Debleskro tsiro 4 - O Debleskro Lab 2024 (Sinte-Manouche)

O rayeskro beshepaskro an o bolepen

¹ Pal kova dikom i voudar an o bolepen, hoy pre hi. Oun kova, kay ap mande rakras, oun leskri gole zorelo har i phourdepaskri his, kova penas ap mande: “Ab kate pre! Me sikrau tout, hoy pal kava vella.”

² Oun ap yek kopo vas o Debleskro Dourho zoreles ap mande, oun me dikom i rayeskro beshepaskro an o bolepen tardo. Oun ap koleste his yek beshdo.

³ Leskro mouy dikas yaake shoukar vin har kol kouč shoukar barra Yaspis oun Karneol. Oun troul o rayeskro beshepaskro his i brishineskro bogo, kay dikas yaake vin har ko shoukar bar Smaragdo.

⁴ Oun troul o rayeskro beshepaskro his biish-te-star vavar rayengre beshepangre tardo. Oun ap kolende his biish-te-star čačepangre phoure beshdo. Kolen his parne ripya ap lende, oun i shereskro sonakay ap lengre shere.

⁵ Oun kotar, kay ko rayeskro beshepaskro hi, das yag karye pral oun tele, oun vas i bari gole vin, har koy gole, hoy o bolepen krella, te dell baro brishin oun te djal yag tele ap i phoub. Oun glan o rayeskro beshepaskro rhačan efta yaga. Kol efta yaga hi o Debleskro Dourho.

⁶ Glan o rayeskro beshepaskro his čomone har i baro pani dran vali. Kova his yaake djoudjo, te dikenn le nay dren, har dikenn le an i vali. Troul o rayeskro beshepaskro his star zorele bolepangre, yek ap haki rig. Kolla his pherde yaka glan oun palla.

⁷ Oun ko glanstouno zorelo bolepaskro his har i bari margodja. Oun ko douyto zorelo bolepaskro his har i terni morshkani groumni. Oun ko triinto zorelo bolepaskres his i mouy har i menshes hi. Oun ko starto zorelo bolepaskro his har i baro čirklo an o bolepen.

⁸ Oun hakenes lendar his shob čirklengre moussya. Kolla his dren oun vin pherde yaka. Oun yon givenn o tselo dives oun i tseli rat: Lačo - oun čačo - har kek vavar - hi o Devel, ko ray pral halauter. Hako tsiro djivell lo, kanna, oun an ko tsiro, hoy his, oun hoy vella.

⁹ Oun yaake sharenn kol star zorele bolepangre koles, kay ap o rayeskro beshepaskro beshdo hi, oun yon hadenn les oun krenn les baro, oun parkrenn pen pash leste, kay djivell hako tsireske.

¹⁰ Hako kopo, kay krenn le kova, vitsrenn pen kol biish-te-star čačepangre phoure glan koleste tele, kay ap o rayeskro beshepaskro beshdo hi, oun sharenn koles, koleskro djipen gar pre-herella. Oun yon čivenn pengro sherengro sonakay glan o rayeskro beshepaskro tele, oun penenna:

¹¹ “Tou, o Devel, maro ray, tou hal moldo, te less o raylepen, oun o sharepen, oun i zoor. Tou kral o bolepen oun i phoub. Yaake, har tou kamal, yaake kral tou kova, oun vas kova.”