Debleskri gili 86 - O Debleskro Lab 2024 (Sinte-Manouche)

Yek, koleske gar mishto djal, dell gole ap o Debleste

1 O David mangas o Debles kol labentsa:

¹ O David mangas o Debles kol labentsa: Baro Devel, me hom čorvelo, oun mange djal gar mishto. Shoun, har dau ap toute gole, oun rake mantsa!

² De garda ap miro djipen! Me hom tiro. Ab ap miri rig, miro Devel, me hom tiro boudepaskro, oun rikrau man ap toute.

³ Baro Devel, ab mange lačes! Ap toute dau gole hako dives.

⁴ Miro dji djal pal toute, baro Devel. Kre man pale barhtelo. Me hom tiro boudepaskro.

⁵ Tou hal lačo, miro baro Devel, oun leh i doosh krik. Tiro lačepen hi baro kolenge, kay ap toute gole denn.

⁶ Baro Devel, shoun miro mangepen! Shoun, har rovau ap toute!

⁷ Ap ko dives, kay mange ropaske hi, dau ap toute gole, oun tou shouneh man.

⁸ Miro ray, dell kek debles har tout. Kek nay krell kova, hoy tou kreh.

⁹ I tsele natsyone, kolen tou kral, kolla venna oun mangenn tout an, maro rayes, oun sharenn tiro raylepen.

¹⁰ Tou hal baro oun kreh baro koova, hoy kek vavar nay krella. Tou kokres hal o Devel.

¹¹ Baro Devel, sike man tiro drom, te djap an tiro čačepen. Rike miro dji pash toute, te krap, hoy tou kameh!

¹² Mo Devel oun mo ray, parkrau man miro tselo djiyestar pash toute, oun hadau tout hako tsiro.

¹³ Tiro lačepen mange hi baro. Tou lal miro djipen vin dran o merepen.

¹⁴ Miro Devel, pre-phourde morsha hadenn pen ap mande. Kolla, kay zorelo oun čilačo hi, čivan pen khetne, oun kamenn man te marell. Pal toute poučenn le gar.

¹⁵ Tou, baro Devel, hal i lačo Devel, oun kreh tiro dji tire menshenge pre. Tou veh gar sik rhoyedo, Tiro lačepen hi baro oun tou rikreh pash tire menshende.

¹⁶ Risse tout pash mande, oun ab mange lačes! Hom tiro boudepaskro, – de man tiri zoor! Ninna miri day his tiri boudepaskretsa, doleske ab ap miri rig!

¹⁷ Sike mande, te hal tou mantsa lačes, baro Devel! Palle hounte ladjenn pen kolla, kay kamenn mange čilačepen, te dikenn le, kay tou ap miri rig hal, oun mire sva tele khosseh.