Debleskri gili 92 - O Debleskro Lab 2024 (Sinte-Manouche)

Hi shoukar, te parkrah men pash o Debleste

¹ I gili, te givell ap o Debleskro dives.

² Har shoukar hi, te parkrau man pash toute, o baro Debleste, te givau gilya touke, o pralstuneske,

³ te rakrau pral tiro lačepen taysarlakro, oun pral tiro čačepen an i rat,

⁴ te bashrau touke ap i deesh-doryengri bashepaskri oun ap i harfa.

⁵ Kova, hoy tou kral, baro Devel, moukell man barhteles te givell. Kova, hoy tire vasta lauter kran, sharau me.

⁶ Baro Devel, havo baro koova kral tou! Hi phares menge te hayvas, hoy touke an o shero djal.

⁷ I dinelo patsell kova gar; oun i narvelo hayvell les gar:

⁸ I čilače venn baro har o zenlepen. Kolenge, kay čilačo koova krenna, djal mishto. Kova lauter vell, te venn le krik lino hako tsireske.

⁹ Tou, baro Devel, hal o pralstouno, oun ačeh hake tsirenge.

¹⁰ Mer djinah, lauter, kay tout čilačepen kamenn, hounte merenn. Oun lauter, kay čilačo koova krenna, venn krik tradedo.

¹¹ Man kral tou zorelo har i divyo gouroum, oun makal man nevo djeteha, hoy pral mande čoral.

¹² Me dikau tele ap kolende, kay mange čilačepen kaman, oun shounau i gole kol čilačendar, kay hadan pen ap mande.

¹³ Kolla, kay an o čačepen tardo hi, venn zorelo har i zenele palmtikre rouka. Yon vell baro har i cedertikre rouka ap i berga Libanon.

¹⁴ Yon hi har rouka, kay hi tardo an o baro Debleskro kheer, oun kay venn zenelo ap i platsa glan o Debleskro kheer.

¹⁵ Ninna te venn le phouro, hi le zenele, pherdi zoor, oun roukengre venn ap lende baro.

¹⁶ Yaake dikah: O baro Devel krell lauter čačes. Yob hi har i baro zorelo bar, kay nay khatrau man, oun kek rhorhepen hi ap leste.