Debleskri gili 89 - O Debleskro Lab 2024 (Sinte-Manouche)

Phagas o Devel peskro lab?

¹ Givede laba, hoy o Etan dran i familya Esra pre-činas.

² Hako tsiro kamau te givell pral o lačepen, hoy o baro Devel men dell. Lauterenge kamau te penell, har yob pash peskre menshende rikrell.

³ Kova hi hoy me penau: Hako tsireske ačell leskro lačepen, yaake rah har dell o bolepen, rikrell yob peskro lab.

⁴ Yob penas: “Miri sovel dom man koleste, koles me mange vin rodom: Me dom miro lab miro boudepaskro, o Davideste:

⁵ I menshe, kay toutar venna, hako tsireske yon ačenna. Dran tiro kheer i bare raya venna, oun hako tsiro i raya ačenna.”

⁶ Baro Devel, o bolepen sharell, hoy tou an tiri zoor lauter kral, I bolepangre sharenn, har hako tsiro pash tire menshende rikral.

⁷ Koon an o bolepen hi yaake har tou, maro baro Devel? Havo Devel nay vell yaake har maro baro Devel?

⁸ Kote, kay i bolepangre khetne venn, o Deblestar yon darenn. Kolla lauter, kay hi troul leste, hi dareno tardo glan o baro Debleste.

⁹ Tou baro Devel oun ray pral o bolepen oun i phoub, koon hi yaake zorelo har tou? Koon rikrell yaake pash peskre menshende har tou?

¹⁰ Tou hal o ray pral o baro divyo pani. Yob te hadell pes, kreh tou, te djal lo tele.

¹¹ O baro panyeskro sap Rahab dal tou moulo, oun kolen, kay touke čilačepen kaman, tradal tou krik.

¹² O bolepen, tiro hi lo, oun i phoub, tiri hi li, oun tou kral lauter, hoy dren hi.

¹³ Ko them, kay o kham gar tardo hi, tou kral les. Ninna ko them, kay o kham pral tardo hi, tou kral les. Koy berga Tabor oun i berga Hermon sharenn tout i barhtyatar.

¹⁴ Tout hi i zoreli moussi, tiro vast hi zorelo, oun pre hadedo tiro čačo vast, te sikress tiri zoor pral i menshende.

¹⁵ O čačepen pral i menshende rakreh, oun čačepaskre laba lenge peneh. Doleske ačeh tou o baro ray. An lauter, hoy kreh, dikah tiro lačepen, oun har pash mende rikreh.

¹⁶ Baro Devel, har barhtelo hi kol menshe, kay sharenn tout i gilyentsa, kay djivenn an tiro lačepen!

¹⁷ O tselo dives hi le barhtelo pral toute. O čačepen, hoy tou len deh, krell len baro.

¹⁸ Tou kokres hal lengro raylepen oun lengri zoor, oun dran tiro lačepen nay hadah mare sherya.

¹⁹ Baro Devel, tou dal men koles, kay ap mende garda della. Tou, o Devel pral o Israel, rodal les vin, te vell lo maro baro ray.

²⁰ Glan i rah tsiro rakral tou ap yekeste tire menshendar an i visiona oun penal: “Me dom miro vast i čačo morsheste, te vell lo ap t'mari rig. Me rodom les vin dran mire menshende, te vell lo baro ray.

²¹ Me hatsom o Davides, miro boudepaskro. Me makom les miro djeteha, te vell lo baro ray.

²² Miro vast rikrell les, oun miri moussi krell les zoreles.

²³ Kek, kay ap leste djal, vell o zorleder pral leste, oun kek čilačo nay hadell pes pral leste.

²⁴ Me kamau kolen khetne te stakrell, kay ap leste djan, oun kolen, kay leske čilačepen kamenn, dau me an i phoub.

²⁵ Hako tsiro rikrau pash leste, oun hom leske lačo. Me krau les bareder har kolla, kay troul leste hi.

²⁶ Me dau les penepaske pral ko tselo them mank o baro pani oun o lengsto pani Eufrat.

²⁷ Yob penell ap mande: Tou hal miro dad, miro Devel, kova, kay rikrell peskre vasta pral mande oun vell ap miri rig.

²⁸ Oun me krau, te vell lo miro phoureder čavo, oun o pralstouno pral i bare rayende ap kay phoub.

²⁹ Hako tsiro ačell miro lačepen ap leste, oun miro lab, hoy leske sovel dom, rikrau me.

³⁰ Hako tsiro vell yek leskre čavendar, kay pal leste venna, o baro ray pral o them, yaake rah har o bolepen koy hi.

³¹ Leskre čave, te moukenn le miro drom, oun djan gar pal miro čačepen,

³² oun krenn gar, hoy lendar kamau, oun rikrenn pen gar ap mire laba,

³³ palle dau len dava lengri doshake, oun douka lengro čilačepaske.

³⁴ Miro lačepen lau lendar gar krik, oun miro lab, hoy len dom, phagau me gar.

³⁵ Koy sovel, hoy lenge dom, phagau gar. Oun kol laba, hoy dran miro mouy djan, krau me gar vavarčandes.

³⁶ Yek kopo dom me man sovel, oun rhorhau o Davides gar: Yaake har čačo hi, kay hom o Devel, yaake hi čačo,

³⁷ te venn o Davidestar bare raya an hake tsirya, yaake rah har o kham koy hi,

³⁸ oun o čon ap o bolepen tardo hi, oun dikell, hoy ap kay phoub djala.”

³⁹ Kanna, baro Devel, čival tou les pale, koles tou vin rodal, te vas lo baro ray, Tou moukal les te perell, oun hal rhoyedo ap leste.

⁴⁰ Tou phagal tiri sovel, hoy tiro boudepaskres dal. Leskri rayeskri stadi vitsral ap i phoub, an i čik.

⁴¹ Leskro foro kral tou paash, oun kol bare zorele khera dal an kotya paash.

⁴² Lauter, kay ap o drom djan oun les dikan, čoran les vin. Kolla, kay langs leste djivenn, san pal leste.

⁴³ Kolla, kay ap leste djan, moukal, te hadenn le pen. Oun kral kolen barhtelo, kay leske čilačepen kamenn.

⁴⁴ An o kourepen his leskro rharo bouder gar zorelo. Oun tou moukal o Davides gar o zorleder te vell.

⁴⁵ Tou lal lestar o raylepen, oun leskri rayli beshepaskri stakral an i phoub.

⁴⁶ Glan o tsiro moukal tou les phouro te vell, oun anal ladj ap leste.

⁴⁷ Baro Devel, har rah kameh tout gomme te khatrell? Har rah moukeh tiri rholi te rhačrell har i yag?

⁴⁸ Tou djineh, har tikno miro djipen hi. Ma biste, har sik i mensho bouder gar kay hi! Tou kokres kral les yaake.

⁴⁹ Kek mensho hi koy, kay hounte merell gar. Kek nay lell peskro djipen vin dran o merepen.

⁵⁰ Baro Devel, glan i rah tsiro dal tou men tiro lab, te čivess tiro lačepen ap mende. Hoske rikreh tou gar koy sovel, hoy dal o Davideste?

⁵¹ Ma biste koy ladj, hoy hi ap mande, tiro boudepaskro! Dik, har hidjrau ko tselo praasepen kolendar, kay tout gar prindjrenna.

⁵² Baro Devel, kolla, kay tout gar kamenna, praasenn man, o baro rayes, koles tou touke vin rodal.

⁵³ Sharedo vell o baro Devel hako tsireske. Amen. Ava! Amen.