Efesarja 5 - O Debleskro Lab 2024 (Sinte-Manouche)

O Devel sikrell men, har te djivas maro nevo djipen

¹ T'mer han o Debleskre čave. Oun yob kamell t'men i tselo djiyeha. Doleske krenn lauter yaake, har o Devel kova krella,

² oun djivenn an o kamlepen, yaake har o Yezous Kristo peskro kamlepen mende sikras, har yob menge meras. Oun yaake das lo peskro djipen o Debleske. Oun o Devel dikas lačes ap leste.

³ T'mer han o Debleskre menshe. Doleske krenn kek vi-ladjedo oun djoungelo koova! Nashenn vitar gar pal i love! Hi gar mishto, te vell pral savo koova mank t'mende rakedo!

⁴ Hi vitar gar čačo o Debleskre čavenge, te rakrenn le djoungele laba, dinelo koova, oun sapaskro koova, hoy či moldo hi! T'mare labentsa sharenn o Debles, oun parkrenn t'men pash leste! Kova krenn oun gar ko vavar!

⁵ T'mer hounte djinenn: An o bolepen, kay hi o Yezous Kristo oun o Devel i raya, kote venn kek morsha dren, kay sovenn vavar djouvyentsa, vitar kek djouvya, kay sovenn vavar morshentsa, vitar kek, kay krell djoungelo koova, vitar kek, kay nashell pal i love. Kova, kay nashell pal i love, koleske hi o bravlepen peskro devel.

⁶ Ma patsenn kekes, kay penell t'menge, te nay krenn kova lauter! Koon kova penella, hi i rhorheno. O Debleskri rholi vell ap kolende, kay gar ap o Debleste shounenna, oun krenna savo čilačo koova.

Rikrenn t'men kolendar pale, kay krenn čilačo koova!

⁷ Rikrenn t'men kolendar pale, kay kova lauter krenna!

⁸ Glan ko tsiro, har t'mer patslo van, djan t'mer ap o čilačo drom. Kova his har te djans an i rati. Kanna hi kova vavarčandes. Maro ray Yezous djivell an t'mare djia, oun anas t'men ap peskro drom. Yob hi i bari momeli t'menge. Djan kanna ap leskro drom, kay hi bouder kek tamlepen!

⁹ Lauter kolla, kay ap leskro drom djana, krenn kova, hoy lačo oun čačo hi, oun penenn o čačepen.

¹⁰ Rodenn pal kova, hoy hi mishto glan o Yezouseste, maro rayeste!

¹¹ Ma djan ap o čilačo drom kolentsa, kay krenna, hoy či moldo oun čilačo hi! Sike lende, har čilačo kova hi!

¹² Kova, hoy yon čorrhanes krenna, hi yaake djoungelo, te hounte ladjell kova pes, kay kolestar rakrella.

¹³ Te sikrah len lengro čilačo koova, hi kova yaake, har te anams ko koova pash i momeli. Oun yon dikenn les ninna.

¹⁴ Oun kova, hoy diklo vella, ačell gar an o tamlepen.

¹⁵ Denn yak koy pre, har t'mer t'maro djipen djivenna! Ma djivenn har dinele menshe! Djivenn har kolla, kay djinenna, hoy mishto hi!

¹⁶ Hako kopo, kay krenn nay lačo koova, krenn kova! Kava tsiro, kay djivah, hi čilačo.

¹⁷ Doleske krenn t'maro dji pre, te hayvenn, hoy o ray Yezous t'mendar kamella!

¹⁸ Ma piyenn yaake boud mool, te venn mato! Te han mato, palle krenn t'mer hako dinelo koova. Moukenn o Debleskro Dourho o ray an t'mende te vell, oun venn pherdo lestar!

¹⁹ Givenn lauter khetne o Debleskre gilya oun save gilya, hoy sharenn o Debles, ninna save gilya, hoy o Debleskro Dourho an t'mende čivella! Givenn oun bashrenn o tselo djiyestar o Yezouseske, maro rayeske!

²⁰ Parkrenn t'men hako tsiro pash o Debleste, maro dadeste, lautereske, hoy das lo t'men! Krenn kova an o lab maro rayestar, o Yezous Kristestar!

Kek t'mendar hounte hadell pes pral o vavareste

²¹ O Yezous Kristo hi t'maro ray. Oun t'mer penenn Ray ap leste. Doleske hounte hadell pes kek t'mendar pral o vavareste.

I lab ap i djouvyende oun ap i morshende

²² T'mer djouvya, ma hadenn t'men pral t'mare romende! Yaake sikrenn t'mer, kay hi o Yezous Kristo t'maro ray.

²³ O rom hi o ray pral i djouvyate yaake, har hi o Yezous Kristo o ray pral i tsele patslende. Kolen las yob dran o čilačepen vin. Yon hi leskre menshe.

²⁴ Yaake har kol tsele patsle ap o Yezous Kristeste shounenna, yaake hounte shounenn ninna i romya ap pengre romende an hako koova.

²⁵ T'mer morsha, avenn yaake kamlo ap t'mare romyende, har o Yezous Kristo kamlo hi ap i patslende! Yob das peskro djipen lenge an o merepen,

²⁶ te venn le erligo oun djoudjo glan leste. Yob thovas lengri doosh lendar tele, har patsan le leskro lab, oun van leske an o pani thodo.

²⁷ Yaake kras lo len rayles oun shoukar. Kek djoungelo oun čilačo koova hi ap lende. Djoudjo oun erligo hi le glan leste tardo.

²⁸ Yaake hounte vell i morsh yaake kamlo ap peskri romyate har hi lo kamlo ap peste! Te hi lo kamlo ap peskri romyate, hi kova yaake har te vals lo kamlo ap peste.

²⁹ Kek hi čilačo ap peste. Na-a, yob krell peske lauter lačo koova. Yaake krell kova o Yezous Kristo i patslenge ninna.

³⁰ Mer ham leskri familya.

³¹ An o Debleskro lab hi činlo: Doleske moukell i morsh peskro dades oun peskri da, te djivell lo peskri romyah khetne. Oun kol douy venna yek familya.

³² Kava lab sikrell men i baro čačepen. Me rakrau o Yezous Kristestar oun kolendar, kay ap leste patsenna.

³³ Ninna te hayvau me kava lab yaake, penell kava lab t'menge: Hakeno hounte vell yaake kamlo ap peskri romyate, har yob kamlo ap peste hi! Oun i romni hounte vell lačo ap peskro romeste!