Debleskro tsiro 6 - O Debleskro Lab 2024 (Sinte-Manouche)

I star graya

¹ Oun me dikom, har ko terno bakro yek kol efta doryendar pre pandas, hoy ko liil khetne rikrenna. Oun me shounom, har yek kol star zorele bolepangrendar zoreles penas: “Ab!”

² Oun me dikom i parno grayes. Oun kova, kay pre beshdo hi, koles hi i bogo an o vast. Oun les vas i shereskro sonakay dino, hoy sikrella, te hi yob zorleder har boud vavar bare raya. Oun yob djas vin an o kourepen, oun vas zorleder har yon halauter.

³ Oun o bakro pandas o douyti dori pre, hoy ko liil khetne rikras. Oun me shounom, har ko douyto zorelo bolepaskro penas: “Ab!”

⁴ Oun i vavar gray vas vin. Ko gray his lolo har i yag. Oun kova, hoy pre beshdo his, koles vas i zoor dino, te anell lo o kourepen ap i phoub, yaake te marenn pen i menshe. Oun les vas i baro rharo dino.

⁵ Oun o terno bakro pandas i triinti dori pre, hoy ko liil khetne rikras. Oun me shounom, har o triinto zorelo bolepaskro penas: “Ab!” Oun me dikom i kalo grayes. Oun kova, kay pre beshdo his, koles his yek koova an peskro vast, hoy sikrella, har pharo čomone hi.

⁶ Oun me shounom i rakepen, hoy vas mashkral kote vin, kay kol star zorele bolepangre tardo hi, oun penas: “Yek dives hounte boudrenn le, te ginenn le yek čaro gib. Oun yek dives hounte boudrenn le, te ginenn le triin čare djob. O djet oun i mool ačenna, har yon hi. Kolenge hounte playsrenn le gar boudeder.”

⁷ Oun o terno bakro pandas i starti dori pre, hoy ko liil khetne rikras. Oun me shounom, har o starto zorelo bolepaskro penas: “Ab!”

⁸ Oun me dikom i grayes. Kova his parno har i moulo. Oun kova, kay pre beshdo his, koleskro lab his “Moulo.” Oun o merepen vas pal leste. Oun les vas i zoor dino, te marell lo i menshen ap o starto kotar i phoubyatar. O rharo, i divye firhe, i bok oun o nasslepen marenn len.

O Debleskre boudepangre, kay leske maredo van

⁹ Oun o terno bakro pandas i pančti dori pre, hoy rikras ko liil khetne. Oun me dikom kol tsele menshen, kay rikran zoreles ap o Debleskro lab, oun sikran i menshende o Debleskro drom, oun van doleske maredo. Yon his tardo pash o Debleskri rhačepaskri.

¹⁰ Oun dan zoreles gole oun penan: “Baro Devel oun čačo ray, ab sik oun rake i phagi vin pral kolende ap i phoub, kay maran men. De len ko čilačepen pale, hoy yon ap mende kran!”

¹¹ Oun hakenes lendar las i parno ripen. Oun yek penas ap lende: “Moukenn tele i tikno tsiro! T'mare phrala, kay boudrenn o Debleske har t'mer boudran, kolendar venna ninna maredo, yaake boud har o Devel moukell, te venn le maredo.”

I tsiro vas, kay i phoub tele djal

¹² Oun me dikom, har o terno bakro i shobti dori pre pandas, hoy ko liil khetne rikras. Koy trissas i phoub zoreles. Oun o kham vas kalo har i kalo gono. Oun o tselo čon vas lolo har o rat.

¹³ Oun i bolepangre momlia peran ap i phoub, yaake har perenn i brola ap i phoub tele, te phourdell i zorelo dourho an i broleskro rouk.

¹⁴ Oun o bolepen tserdas pes khetne, har i liil, hoy khetne lino vella. Oun kek berga ačas, kay his li tardo, vitar gar kek them, hoy an i pani čiddo hi.

¹⁵ Oun i tsele menshe khatran pen: i raya pral i themma ap i phoub, i bare oun i bravele, i lourdengre pralstoune oun vavar pralstoune, ninna i boudepangre oun lengre raya. Yon khatran pen an i phoub, oun mashkral i bare barra,

¹⁶ oun penan ap kol berge oun ap kol bare barra: “Perenn ap mende, oun khatrenn men kolestar, kay ap o rayeskro beshepaskro beshdo hi, oun koy bari rholyatar, hoy ko terno bakres hi!

¹⁷ Ko baro dives vas, kay lengri rholi ap mende vella. Oun kek nashte nashell lengri rholyatar krik.”