bouder kek themeskre love, vitar kek foreskre love, oun vavar koova vitar gar. Kek love venn kolendar pash maro rayeste.

¹⁴ Mer halauter rikrah pash o baro rayeste oun rhah o loon dran leskro kheer, oun mer kamah gar te dikell, har vell ladj ap o baro rayeste anlo. Doleske bičrah leske kava liil.

¹⁵ Mouk pal te dikell an i familyakre lila tire phourendar, palle hatseh oun dikeh, kay kava foro pes pre hadas, oun pral vavar rayende oun themma doosh anas. Ninna an i phoure tsirya hadan pen i menshe an kava foro pre. Doleske vas kava foro ninna khetne maredo, oun kek bar ačas ap o vavar.

¹⁶ Oun kanna penah mer o baro rayeske, kay yob bouder či an peskro vast nay rikrella, hoy ap i vavar rig o panyestar Eufrat čiddo hi, te vell kava foro pale neves kerdo, oun i massurya pale pre-čiddo venn.

¹⁷ Koy bičras lenge o ray pral o them Babilonia kava liil oun moukas lenge te penell: Touke Rehoum, ko pralstuneske oun touke Shimshay, ko činepaskro, oun t'menge vavarenge halauterenge an o foro Samaria oun kol vavarenge halauterenge ap i vavar rig o panyestar Eufrat: Barht t'mentsa!

¹⁸ Oun kanna kamau t'menge te penell: Ko liil, kay t'mer mange činan, vas mange lab pal lab glan dravedo.

¹⁹ Oun har me les penom, vas pal diklo, oun halauter hi čačepen, hoy t'mer mange činan, kay hadas pes ko foro pale te pale an o phouro tsiro oun anas čingepen i tsele rayenge, oun peras tele lengre rayentsa.

²⁰ Ninna his zorele bare raya an o foro Yerusalem, kay his i raya pral halauter, hoy ap i vavar rig o panyestar Eufrat djivella, yaake kay vas lenge hounte themeskre love dino, ninna foreskre love oun vavar koova.

²¹ Doleske kamau, te penenn t'mer kol menshenge zoreles, te nay boudrenn le gar doureder, te nay vell ko foro gar pale pre-čiddo, yaake rah bis te me penau i vavar lab!

²² Denn yak, te krenn kova sik, te vell kek doosh pral maro them, oun te nashrap kek love.

²³ Oun ko liil o baro rayestar Artaxerxes vas dravedo glan o Rehoum oun ko činepaskro, o Shimshay, oun glan kol tsele vavar morshende, kay pash lende his. Koy djan le sik an o foro Yerusalem pash i bibolde, oun rikran len zoryah pengri boudyatar pale, yaake te nay boudran le bouder gar doureder.

²⁴ Kote ačas i boudi ap o Debleskro kheer an o foro Yerusalem tardo. Oun kova ačas yaake bis o ray Darius an o douyto bersh o baro ray his pral o them Persia.