Debleskro tsiro 5 - O Debleskro Lab 2024 (Sinte-Manouche)O liil, hoy hi efta kope pandlo 1 Oun me dikom i liil an o čačo vast kolestar, kay ap o rayeskro beshepaskro beshdo hi. Ap ko liil his dren oun vin čomone činlo. Oun ko liil his khetne pandlo efta doryentsa. 2 Oun me dikom i zorelo bolepaskres, kova das zoreles gole: “Koon hi moldo, te nay krell lo ko liil pre, te dikell lo dren?” 3 Oun an o bolepen, oun ap i phoub, oun tel i phoub his kek koy, kay hi moldo, te krell lo ko liil pre, te dikell lo dren. 4 Oun har dikom, te his kek moldo, te krell lo ko liil pre, te dikell lo dren, koy rovom zoreles. 5 Oun yek kol čačepangre phourendar penas ap mande: “Ma rob! Dik, yek las i zoor o Deblestar pral o čilačepen oun o merepen, oun hi moldo, te krell lo ko liil pre, te dikell lo dren. Yob hi kova, kay kharenn le levo, kay vell dran o them Youda. Yob hi o Davideskro čavo.” 6 Oun me dikom i terno bakres pash o rayeskro beshepaskro, hoy vi-dikas, har vals lo maredo. Kova hi tardo mashkral kol star zorele bolepangre oun kol čačepangre phourende. Les hi efta shinga oun efta yaka. Kol efta yaka hi o Debleskro Dourho, hoy pral i tseli phoub vin bičedo vas. 7 Oun o terno bakro vas pash koleste, hoy ap o rayeskro beshepaskro beshdo his, oun las ko liil dran leskro čačo vast. 8 Oun har las yob o liil, peran kol star zorele bolepangre oun kol biish-te-star čačepangre phoure glan o terno bakro tele. Oun hakenes lendar his i bashepaskri. Oun yon bashran i shoukar bashepen. Len his ninna sonakangre čare pherdo goudlo kasht, hoy o Debleske rhačedo vella, oun mishto soungella. Ko goudlo kasht hi o mangepen, hoy o Debleskre menshe pengro Deblestar mangan. 9 Oun yon givenn i nevi gili, oun penenn: Tou hal moldo, te less ko liil, oun te kress ko liil pre. Tou val maredo, oun playsral tiro rateha, te giness menshen tiro Debleske. Kolla venna dran hako them, haki natsyona, haki harmenatsyona oun hako rakepen. 10 Oun tou kreh lendar raya oun rashaya maro Debleske. Oun yon venn raya pral i tseli phoub. 11 Oun me dikom oun shounom boud bolepangren tardo troul o rayeskro beshepaskro, oun troul kol star zorele bolepangre, oun troul kol čačepangre phourende. Yon his yaake boud har deesh zerya (10.000) kope deesh zerya oun yek zero kope yek zero. 12 Oun yon givenn zoreles: O terno bakro, hoy vas maredo, kova hi moldo, te vell les i bari zoor, ninna o bravlepen, oun o gosvepen, oun o sharepen, oun o raylepen, oun i gilya, hoy les hadenna, oun bares krenna. 13 Oun me shounom i gili, hoy lauter givan, kay an o bolepen hi, oun ap i phoub, oun tel i phoub, oun an o baro pani. Oun yon givenn: “Koleske, kay ap o rayeskro beshepaskro beshdo hi oun ko terno bakreske, kolenge hi i gilya, oun o sharepen, oun o raylepen, oun i zoor pral lauter, kanna oun hako tsireske.” 14 Oun kol star zorele bolepangre penan: Amen! Oun kol čačepangre phoure vitsran pen glan o Debleste oun glan o bakro tele, oun sharan len. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.