Debleskri gili 97 - O Debleskro Lab 2024 (Sinte-Manouche)O Devel hi o baro ray, kay djal pal o čačepen 1 O baro Devel hi o baro ray! Doleske te givell i phoub oun sal! Ninna kol boud panyengre themma te venn le barhtelo! 2 Kale volke hi troul leste trouyel. Yob hi i baro ray, kay djal pal o čačepen, oun rakrell o čačepen vin pral i menshende. 3 Glan leste djal i yag, oun rhačrell halauteren, kay ap leste djan. 4 I yag dran o bolepen, hoy tele ap kay phoub karye dell, moukell i rat vin dikell har o dives. Oun i phoub dikell kova oun trissell. 5 Yaake har i momeli tele rhačrell, venna bare berge tikno glan o baro Debleste. Yob hi o baro ray pral i tseli phoub. 6 O bolepen sikrell leskro čačepen, oun leskro raylepen dikenn i tsele menshe. 7 Ladj ap kolende, kay krenn penge vavar debla, oun sharenn pen pengre moule deblentsa! Perenn tele ap i phoub, t'mer vavar debla, glan o baro Debleste! 8 Tou, baro Devel, hal i ray, kay djal pal o čačepen. Kova shounenn i menshe an o foro Sion oun hi barhtelo. Oun kolla an o them Youda sanenn oun khelenn i barhtyatar. 9 Tou, baro Devel, hal o pralstouno pral i tseli phoub. Tou hal bareder har i tsele debla. 10 T'mer, kay o baro Debles kamenna, stakrenn o čilačepen khetne. O baro Devel rikrell peskre vasta pral o djipen kolendar, kay leskre hi, oun lell len vin dran o vast i čilačendar. 11 I momeli djal pre koleske, kay an o čačepen tardo hi. Oun barhtelo vell kova, kay o čačo drom djal. 12 Avenn barhtelo pral o baro Debleste, t'mer, kay an o čačepen tardo han! Oun parkrenn t'men pash leste, kay kokres o čačo Devel hi! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.