Debleskri gili 95 - O Debleskro Lab 2024 (Sinte-Manouche)

Mer te sharas o baro Debles oun shounas ap leste

¹ Avenn, te givenn gilya o baro Debleske! Denn gole i barhtyatar glan leste! Yob hi maro rikepaskro, kay menge lauter mishto krella.

² Avenn glan leste, te parkras men pash leste, te givas leske gilya oun sharas les!

³ O baro Devel hi o pralstouno Devel, o baro ray pral i tsele debla.

⁴ An leskro vast hi o telstunepen i phoubyatar, oun i bareder berge hi ninna leskre.

⁵ Leskro hi o baro pani. Yob kras les. Ninna o them, yob kras les leskre vastentsa.

⁶ Avenn, mangas les an! Te djas ap mare čanga, oun peras tele glan o baro Debleste! Yob hi kova, kay kras men.

⁷ Yob hi maro Devel, oun mer ham leskre menshe. Yob dell yak ap mende har i bakrengro dell yak ap peskre bakre, oun anell len kote, kay hi len doha te rhal. Kava dives rakrell yob ap t'mende. Shounenn ap leskre laba:

⁸ Ma pandenn t'mare djia, har t'mare phoure kran ap i platsa Meriba oun Massa an o moulo tato them.

⁹ Fothe dikan le lauter, hoy lenge krom, patsan le gar, te hom me, o Devel, mank lende, oun nay dau len lauter, hoy len hounte vell djipaske.

¹⁰ Star-deesh bersha vas mange djoungeles, te dikom ap kol menshende, oun penom: “Kalla hi menshe, kay peran ap pengre sherya oun djinenn gar, hoy čačo hi. Ap miro drom kamenn le gar te djal.”

¹¹ Doleske dom man sovel an miri rholi: “Yon te djan gar dren an miro them, kay nay vans le khere!”