Debleskri gili 85 - O Debleskro Lab 2024 (Sinte-Manouche)I lačo tsiro o Debleskre menshenge 1 I gili yekestar dran i familya Korah. Kay gili hi o rayeske pral i gipangre. 2 Baro Devel, tout his i dji tiro themeske, oun lal o Yakobeskre pandle menshen vin dran i čilače vasta. 3 Tou lal o čilačepen, hoy tire menshe kran, lendar krik! Lengri tseli doosh bistral tou. 4 Tou rikral tiri rholi pale, oun rhačral bouder gar i rholyatar. 5 Maro Devel, kay tou lauter menge mishto kreh, ab ninna kanna ap mari rig! Mouk tele tiri rholyatar, hoy tout ap mende hi! 6 Kameh i tsele tsirya ap mende rhoyedo te ačell? Moukeh tou bouder gar tiri rholyatar tele? 7 Kameh men bouder gar nevi zoor te dell, te venn tire menshe pale barhtelo pral toute? 8 Baro Devel, ab menge lačes, oun kre lauter menge pale mishto! 9 Kamoms te shounap, har o baro Devel penell, te vell an leskro them oun leskre menshenge kek kourepen, yaake te djas mer gar ap dinele dromma. 10 Čačepah, yob hi ap kolengri rig, kay leha djivenna oun ap leste shounenna. Oun leskro raylepen ačell an maro them. 11 Palle vell leskro lačepen ap mende, oun mer rikrah zoreles ap leste. Mer krah hoy čačo hi, oun yob dell men barht an o dji. 12 Kate ap kay phoub rikrah mer zoreles ap o Debleste. Oun dran o bolepen vell o Debleskro čačepen ap mende. 13 Ava, o baro Devel moukell menge mishto te djal, oun mari phoub anell menge boud rhapen. 14 Hako tsiro oun ap hake dromma djal o baro Devel pal o čačepen. |
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
Romanes-Arbeit Marburg e.V.