Debleskri gili 91 - O Debleskro Lab 2024 (Sinte-Manouche)

Barhtelo hi kova, kay pash o Debleste khere hi

¹ Kova, kay beshell tel o vast o Deblestar, ko pralstunestar, oun ačell pash leste, ko zorelo Debleste,

² kova penell ap o baro Debleste: “Pash toute hom khere. Tou hal mange har i baro zorelo kheer, miro Devel, ap toute dikau.”

³ O baro Devel dell yak ap toute, te peress gar an i dorya, hoy čivell kova touke, kay kamell tout te taprell. Ninna lell o Devel tiro djipen vin dran o nasslepen, hoy anell an o merepen.

⁴ Har i karhni peskre ternen tel leskre moussya khatrell, yaake khatrell o Devel tout tel leskre zorele moussya. Kote nay djal touke či. Yob rikrell tout yaake har lo penas. Doleske nay vell kek čilačepen ap toute.

⁵ Tou hounte tapress kek daar glan kova, hoy rati nay vella, vitar gar glan kol kashta, hoy ap o dives karye dino venna,

⁶ vitar gar glan ko nasslepen, hoy čorrhanes an i rat vell, vitar gar glan ko čilačepen, hoy ap o dives marell.

⁷ Ninna te perenn i zerya menshe ap tiri rig, oun deesh zerya ap tiri čači rig, touke djal či.

⁸ Ava, tire yakentsa dikeh tou les. Tou dikeh har i čilače lenn pal kova, hoy yon kran.

⁹ Tou penal: “Pash o baro Debleste hom khere.” Tou khatral tout pash o Debleste, ko pralstuneste.

¹⁰ Doleske vell kek bibarht ap toute, oun kek nasslepen nay vell an tiro kheer.

¹¹ Yob kokres penas ap peskre bolepangre, te denn le yak ap toute ap tire tsele dromma,

¹² te hidjrenn le tout ap pengre vasta, yaake te nay doukress tiri heri ap kek bar.

¹³ I leve oun i sapa nay doukrenn tout gar. Tou stakreh len lauter khetne.

¹⁴ O Devel penell: “Yob kamell man o tselo djiyestar. Doleske lau les dran kova lauter vin. Yob prindjrell man. Doleske dau yak ap leste.

¹⁵ Yob dell ap mande gole. Doleske shounau me ap leste, oun hom pash leste, te djal leske gar mishto. Me lau les vin dran i bibarht oun krau les bares.

¹⁶ Me dau les i lengsto djipen oun sikrau les, te hom kova, kay les vin lell dran i bibarht.”