Debleskro tsiro 20 - O Debleskro Lab 2024 (Sinte-Manouche)

Yek zero bersh

¹ Oun me dikom i bolepaskres dran o bolepen tele te vell. Oun koles hi i klidepaskro an o vast, te pandell lo o telstunepen pre. Ninna i sasterno shello hi an leskro vast.

^2-3 Oun yob tapras ko baro lolo sap, kova hi ko phouro sap, hoy kharella ninna Beng oun Satan, oun pandas les, oun vitsras les an o telstunepen, te ačell lo kote yek zero (1.000) bersh pandlo. Oun o bolepaskro pandas i voudar tele, hoy anell an o telstunepen, yaake te krell kek o telstunepen pale pre. Oun an ko zero bersh nay anell o beng i menshen bouder gar o Debleskro dromestar tele. Pal ko tsiro hounte vell lo i tikno tsiro vin mouklo.

⁴ Oun me dikom kolen, kolenge o shero tele dino vas doleske, kay rikran le zoreles ap o Debleskro lab oun sikran i menshende o Yezouseskro drom. Yon mangan gar ko firhes an, vitar gar ko firhes, hoy i menshendar kerdo vas. Oun yon lan gar o firheskro lab ap pengre shere, vitar gar ap pengre vasta. Kalla lauter van kanna djido. Yon hi beshdo ap i rayengre beshepangre, oun lenn i zoor, te rakrenn le o čačepen vin pral i menshende. Khetne o Yezous Kristeha hi le raya yek zero bersh.

⁵ Yon hi kolla, kay glanstounes i moulendar pre stan. Oun kol vavar moule venn gar djido, yaake rah har ko zero bersh gar trouyel djan.

⁶ Barhtele hi kolla, kay hi mank kolende, kay venn glanstounes i moulendar djido. Yon hi o Debleskre menshe, oun merenn gar o douyto kopo. Yon hi i rashaya o baro Deblestar oun o Yezous Kristestar. Oun khetne leha hi le raya pral lauter yek zero bersh.

O beng vell an i bari yag vitsedo

⁷ Pal kol zero bersh vell o beng dran peskro stilepen vin mouklo.

⁸ Oun yob djal vin, te tserdell lo i menshen ap i tseli phoub ap peskro drom. Kolla menshe kharenna Gog oun Magog. Oun yon hi yaake boud, te penell nay kek, kitse yon hi. O beng anell len khetne, te djan le an o kourepen o Debleskre menshentsa.

⁹ Oun yon djan pral i tseli phoub, oun ačenn troul ko foro tardo, kay o Debleskre menshe djivenna. Kova hi ko foro, koles o Devel kamella o tselo djiyestar. Oun palle vell i yag dran o bolepen oun rhačrell kol tsele kourepangren pre.

¹⁰ Oun o beng, kay anas len ap peskro drom, vell an i bari yag vitsedo, hoy zoreles rhačella oun khandella. Kote hi ninna o firho, oun ko rhorheno rakepaskro. Kote vell len hako tsiro bare douka.

Pral i moulende vell o čačepen vi-rakedo

¹¹ Oun me dikom i baro parno beshepaskro oun koles, kay pre beshdo hi. I daryatar nashas i phoub oun o bolepen glan leste krik. Oun kek dikas len bouder pale.

¹² Oun me dikom i moulen: i bare har i tikne. Yon his tardo glan o Debleskro beshepaskro. Oun lila van pre kerdo, kay činlo hi, hoy i menshe kran. Pale vas ko djipaskro liil pre kerdo, kay kolla dren činlo hi, kay djivenna hako tsiro. Oun o čačepen vas vi-rakedo pral kol tsele moulende yaake, har an i lila dren činlo hi.

¹³ Oun o baro pani das peskre moulen vin, kay an leste hi. Oun o merepen oun o moulengro them dan pengre moulen vin, kay an lende hi. Oun pral lende vas o čačepen vi-rakedo yaake, har hakeno djivas ap i phoub.

^14-15 Oun o merepen oun o moulengro them van an i bari yag vitsedo, ninna hakenes, koneskro lab gar an o djipaskro liil dren činlo hi. Koon an i bari yag vitsedo vella, merell o douyto kopo.