Debleskri gili 9 - O Debleskro Lab 2024 (Sinte-Manouche)O Devel bistrell gar i čorvelen oun i bibarhtelen 1 I gili o rayeske pral i gipangre, te givell har koy gili Muth labben . O David kras kay gili. 1 I gili o rayeske pral i gipangre, te givell har koy gili Muth labben. O David kras kay gili. 2 Baro Devel, me parkrau man pash toute o tselo djiyeha, oun rakrau pral ko tselo baro koova, hoy tou kral. 3 Pral toute hom barhtelo, oun miro dji givell toutar, oun sharau tiro lab, tou Devel pral halauter! 4 Glan toute hounte tserdan pen kolla pale, kay his rhoyedo ap mande. Yon peran oun meran glan toute. 5 Ava, tou lal miro koova an tiro vast, oun beshal tout ap tiro čačepaskro stamin oun dal man čačes. Tou hal i čačepaskro ray, kay an o čačepen tardo hi. 6 Tou dal trad kol menshen an vavar themma, oun maral kolen, kay kaman toutar či te djinell. Lengre laba hi bistedo kanna oun hako tsireske. 7 Ava, kolla, kay kaman tout gar, hi bouder gar koy. Krik hi le hako tsireske. Lengre forya kral tou paash. Hako tsireske hi le bistedo. 8 O baro Devel ačella hako tsireske. Leskro čačepaskro stamin hi tardo. 9 Yob hi o čačepaskro ray pral i tseli phoub. Oun pral i tsele themma rakrell yob o čačepen vin. 10 I bibarhtele nay khatrenn pen pash leste, oun yob rikrell peskro vast pral lende, oun dell yak ap lende an phare tsirya. 11 Doleske rikrenn kolla ap toute, kay tiro lab prindjrenna. Koon tout, o baro Debles, rodella, koles moukeh tou gar kokres. 12 Givenn o baro Debleske, kay ap i berga Sion khere hi! Penenn i menshenge an vavar themma, hoy yob lauter kras! 13 Kova, kay bistrell gar te dell lo kolen i phagi, kay lan i rateskri doosh ap pende. Yob shounell i gole oun o mangepen kolendar, kay čorvelo oun palla lino hi. 14 Ab lačes ap mande, baro Devel! Dik o čilačepen, hoy kolla mantsa krenna, kay hi moulo rhoyedo ap mande! Oun tserde tou man vin dran o merepaskro vast! 15 Palle djau an i voudya tiro forestar Sion dren, oun rakrau lauterentsa pral ko lačepen, hoy tou ap mande kral, oun sharau tout i barhtelo djiyeha, kay tou man dran i bibarht vin lal. 16 I menshe an vavar themma, peran an koy rheb, hoy yon i vin hadan. An koy netsa, hoy yon vin čivan, tapran le pen kokres. 17 O baro Devel sikras, koon yob hi, oun das i čilačende pengri phagi. I čilače pandan pen an koy netsa, hoy yon pengre vastentsa kran. 18 Kamau, te djan le lauter pash i moulende, – kalla, kay kamenn o Deblestar či te djinell, oun bistrenn, kay hi yob o Devel. 19 O Devel bistrell o čorveles gar – an kek tsiro. I bibarhtele nay djinenn, te vell i tsiro, kay venn le barhtelo. 20 Baro Devel, ste pre! Mouk i menshen gar te hadenn le pen pral toute! An i menshen dran i tsele themma glan toute! Oun rake o čačepen pral lende vin! 21 Čip i daar ap lende, baro Devel, oun sike lende, te hi le či har menshe! |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.