Debleskri gili 96 - O Debleskro Lab 2024 (Sinte-Manouche)O Debleskro raylepen hi baro 1 Givenn o baro Debleske i nevi gili! T'mer menshe ap i tseli phoub givenn gilya o baro Debleske! 2 Givenn leske, o baro Debleske! Sharenn les! Penenn i menshenge, te hi yob kova, kay lell vin dran o čilačepen. 3 Penenn kolenge, kay les gar prindjrenna, havo raylepen les hi. Penenn i menshenge an hake themma havo baro koova yob kras. 4 O baro Devel hi o pralstouno, oun hakeno hounte sharell les. Mank i tsele vavar debla hi yob kova, konestar daras mer. 5 I debla i vavar menshendar hi rhorhene debla. O baro Devel hi kova, kay o bolepen kras. 6 Yob hi bareder har hako vavar. Shoukapen hi troul leste, Leskri zoor oun leskro raylepen venn diklo an leskro kheer. 7 T'mer dran i vavar themma, sharenn o baro Debles! Sharenn leskro raylepen oun leskri zoor! 8 Krenn leskro lab bares yaake har yob moldo hi! Avenn glan leskro kheer, oun anenn leske shoukar koova! 9 Mangenn o baro Debles an ap ko dives, kay vell lo an shoukar oun kouč ripya. I tseli phoub hounte trissell glan leste. 10 Penenn i tsele menshenge: O baro Devel hi o baro ray. Yob kras i phoub, te vell li zoreles tardo. Yob hi o čačepaskro ray pral i tsele themma oun djal pal o čačepen. 11 O bolepen vell barhtelo, oun i phoub sala. O baro pani stell i barhtyatar oun lauter, hoy an leste hi. 12 O them vell barhtelo oun lauter, hoy ap leste baro vas. I tsele rouka an o veesh givenna i barhtyatar 13 glan o baro Debleste. Yob vella. Ava, yob vella, oun anell o čačepen ap i phoub. Yob rakrell o čačepen vin pral i menshende an hake themma. Oun hi lengro čačepaskro ray, kay djal pal o čačepen. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.