Debleskri gili 98 - O Debleskro Lab 2024 (Sinte-Manouche)O čačepaskro ray pral i phoub 1 I gili 1 I gili Givenn o baro Debleske i nevi gili! Yob kras baro koova. Peskro vasteha oun Debleskri zoryah vas lo o zorleder pral o čilačepen. 2 Yob moukell i menshenge an i tsele themma te penell, te lell lo len vin dran o čilačepen. Glan lende moukell lo peskro čačepen te dikell. 3 Yob bistras gar peskro lačepen o khereske Israel, oun rikrell peskro lab, hoy das lo lende. I tseli phoub dikas, har las lo len vin dran o čilačepen. 4 Givenn o baro Debleske, t'mer lauter, kay ap kay phoub han! Denn gole i barhtyatar, sharenn les i gilyentsa! 5 Bashrenn leske ap i harfa! Sharenn les o bashepah ap i doryengre bashepangre! 6 Bashrenn ap i phourdepangre oun shinga! Denn gole i barhtyatar glan o baro Debleste! Yob hi t'maro baro ray. 7 Mou vell o baro pani divyo i barhtyatar, oun lauter, hoy an leste djivell, ninna i tseli phoub, oun kolla, kay ap late djivenn. 8 T'mer bare lengste panya, denn an i vasta! T'mer berge, givenn i barhtyatar 9 glan o baro Debleste! Yob vella oun rakrell o čačepen vin pral i tseli phoub. Yob hi o čačepaskro ray pral i tsele themma, oun dell hakeneste pal kova, hoy lo kras. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.