Debleskro tsiro 8 - O Debleskro Lab 2024 (Sinte-Manouche)

O mangepen o Debleske menshendar

¹ Oun har o terno bakro i eftati dori pre pandas, hoy ko liil khetne rikras, rakras kek bouder an o bolepen. I tikno tsiro rakran le či bouder.

² Oun me dikom kol efta bolepangren, kay glan o Debleskro beshepaskro tardo hi. Kolla lan efta phourdepangren.

³ Oun i vavar bolepaskro vas, oun djas pash o Debleskri rhačepaskri. Les his i sonakaskro čaro an o vast, an koleste goudlo kasht rhačedo vella, hoy mishto soungella. Oun ko bolepaskro las boud goudlo kasht, te rhačrell lo les ap o Debleskro sonakaskro bob, hoy glan o Debleskro beshepaskro tardo hi, te vell o lačo soungepen khetne o mangepah, hoy o Debleskre čave o Deblestar mangan.

⁴ Oun ko lačo soungepen hadas pes pre dran leskro vast, oun djas glan o Debleste khetne o mangepah kol Debleskre menshendar.

⁵ Oun ko bolepaskro las ko čaro, an koleste ko goudlo kasht rhačedo vella, oun kras les pherdi yag, hoy yob dran o Debleskri rhačepaskri las, oun čoras o čaro vin ap i phoub. Koy das yag karye pral oun tele, oun das bari zoreli gole, har koy gole, hoy o bolepen krella, te dell baro brishin, oun te djal yag tele ap i phoub. Oun i phoub trissas zoreles.

I star phourdepangre

⁶ Oun kol efta bolepangre, kay his len kol efta phourdepangre, lan len an i vasta, te phourdenn le dren.

⁷ Oun o glanstouno phourdas an peskri phourdepaskri. Koy das brishin, hoy his har barra, oun yag o rateha mashkral ap i phoub. Oun o triinto kotar i tseli phoubyatar rhačras, oun o triinto kotar i tsele roukendar rhačras, ninna o tselo zenlepen.

⁸ Oun o douyto bolepaskro phourdas an peskri phourdepaskri. Koy vas i bari kotar bar, hoy rhačella, an o baro pani vitsedo. Oun o triinto kotar o tselo baro panyestar vas har o rat.

⁹ Koy meras o triinto kotar lauterestar, hoy an o baro pani djivas. Ninna hako triinto shiffo djas paash.

¹⁰ Oun ko triinto bolepaskro phourdas an peskri phourdepaskri: Oun i bolepaskri momeli rhačas har yag, oun peras tele ap i phoub. Oun koya peras ap o triinto kotar hako lengsto panyestar, ninna ap ko pani, hoy vella dran i phoub vin.

¹¹ Oun ko bolepaskri momeli kharella shout. Oun o triinto kotar kol panyestar vas shoutlo. Oun boud kol menshendar, kay piyan ko pani, meran lestar.

¹² Oun o starto bolepaskro phourdas an peskri phourdepaskri. Oun o kham las i dap, oun o triinto kotar lestar vas kalo. Ninna o čon oun i vavar bolepangre momlia lan i dap. Oun o triinto kotar lendar vas kalo. Yaake rhačas o kham gar ap o triinto kotar ap o dives, vitar gar rhačan o čon oun i bolepangre momlia ap o triinto kotar an i rat.

¹³ Oun me dikom dour pral ap o bolepen i baro čirkles, oun shounom, har yob gole das: Bibarht, bibarht, bibarht! Te phourdenn i vavar triin bolepangre an pengre phourdepangren, palle vella i bari bibarht ap kolende, kay ap i phoub djivenna.