Esra 1 - O Debleskro Lab 2024 (Sinte-Manouche)

I bibolde nay djan pale khere

¹ An o ersto bersh, kay o Cyrus o baro ray pral o them Persia his, kras o baro Devel, te vas ko lab čačo, hoy lo ap o Yeremia rakras, oun kova i menshenge doureder penas. O baro Devel das o baro rayeske, o Cyrus an o dji, te moukell lo an peskro tselo them vin te kharell oun i lilendar halauterenge te penell:

² Yaake rakrell o Cyrus, ko ray pral o them Persia: O baro Devel an o bolepen das man i tsele themma ap kay phoub. Oun yob penas mange, te krap leske i kheer an o foro Yerusalem an o them Youda.

³ Koon kanna mank t'mende leskre menshendar hi, koleha te vell peskro Devel! Oun yob nay djal pral an o foro Yerusalem an o them Youda, oun nay čivell o baro Debleskro kheer pre! Kova hi o Israeleskro Devel. Oun yob rodas peske o foro Yerusalem vin, te vell lo kote an-mangedo.

⁴ Oun hakeno, kay pral ačas o Debleskre menshendar, kay lo ninna djivell an kava them, koleske hounte venn kolla ap i rig, pash kolende yob djivell, oun hounte denn les roup oun sonakay oun firhe oun vavar lačo koova. Oun hoy hakeno pestar kamell te dell, te vell o baro Debleskro kheer pre-čiddo an o foro Yerusalem, kova hi hakeneskro koova kokres.

⁵ Kote kran le pen ap o drom, te čivenn le o baro Debleskro kheer pale pre an o foro Yerusalem. Kolla, kay djan, his i pralstoune pengre familyendar dran Youda oun Benyamin, ninna i rashaya oun i Levitarya, halauter kolla, kolenge o Devel o dji pre kras, te djan le kote.

⁶ Oun halauter, kay troul lende trouyel djivan, kran lengre vasta zoreles oun dan len roup, sonakay, vavar lačo oun kouč koova oun firhe, ninna vavar koova, hoy yon len dran pengro kamlepen dan.

⁷ Oun o baro ray Cyrus das len o tselo koova, hoy an o baro Debleskro kheer tardo his. Glan boud bersha moukas les o Neboukadnezar dran o foro Yerusalem te anell oun čivas les an o kheer leskro deblestar.

⁸ Oun o Cyrus, ko ray pral Persia, das halauter an o vast kolestar, kay pral o bravlepen his. Leskro lab his Mitredat. Oun o Mitredat činas kol tsele koola an i liil, oun das ko liil o Sheshbazar. Kova his o pralstouno pral o them Youda.

⁹ Oun yaake boud koola his kote: 30 (triyanda) sonakangre čare 1.000 (yek zero) roupene čare 29 (biish-te-enya) čourya

¹⁰ 30 (triyanda) sonakangre khore oun 410 (star-sheel-te-deesh) roupene khore oun 1.000 (yek zero) vavar koola.

¹¹ Kol tsele koola dran sonakay oun roup his khetne 5.400 (panč-zerya-star-sheel). Halauter anas o Sheshbazar pral an o foro Yerusalem. Oun pash leste his kol tsele menshe, kay van krik anlo an o them Babilonia, oun djan kanna leha pale an o foro Yerusalem.