Debleskro tsiro 12 - O Debleskro Lab 2024 (Sinte-Manouche)

I djouvel oun o baro sap

¹ Oun i baro koova sikras pes ap o bolepen: I djouvel hi koy. Kolakro ripen hi o kham. Oun tel lakre pire hi o čon. Oun ap lakro shero hi deesh-te-douy bolepangre momlia.

² Oun yoy hi an vavar koova, oun lakro ternepen kamell te vell. Oun yoy dell gole i doukatar.

³ Oun i vavar baro koova sikras pes ap o bolepen: I baro lolo sap vas. Oun les hi efta shere oun deesh shinga. Oun ap hako shero hi shereskro sonakay.

⁴ Oun leskri pori tserdell o triinto kotar kol bolepangre momelendar krik, oun vitsras len tele ap i phoub. Oun ko baro lolo sap hi glan koy djouvyate tardo, kay an o tsiro vas, te vell o ternepen. Oun yaake sik, har ko ternepen vals, kamas les lo pre te rhal.

⁵ Oun yoy las i morsh čaves. Kova te vell o ray pral i menshende an i tsele themma ap i phoub. Yob anell len i sasterno vasteha. Oun lakro čavo vas pre hadedo pash o Debleste, oun pash leskro beshepaskro.

⁶ Oun koy djouvel nashas an o moulo them, kay kek menshe djivenna. Kote hi o Debles lake i kotar phoub, kay ačell li deesh-te-douy-sheel-te-shob-desha (1.260) divessa, oun lell halauter, hoy lat hounte vella djipaske.

O Mikael kourell pes o lolo sapeha

⁷ Oun an o bolepen vas i baro kourepen: O Mikael oun leskre bolepangre kouran pen o baro lolo sapeha oun leskre kourepangre.

⁸ Oun o Mikael oun leskre bolepangre his zorleder. Oun o baro lolo sap oun leskre kourepangre nashte ačenn bouder gar an o bolepen.

⁹ Oun o baro lolo sap vas vin vitsedo. Yob hi ko phouro sap, hoy kharella ninna Beng oun Satan, ko rhorheno, kay tserdell i menshen ap i tseli phoub ap peskro drom. Yob vas tele vitsedo ap i phoub, oun leskre kourepangre leha.

¹⁰ Oun me shounom i zorelo rakepen an o bolepen, hoy penas: Kanna las men maro Devel dran o bengeskro vast vin. Maro Devel sikras peskri zoor, oun vas o ray pral i tsele menshende ap i phoub. Oun yob das peskri tseli zoor koles, kay yob vin rodas, te vell lo o baro ray pral halauter. Tele vitsedo hi ko phoukepaskro, kay anas i doosh ap mare phralende glan o Debleste o dives oun i rati.

¹¹ Mare phrala his zorleder har ko phoukepaskro. O terno bakro, hoy maredo vas, kova thovas lengri doosh peskro rateha tele. Mare phrala sikran i menshende o čačo drom pash o Debleste, ninna te van le doleske maredo.

¹² Lauter kolla, kay djivenna an o bolepen, lengro dji dell gole i barhtyatar. Kol vavar, kay djivenn ap i phoub oun ap o baro pani, i bibarht vell ap lende. Pash lende vas o beng. Leske ačell gar boud tsiro. Kova djinell lo. Doleske hi les i bari rholi.

O lolo sap lell koy djouvyat palla

¹³ Oun har ko baro lolo sap dikas, te vas lo ap i phoub vitsedo, las lo koy djouvyat palla, kay ko čaves las.

¹⁴ Oun koy djouvyake van čirklengre moussya dino, har i baro čirkles hi, te nay djal li an o moulo them ap ko kotar phoub, kay yoy nay djivella dour krik ko sapestar. Kote ačell li triin-te-paash bersha. Oun kote lell li halauter te rhal oun te piyell.

¹⁵ Oun ko sap kras peskro mouy pre, oun čoungras boud zorelo pani pal koy djouvyate vin, te tassell li an ko pani.

¹⁶ Koy kras i phoub peskro mouy pre, oun piyas ko tselo zorelo pani, hoy ko baro lolo sap dran peskro mouy vin čoungras.

¹⁷ Oun ko baro lolo sap vas rhoyedo ap koy djouvyate, oun djas koy, te marell lo lakre čaven. Kolla hi kol menshe, kay shounenn ap o Debleskro lab, oun djan ap o Yezouseskro drom.

¹⁸ Oun o baro lolo sap his pash o baro pani tardo.