Debleskri gili 94 - O Debleskro Lab 2024 (Sinte-Manouche)O Devel hi o čačepaskro ray pral i phoub 1 Baro Devel, tou hal o Devel, kay o čilačepen pale deh kolenge, kay vavaren čilačepen kran. Ab, oun sike tout! 2 Tou hal o čačepaskro ray pral i tseli phoub, de kol pre-phourden pengri phagi! 3 Baro Devel, har rah nay krenn pen i čilače bares? Har rah? 4 Bare laba krenn le, sharenn pen kokres, kolla lauter, kay krenn i vavarenge čilačepen. 5 Tire menshen, baro Devel, rikrenn le tikno. Tire menshenge krenn le o djipen phares. 6 Kol djouvyen, kolengro rom meras, marenn le, ninna i vi-themaryen, oun kol čaven, kolen kek dad bouder hi, denn le moulo. 7 “O baro Devel”, penenn le, “dikell kova gar, o Yakobeskro Devel dell gar yak pre.” 8 Denn yak, t'mer dinele mank i menshende, t'mer narvele, kamenn gar gosevo te vell? 9 Kova, kay kras o kand, nay shounell kova gar? Kova, kay kras o yak, nay dikell kova gar? 10 Kova, kay i menshen an i vavar themma čingrell, dell lo t'men kek phagi? Yob hi o sikepaskro halauterendar – hi les kek gosvepen? 11 O baro Devel djinell, hoy an i menshengre sherya hi: lauter či-moldo koova. 12 Barhtelo hi kova, koneste tou, baro Devel, leskri doosh sikreh, koleste tou sikreh, har te djivell lo. 13 Yaake rikreh les pale te djal lo an peskri bibarht, bis te vell o čilačeske i phoub vin hadedo, te perell lo dren. 14 O baro Devel čivell peskre menshen gar pale, oun moukell gar len kokres. 15 I čačepangre morsha djan pale pal o čačepen. Oun lauter, kay o čačo drom djan, rikrenn pen ap kova. 16 Koon vell ap miri rig, te kouras men i čilačentsa? Koon vell pash mande, te djas mer khetne ap kolende, kay krenn midjak koova? 17 Vals o baro Devel gar ap miri rig, voms me yaake mishto har moulo. 18 Har penom, te perom, rikral man tou, baro Devel, an tiro lačepen. 19 Har his mange ropaske, rakral tou lačes ap miro dji, oun kral les pale zoreles. 20 Tou čival tout gar khetne kolentsa, kay čačepangre morsha hounte vans, oun yon djan gar pal o čačepen, oun penenn ap o rhorhepen: “Kova hi o čačepen.” 21 Yon čivenn pen khetne, te anenn le doosh ap koleste pre, kay an o čačepen tardo hi, oun denn koles i phagi, koles kek doosh hi, te vell lo maredo. 22 Miro baro Devel vas mange har i zorelo kheer. Pash leste, miro Debleste, nay vau oun khatrau man. 23 Yob moukell lengro midjak koova ap lende pale te perell, oun dran lengro čilačepen marell lo len. Ava, maro baro Devel marell len! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.