Debleskri gili 88 - O Debleskro Lab 2024 (Sinte-Manouche)I mangepen yekestar, kay ap o merepen čiddo hi 1 I gili o rayeske pral i gipangre, te givell har koy gili Mahalat Leannoth . Kay gili kras yek dran i familya Korah. O Heman dran i familya Esra činas kal laba. 1 I gili o rayeske pral i gipangre, te givell har koy gili Mahalat Leannoth. Kay gili kras yek dran i familya Korah. O Heman dran i familya Esra činas kal laba. 2 Baro Devel, tou hal o Devel, kay mange lauter mishto krell. Ap toute dau me gole hako dives oun haki rat. 3 Mouk miro mangepen glan toute te vell. Shoun, har ap toute rovau! 4 Man hi doha kol tsele doukendar. Hom gar dour o merepastar. 5 Hom lauterenge har yek, kay ap o merepen čiddo hi. Hom har i morsh, koles kek zoor bouder hi. 6 Man dan le pre har i moules. Mange djal har kolenge, kay moulo dino oun paskedo van, oun kolen bistral, oun lenge bouder či kreh. 7 Tou čival man an i phoub, an o telstunepen, kay kali rat troul mande hi. 8 Tiri rholi hi phares ap mande čiddo, oun yaake har boud pani yekes tele tserdell, tserdeh tou man tele. 9 Tou kral, te moukan man mire mala. Hom lenge djoungelo. Me hom dre-pandlo an i bibarht oun vau gar vin. 10 I doukatar vell mange kales glan i yaka. Ap toute, baro Devel, dau me gole hako dives. Mire vasta hadau me pash toute pre. 11 Kreh tou baro zorelo koova ap i moulende? Stenn i moule pre oun sharenn tout? 12 Rakrenn le pral tiro lačepen pash i moulende? – Pral tiro čačepen an o moulengro them? 13 Djinenn le kote, kay kali rat hi, havo baro koova tou kral an tiri zoor? Hayvenn le tiro čačepen kote an ko them, kay lauter bistedo hi? 14 Me dau ap toute gole, baro Devel. Sik taysarlakro anau miro mangepen glan toute. 15 Hoske čival man pale oun khatreh tout glan mande? 16 Foun tiknes pre hom nasselo, oun gar dour o merepastar. Hoske čiveh tou pale te pale i traash ap mande? Me nay hidjrau lat bouder gar. 17 Tiri rholi vas pral mande har i yag. Tire dava phagenn man. 18 Yon venn ap mande haki rigyatar, har baro divyo pani hi le troul mande o tselo dives. 19 Mire tsele malen tserdal tou mandar krik, mire menshen rikreh tou mandar pale, oun hom kokres har an i kali rat. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.