Debleskro tsiro 13 - O Debleskro Lab 2024 (Sinte-Manouche)

I douy bare firhe

¹ Oun me dikom dran o baro pani i firhes pre te vell. Koles his deesh shinga oun efta shere. Oun ap haki shing hidjras lo i shereskro sonakay. Oun ap leskre shere his save laba činlo, hoy praasenn o Debles.

² Oun ko firho, hoy me dikom, his har i bari divyi margodja. Leskre herya his baro oun zorelo. Oun an leskro mouy his bare danda. Oun ko baro lolo sap das les peskri zoor oun peskro beshepaskro, te vas ko firho i baro ray, koles boud penepaske hi.

³ Oun yek leskre sherendar his, har te vals lo maredo. Oun les hi i baro činepen. Oun ko činepen vas sasto. Oun i tsele menshe ap i phoub kran bare yaka oun djan ko firheske palla.

⁴ I menshe djinan, kova his o baro lolo sap, hoy das o firheste peskri zoor. Doleske sharan le o lolo sapes. Oun yon sharan ninna o firhes, oun penan: “Kek hi zorleder har o firho! Kek nay kourell pes leha oun vell zorleder!”

⁵ Oun o firho rakras oun phourdas pes pre oun praasas o Debles. Star-deesh-te-douy (42) čonna nay kras o firho kova.

⁶ Oun yob praasas o Debles, oun rakras djoungeles pral leskro lab oun leskro kheer. Ninna kolen, kay an o bolepen djivenna, praasas lo.

⁷ Oun o Devel moukas o firhes te kourell lo pes o Debleskre menshentsa, oun moukas, te vell lo zorleder har yon. Oun kol firhes vas i zoor pral i menshende dran hake themma, haki natsyona, haki harmenatsyona oun hako rakepen.

⁸ Lauter, hoy ap i phoub djivenna, sharenn ko firhes, – lauter kolla, kolengre laba gar činlo hi an o djipaskro liil. Kolla, kay lengre laba dren činlo hi an kava liil, hi yaake rah dren činlo, har i phoub koy hi. Kava liil hi o terno bakres, hoy maredo vas.

⁹ T'mer lauter, shounenn mishto, hoy t'menge penau!

¹⁰ Koon stildo hounte vell, kova vell stildo. Koon o rhareha maredo hounte vell, kova vell o rhareha maredo. Doleske hounte venn o Debleskre menshe zoreles tardo an o patsepen, te denn le gar pre.

¹¹ Oun me dikom i vavar firhes dran i phoub pre te vell. Oun les his douy shinga har i terno bakro. Oun yob rakras har o baro lolo sap.

¹² Les hi i tseli zoor, hoy ninna ko firhes hi, hoy dran o baro pani vas. Oun ko douyto firho kras, te sharenn i tsele menshe ap i phoub ko firhes, hoy dran o baro pani vas, koles ko baro činepen his, oun pale sasto vas. Oun ko firho, hoy dran o baro pani vas, kova dikas lauter, hoy ko douyto firho kras,

^13-14 oun das koles i zoor, te krell yob baro koova, yaake baro, te moukas lo ninna i yag dran o bolepen glan i menshende tele te perell. Oun kova kras lo, te anell lo i menshen ap i phoub ap o bengeskro drom. Yob penas lenge, te krenn le penge i firhes, hoy vi-dikella har ko firho, kay les his o činepen o rharestar, oun dran kova meras, oun pale djido vas.

¹⁵ Oun ko douyto firho las i zoor, te krell lo ko firhes djido, hoy i menshe penge kran, yaake te nay rakrell kova ninna, oun te nay krell yob, te venn lauter maredo, kay les gar an-mangenna.

¹⁶ Oun i tsele menshe hi an o vast ko firhestar: I bare har i tikne, i bravele har i čorvele, i raya oun i boudepangre. Kolla lauter hounte krenn i sikepen ap pende. Hi save, kay hounte činenn les ap pengro čačo vast. Vavar hounte činenn les glan ap pengro shero.

¹⁷ Ko sikepen nay vell o firheskro lab, ninna leskri noumra. Koles, kay ko lab gar ap peste hi, vitar gar leskri noumra, kova nashte ginell či, oun nashte bikrell či.

¹⁸ Kate hounte vell men gosvepen. Koon gosevo hi, kova nay hatsell ko lab vin. Ko lab hi i mensheskro lab. Leskri noumra hi triin shoba (666).