Debleskro tsiro 7 - O Debleskro Lab 2024 (Sinte-Manouche)

O sikepen ap kolende, kay o Debleske boudran

¹ Oun pal kova dikom me star bolepangren. Kolla his tardo ap kol star rigya i phoubyatar, oun rikran ko zorelo dourho pale, hoy phourdell dran hake star rigya pral i phoub. Yon rikran les pale, te phourdell lo gar pral i phoub, vitar gar pral o baro pani, vitar gar pral i tsele rouka.

² Oun me dikom i vavar bolepaskres. Kova vas kol rigyatar, kay o kham pre djala. Oun yob kras i sikepen ap kolende, kay o djido Debleske koy hi. Oun yob das zoreles gole ap kol star bolepangre, kolen i zoor dino vas, te doukrenn le i phoub oun o baro pani.

³ Oun yob penas ap lende: “Ma doukrenn i phoub oun o baro pani, vitar gar i rouka, yaake rah har mer kram gar i sikepen glan ap i shere kolendar, kay maro Debleske boudran.”

⁴ Oun me shounom kitse menshe ko sikepen lan. Kolla his 144.000 (yek-sheel-te-star-deesh-te-star zerya) menshe, kay van dran i tsele menshende, kay venna pal o Israeleskre deesh-te-douy čavende.

^5-8 Deesh-te-douy zerya venna dran o Youda. Deesh-te-douy zerya venna dran o Ruben. Deesh-te-douy zerya venna dran o Gad. Deesh-te-douy zerya venna dran o Asser. Deesh-te-douy zerya venna dran o Naftali. Deesh-te-douy zerya venna dran o Manasse. Deesh-te-douy zerya venna dran o Simeon. Deesh-te-douy zerya venna dran o Levi. Deesh-te-douy zerya venna dran o Issakar. Deesh-te-douy zerya venna dran o Zabulon. Deesh-te-douy zerya venna dran o Yosef. Deesh-te-douy zerya venna dran o Benyamin.

I patsle dran boud themma sharenn o Debles

⁹ Pal kova dikom me boud menshen, yaake boud, te nay penell kek, kitse yon hi. Kolla venna dran hako them, haki natsyona, haki harmenatsyona oun hako rakepen. Oun yon his khetne tardo glan o rayeskro beshepaskro oun glan ko terno bakro. Len his parne ripya ap lende oun bare patria an lengre vasta.

¹⁰ Oun yon dan zoreles gole: “Mer sharah maro Debles, kay ap o rayeskro beshepaskro beshdo hi oun ko terno bakres! Yon lan men vin dran o čilačepen oun o merepen.”

¹¹ Oun i tsele bolepangre his tardo troul o rayeskro beshepaskro oun troul i čačepangre phourende oun troul i star zorele bolepangre. Oun yon vitsran pen glan o rayeskro beshepaskro tele o mouyeha ap i phoub, oun sharan o Debles.

¹² Oun yon penan: “Hi mishto, te givas mer gilya maro Debleske, hoy les hadenna, oun hoy les bares krenna. Leskro raylepen oun gosvepen hi baro. Oun les hi bari zoor. Hi mishto, te parkras men pash leste, oun te sharas les, kanna oun hako tsireske. Amen!”

¹³ Oun yek kol čačepangre phourendar poučas mandar: “Koon hi kolla, kay hi len parne ripya ap lende? Kay van le?”

¹⁴ Oun me penom ap leste: “Miro ray, tou djineh les.” Oun yob penas ap mande: “Kolla van zoreles palla lino, oun van vin dran ko pharo tsiro. Oun yon thovan pengre ripya, oun kran len parno an o terno bakreskro rat.”

¹⁵ Doleske hi le tardo glan o Debleskro beshepaskro oun hi leskre rashaya an leskro kheer, oun hi leske koy o tselo dives oun i tseli rat. Oun kova, kay ap o Debleskro beshepaskro beshdo hi, djivell pash lende, oun dell yak ap lende.

¹⁶ Oun yon hounte bokenn bouder gar, vitar gar troushenn le bouder. Oun o kham rhačrell len bouder gar, vitar kek vavar tatepen.

¹⁷ O terno bakro, hoy mashkral o Debleskro beshepaskro hi, kova dell yak ap lende, har i bakrengro ray ap peskre bakre yak della, oun anell len pash o pani, hoy o djipen della. Oun o Devel khossell hake sva ap lengre yaka tele.