Debleskro tsiro 16 - O Debleskro Lab 2024 (Sinte-Manouche)

I efta čare

¹ Oun me shounom, har yek dran o Debleskro kheer bari gole das oun ap kol efta bolepangre penas: “Djan vin oun čorenn kol efta čare, kay pherdo Debleskri rholi hi, pral i phoub vin!”

² Oun o glanstouno bolepaskro djas oun čoras peskro čaro vin pral i phoub. Koy vas i djoungelo oun čilačo nasslepen ap kol menshende, kay lan o firheskro lab ap pende, oun mangan o firhes an, hoy i menshendar kerdo vas.

³ Oun o douyto bolepaskro čoras peskro čaro vin pral o baro pani. Oun o pani vas rat, har i moulestar. Oun lauter meras, hoy an o baro pani djivas.

⁴ Oun o triinto bolepaskro čoras peskro čaro vin pral kol bare oun tikne panya, hoy venna dran i phoub vin. Oun kolla van rat.

⁵ Oun me shounom, har penas ko bolepaskro, koles i zoor pral i panya hi: “Tou, o baro Devel, djiveh kanna, har djival an o phouro tsiro. O čačepaskro Devel hal tou. Kova, hoy tou rakreh, hi mishto oun čačo.

⁶ Yon maran tire menshen, ninna tire rakepangren, oun moukan lengro rat te nashell. Oun kanna hounte piyenn le o rat. Kova hi lengri phagi.”

⁷ Oun me shounom, har yek pash o Debleskri rhačepaskri penas: “Ava, ray, maro zorelo Devel, mishto kral, kay tou dal len savi phagi.”

⁸ Oun o starto bolepaskro čoras peskro čaro vin pral o kham. Oun o kham las i zoor, te nay rhačrell lo i menshen.

⁹ Oun i menshe van zoreles rhačedo. Oun yon praasan o Debles, kay das len koy phagi. Oun yon moukan gar pengro čilačo drom, oun sharan o Debles gar.

¹⁰ Oun o pančto bolepaskro čoras peskro čaro vin pral o firho oun leskro them, kay yob o ray hi. Oun i rati vas ap lende. Oun leskre menshe dandran ap pengri čip i doukatar.

¹¹ Lengre douka dran o djoungelo nasslepen his yaake baro, kay praasan le o Debles an o bolepen. Oun yon moukan gar pengro čilačo koova, hoy yon kran.

¹² Oun o shobto bolepaskro čoras peskro čaro vin pral o baro pani, hoy kharella Eufrat. Oun ko pani djas pale. Yaake vas i drom kerdo kol rayenge, kay venna dran o them, kay o kham pre djal.

¹³ Oun me dikom triin benga, hoy dikan vin har djambe. Kolla van vin, yek dran o baro sapeskro mouy, yek dran o firheskro mouy, oun yek dran ko rakepaskro mouy, kay yob i rhorheno hi, oun krell pes, har te vals lo i Debleskro rakepaskro.

¹⁴ Kolla triin benga krenn baro oun zorelo koova, oun djan pash i rayende pral i tsele themma, te anenn yon pengre lourden khetne, te djan le an o kourepen ap o Debleskro baro dives.

^15-16 Oun i triin benga anan len khetne an i them, hoy kharella ap hebretikes: Harmagedon. Kanna shounenn, hoy o Yezous Kristo penella! Yob penella: “Me vau har i čorepaskro. Barhtelo hi kova, kay yak della, oun gar sovella, oun leskre koola ap leste hi, yaake te hi lo gar nango oun ladjella.”

¹⁷ Oun o eftato bolepaskro čoras peskro čaro vin an o dourho, hoy djal pral i phoub. Oun dran o Debleskro kheer vas i rakepen kote vin, kay o rayeskro beshepaskro hi, oun penas zoreles: “Kanna hi lauter kerdo.”

¹⁸ Koy das i yag dran o bolepen karye pre te tele, oun vas i bari gole vin, har koy gole, hoy o bolepen krella, te dell baro brishin oun te djal yag tele ap i phoub. Oun i phoub trissas yaake zoreles, har dikan le kova gar yaake rah, har menshe ap i phoub hi.

¹⁹ Oun o baro foro phagas an triin kotya. Oun i forya an i vavar themma peran khetne. O Devel bistras ko baro foro Babilon gar, oun moukas i menshen kote peskri rholi te piyell har mool.

²⁰ Oun hako them, hoy an o baro pani čiddo hi, djas tele. Oun i berge his bouder gar koy.

²¹ Oun das brishin har bare barra. Kolla his yaake pharo har i mensho, oun peran tele dran o bolepen ap i menshende. Har i menshe savi bari phagi lan, praasan le o Debles.